Humble Jizzo yatunguye Umunyamerikakazi bakundana amwambika impeta y’urukundo (Amafoto)

Yanditswe na Munyengabe Murungi Sabin
Kuya 16 Gashyantare 2017 saa 11:31
Yasuwe :
4 2

Manzi James [Humble Jizzo] umwe mu baririmbyi b’itsinda Urban Boyz yatunguye umukunzi we Amy Blauman amwambika impeta y’urukundo bari mu gikorwa cyo gufata amashusho y’indirimbo.

Uyu muhanzi na Amy Blauman batangiye gukundana mu buryo buteruye mu mwaka wa 2015. Urukundo rugitangira kuvugwa hagati yabo babanje kubihakanira itangazamakuru nyuma baza kubyemera ndetse kuri ubu bateganya kurushinga bitarenze impeshyi y’umwaka wa 2017.

Humble Jizzo n’umukunzi we ubu bafitanye indirimbo bise ‘Do You Know’ ndetse baherutse kuyifatira amashusho. Kuwa Kabiri tariki ya 14 Gashyantare aba bombi bagiye i Nyarutarama gufata amashusho y’indirimbo, ubwo bageze hafi ya Golf Club Humble Jizzo yatunguye umukunzi we amupfukama imbere amwambika impeta y’urukundo.

Mu kiganiro na IGIHE, Humble Jizzo yavuze ko iyi mpeta yongereye imbaraga mu rukundo rwabo ndetse ngo banahise bafata umwanzuro ko bitarenze umwaka wa 2017 bagomba kurushinga.

Yagize ati “Impeta narayimwambitse rwose, nabikoze bingoye kuko twari mu gikorwa cyo gufata amashusho ariko impeta yo nari nayitwaje, akazi kagezemo hagati napfukamye hasi mvanayo impeta musaba ko yanyemerera nkayimwambika. Yabanje kumbaza niba ari video ikomeje cyangwa niba ari imikino ndimo mubwira ko nifuza ko yakwemera akazambera umugore bigenda gutyo.”

Humble Jizzo na Amy Blauman biteguye urugendo bazakorera muri Leta Zunze Ubumwe za Amerika kujya gusura umuryango w’uyu mukobwa hanyuma bakagaruka mu Rwanda gutegura ubukwe bwabo.

Humble Jizzo wo muri Urban Boyz aherutse kwambika umukunzi we impeta y'urukundo

Ati “Iwabo bubaha impeta cyane, kuba naramwambitse iriya mpeta ubu nta mikino irimo, ndi gupanga kujya gusura umuryango we mu minsi mike iri imbere hanyuma nkazagaruka tukabona gukora ubukwe […] Ntabwo bizarenza uyu mwaka, tugomba kurushinga umwanzuro twarawufashe.’

Mu kwezi k’Ukuboza 2016, Humble Jizzo na Amy Blauman bagiye gusura umuryango w’uyu muhanzi utuye i Nyagatare, umukobwa baramushimye ndetse ubu imiryango yombi yatangiye gahunda yo kumenyana no gutegura uko ubukwe bugomba kuzagenda.

Humble Jizzo n’uyu mukobwa ngo bamenyaniye muri Nigeria ubwo Urban Boyz yari yitabiriye iserukiramuco rya muzika rya ‘Gidi Culture Festival’ muri 2015. Bagarutse mu Rwanda, uyu musore yakunze kugaragara mu Mujyi wa Kigali atemberana na Blauman, kuva ubwo kugeza ubu ‘bari mu rukundo rukomeye’.

Uyu mukobwa ngo yabanje gukeka ko ari imikino
Humble Jizzo yatunguye Umunyamerikakazi bakundana amwambika impeta bari mu kazi
Amy Blauman ubu yambaye impeta y'urukundo
Humble Jizzo na Amy bari mu rukundo ndetse biteguye gukora ubukwe
Yamwambitse impeta bari gufata amashusho y'indirimbo bakoranye
Aba bombi bakoranye indirimbo
Aba bombi baritegura kurushinga bitarenze uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244