Harmonize ategerejwe i Kigali mu rugendo rwo kwiyegereza itangazamakuru ryo mu Rwanda

Yanditswe na Nsengiyumva Emmy
Kuya 7 Ukwakira 2019 saa 09:55
Yasuwe :
0 0

Umuhanzi Rajab Abdul Kahali [Harmonize] uri mu bakunzwe cyane muri Tanzania ategerejwe mu Mujyi wa Kigali mu rwego rwo gushaka uko yarushaho gukorana n’itangazamakuru ryo mu Rwanda no kwamamaza ibihangano bye.

Mu 2015 nibwo Harmonize yahuye na Diamond amusinyisha muri WCB Wasafi Records, kuva icyo gihe yagiye akora indirimbo zakunzwe bikomeye harimo iyitwa "Aiyola", “Kwangwaru” na “Bado” yafatanyije na Diamond, "Show Me" yakoranye na Rick Mavoko, “Kainama” bahuriyemo na Burna Boy n’izindi.

Uyu muhanzi ariko muri uyu mwaka yatandukanye na Diamond uri mu bamufashije kuzamura izina rye mu ruhando rwa muzika, afata icyemezo cyo gutangira urugendo rwo kwikorera.

IGIHE ifite amakuru ko Harmonize yitegura urugendo azakorera i Kigali mu rwego rwo kwamamaza indirimbo ze ariko akanahura n’itangazamakuru kugira ngo bagirane ibiganiro by’imikoranire.

Uyu muhanzi atangiye ibi bikorwa nyuma yo gutandukana na Diamond wamuzamuriye mu nzu ya Wasafi kuri ubu akaba asigaye yikorana umuziki.

Harmonize nk’umuhanzi watandukanye n’abamufashaga, kuri ubu yatangiye gukubitira hose ngo arebe ko yakubaka umubano ukomeye n’itangazamakuru ryo mu Karere rishobora kumufasha kuguma ku rwego yari ariho cyane ko yari amaze kuba ikimenyabose.

Mu minsi ishize Harmonize umaze kuzamura izina bikomeye muri Tanzania yari ari mu gihugu cya Kenya aho yazengurutse ibitangazamakuru binyuranye mu rwego rwo kwamamaza ibihangano bye ndetse no kubasaba kumuba hafi mu rugendo rushya atangiye rwo kwikorana umuziki.

Amakuru agera ku IGIHE ahamya ko uyu muhanzi witegura gutembera mu itangazamakuru ry’i Kigali yatangiye kuvunyisha mu nshuti ze harimo ubuyobozi bw’inzu ya The Mane bugomba kumuba hafi mu rugendo rwe i Kigali.

Umwe mu bayobozi ba The Mane yabibwiye umunyamakuru wa IGIHE ko Harmonize azagera i Kigali tariki 19 Ukwakira 2019, aha akaba agomba kuhakorera ikiganiro n’itangazamakuru ry’imyidagaduro ubundi akazenguruka ibinyamakuru binyuranye amenyekanisha ibihangano bye.

Harmonize azatemberera i Kigali asanga Safi Madiba na Marina bakoranye indirimbo mu minsi ishize. Aba bose kuba babarizwa muri The Mane byazamuye umubano we n’ubuyobozi bw’iyi nzu ifasha abahanzi mu Rwanda bakaba ari nabo bagomba kumufasha mu rugendo rwe.

Harmonize yaherukaga mu Rwanda mu mwaka wa 2018 ubwo yari yitabiriye ibitaramo bya The Mane byabereye i Musanze no mu Mujyi wa Kigali.

Harmonize ubwo yaramukanyaga na Bad Rama wamwakiriye ubwo yageraga ku Kibuga Mpuzamahanga cy'Indege cya Kigali i Kanombe mu 2018 aho yari yitabiriye igitaramo cya The Mane
Mu ndirimbo yitwa “Never Give Up” Harmonize aheruka gukora avuga ku buzima bubi yabayemo kugeza ubwo ahindutse icyamamare
Harmonize yaguye neza abitabiriye igitaramo cya The Mane i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza