Hateguwe igitaramo cyo kumurika imideli ku bana bato kizaha umwihariko abafite ubumuga

Yanditswe na Uwiduhaye Theos
Kuya 13 Ukuboza 2019 saa 04:54
Yasuwe :
0 0

Mu Rwanda hagiye kuba igitaramo cyo kumurika imideli ku bana bato barimo n’abafite ubumuga bo mu gihugu no hanze.

Ni igitaramo cyiswe ‘The Kids Fashion Runway’ giteganyijwe ku Cyumweru tariki 15 Ukuboza 2019, muri Serena Hotel.

Iki gitaramo hazerekanwa imideli yakorewe abana. Kizaba ari igitaramo kidaheza abafite ubumuga kizaba muri uku kwezi nyuma y’ikindi cyabaye tariki 29 Ugushyingo 2019 ubwo hizihizwaga icyumweru cyo kuzirikana abafite ubumuga.

Iki gikorwa cyo kumurika imideli y’abana barimo n’abafite ubumuga kigamije kugaragaza ko kugira ubumuga bitavuze ko umuntu adashoboye. Muri uyu mugoroba wo kumurika imideli aba bana bazaba bambitswe n’abahanzi b’imideli bakomeye mu Rwanda.

Aba bana bazerekana imyambaro yiganjemo iy’ibihe by’iminsi mikuru ya Noheli n’Ubunani igiye kuza.

Fernando Kamugisha uri gutegura iki gikorwa yavuze ko bagiteguye kuko bazi ko abana bashoboye gukora ikintu kikagira umumaro ukomeye mu muryango.

Ati “Abana bafata vuba icyo nicyo cya mbere. N’ubwo badakunze gukoreshwa mu byo kumurika imideli njye nziko bashobora kubikora neza kurusha abakuru”.

Ikindi cyatumye babifashisha ni uko bashobora kuba ijwi ryo kuvuganira abafite ubumuga ndetse no kubaha ikaze mu muryango w’abari mu ruganda rwo kumurika imideli.

Ati “Dushaka kwerekana ko niba umwana ashobora kwereka urukundo abantu bafite ubumuga, ku bakuze bo bimeze bite?”

Yakomeje avuga ko ubu muri iki gihe Isi igeze mu gihe cy’uburinganire no kudaheza bamwe.

Ati “Turi kuba mu Isi yo kudaheza kandi y’uburinganire. Dushaka guteza imbere abana bafite ubumuga tukagaragaza ko bashoboye kandi bashobora gukora neza umurimo barimo. Dushaka guteza imbere impano no kwigirira icyizere ku bana bacu.”

Muri iki gikorwa hazaba harimo abafite ubumuga butandukanye burimo ubw’uruhu, kutabona, kutumva, kutareba, kutavuga n’ubundi ubwo aribwo bwose bujyanye n’ingingo.

Abana bazerekana imideli ni abari hagati y’imyaka itandatu na 15. Bazerekana imyambaro irimo iyakozwe na Kipepeo, Rwanda Clothing, House of Tayo n’abandi bahanzi b’imideli bakomeye mu Rwanda.

Kwinjira bizaba ari 10 000 Frw mu myanya isanzwe na 20 000 Frw mu myanya y’icyubahiro. Ku bana bo bazishyura kimwe cya kabiri cy’ibi biciro.

Abana bazerekana imideli muri iki gikorwa ni abafite imyaka hagati y'itandatu na 15
Abana batandukanye barimo n'abafite ubumuga bateguriwe igikorwa cyo kwerekana imideli
Fernando yavuze bashaka gukebura abantu bakuru babereka ko n'abana bereka urukundo abafite ubumuga
Muri iki gikorwa hazaba harimo abana bafite ubumuga butandukanye berekana imideli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza