Gahongayire na Patient Bizimana baburanye n’umunyamakuru wabise ‘abahehesi’

Yanditswe na Munyengabe Murungi Sabin
Kuya 17 Werurwe 2017 saa 02:13
Yasuwe :
0 0

Aline Gahongayire, Patient Bizimana na Isaïe Uzayisenga baburanye n’umunyamakuru uherutse gusohora inkuru isobanura ko ‘bari mu gatsiko k’abahanzi baririmba indirimbo zihimbaza Imana bashinjwa ubuhehesi no gukora ibihabanye n’ibyo bavuga’.

Aba bahanzi uko ari batatu baburanye na Nsengimana Théoneste Umuyobozi w’ikinyamakuru Umubavu kuri uyu wa Gatanu tariki ya 17 Werurwe 2017 ku cyicaro cy’Urwego rw’Abanyamakuru bigenzura, Rwanda Media Commission (RMC).

Uru rubanza rwaburanishijwe n’Inteko ngengamitwarire ya RMC yari igizwe na Uwineza Liliane, Rwasa Jerome ndetse na Mucyo Donatien basanzwe ari abakomiseri b’uru rwego. Iburanisha ryabereye mu muhezo, mbere y’uko impande zombi zitanga ibisobanuro aba bahanzi basabye ko itangazamakuru rihezwa ndetse ntihafatwe amajwi n’amashusho ku bw’ingingo zikubiyemo amabanga y’ubuzima bwite bwabo.

Iburanisha ryamaze amasaha agera kuri atatu kuko ryatangiye saa yine za mugitondo risozwa ahagana saa saba n’iminota 25. Inteko yanzuye ko ‘inkuru yanditswe kuri aba bahanzi ibashyira mu cyiciro cy’abakora ubushurashuji n’ubuhehesi itubahirije amahame agenga umwuga w’itangazamakuru ndetse n’umunyamakuru Nsengimana Théoneste akaba yabyiyemereye’.

Mu gusoma imyanzuro yavuye mu kunga aba bahanzi n’uyu munyamakuru, Rwasa Jerome yagize ati “Icya mbere ni uko inteko yasanze Nsengimana Théoneste agomba kunyomoza inkuru yatangajwe kandi ibi bigakorwa mu buryo bunyuze mu nyandiko ndetse no mu mashusho nk’uko iyi nkuru yari yatangajwe, ibi bikaba bigomba gukorwa bitarenze tariki 20 Werurwe 2017 kandi mbere y’uko abisohora mu nkuru Rwanda Media Commission ikaba igomba kubanza kureba niba byubahirije amahame abigenga.”

Yongeyeho ati “Icya kabiri ni uko umunyamakuru n’igitangazamakuru bagomba kwihanangirizwa mu nyandiko bigakorwa na RMC, icya gatatu ni uko dusaba Nsengimana Theoneste n’igitangazamakuru cye gusaba imbabazi abanditsweho iyi nkuru bose, ibi na byo bikaba byakorwa mu nkuru. Icya nyuma ni uko Nsengimana asaba gusiba amajwi yose yashyizwe kuri YouTube arebana n’ibyatangajwe, ibyo bigakorwa bitarenze uyu munsi[Kuwa 17 Werurwe 2017].”

Nyuma y’iburanisha Patient Bizimana yabwiye IGIHE ko yababajwe n’inkuru yamwanditsweho gusa ashimangira ko muri RMC atajyanyeyo ikirego agamije kuburana ‘kuko nta mukirisitu ujya mu manza’, ngo yashakaga ko haba ubwiyunge hagati ye n’uwanditse inkuru.

Yagize ati “Njyewe ntabwo byanshegeshe ariko uruhande rwanjye muri ibi bintu ni uko nta mukirisitu ujya mu manza, kwari uguhura no kureba amakosa yakozwe n’impamvu yabikoze. Mu by’ukuri nta kibazo gikomeye cyane, gusa ibyo yakoze byari mu buryo butari ubwa kinyamwuga kandi icyiza ni uko yabisabiye imbabazi. Nta mukirisitu uburana, ntabwo naje mu manza rwose, naje ngo duhure bwa mbere mubaze impamvu ituma atangaza ibintu bitari byo, ikibazo cyakemutse nta kibazo.”

Gahongayire Aline wagaragaraga mu maso nk’uwagizweho ingaruka n’ibyo ikinyamakuru cyamwanditseho yanze kuvugana n’itangazamakuru kuko ngo ‘afite umuvugizi usigaye amuvugira mu itangazamakuru’.

RMC yunze aba bahanzi n'umunyamakuru wabanditseho abashinja ubuhehesi

Aline Gahongayire kandi amaze iminsi avugwa mu buryo budasanzwe ku mbuga nkoranyambaga kubera ikiganiro kirimo amagambo akarishye yagiranye n’uyu munyamakuru wasohoye iyi nkuru. Iki kiganiro hamwe n’ibindi bifitanye isano nacyo ngo bigomba guhanagurwa kuri YouTube.

Nsengimana wanditse iyi nkuru yagize ati “Ibimenyetso byari bihari, twari twagiye tuvugisha abantu ndetse na bo barahari, gusa tumaze kubisohora abantu bagiye bavuga ngo twakubise mu cyico, ngo twateye ibuye mu gihuru, bavuze ibintu bitandukanye […] Nk’uko itangazamakuru rikora, hari ibishobora kugiraho abantu ingaruka ndetse bamwe bakaba bagendera mu makosa y’abandi, ni nayo mpamvu harimo bamwe baje kubaza uburenganzira bwabo nubwo twari twagiye dusobanura buri wese ku giti cye.”

Yavuze ko agiye gushyira mu bikorwa imyanzuro ya RMC kugira ngo akomeze imikoranire myiza n’abahanzi kuko ikinyamakuru cye cyibanda ku baririmbyi b’indirimbo zihimbaza Imana n’ubuzima babamo.

Aline Gahongayire ubwo yari ateze amatwi imyanzuro ya RMC
Gahongayire, Patient, Theoneste[wanditse inkuru] na Isaie Uzayisenga mu iburanisha
Umuririmbyi Patient Bizimana ngo yatunguwe n'ibyamwanditsweho ariko yishimiye ko byakemutse neza
Nsengimana Théoneste Umuyobozi w’ikinyamakuru Umubavu ari na we wanditse inkuru
Gahongayire yari yangiye abanyamakuru ababuza kumufotora
Yatekererezaga mugenzi we Dominic Nic uko byamugendekeye
Isaie Uzayisenga na Patient ngo batashye banyuzwe

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244