I Kigali hateguwe igitaramo cyo gushaka inkunga y’ishuri ry’umuziki

Yanditswe na Dusabimana Aimable
Kuya 17 Gashyantare 2017 saa 09:27
Yasuwe :
0 0

Mu Mujyi wa Kigali hagiye kubera igitaramo kizahuriza hamwe abaririmbyi bakomeye mu njyana zo kuramya no guhimbaza hagamijwe gukusanya inkunga y’amafaranga azafasha abagiteguye gushinga ishuri ry’umuziki.

Iki gitaramo cyiswe ’Ituro Worship Concert’ kizitabirwa n’abahanzi batandukanye bakomeye mu ndirimbo zo kuramya no guhimbaza Imana barimo Aime Uwimana, Gaby Kamanzi, Diane Kamugisha, Aline Gahongayire, Luc Buntu, Brian Blessed, Guy Badibanda, Cubaka Justin, Christian Irimbere n’abandi.

Umuyobozi wa Neema Art Foundation yateguye iki gitaramo, Christophe Mbonigaba, yabwiye IGIHE ko ari igikorwa batekereje gukora hagamijwe gushaka ubushobozi buzatuma bashinga ishuri ryigisha umuziki rigomba gufasha abantu b’ingeri zose.

Ati "Muri iki gitaramo twatumiye abahanzi batandukanye ba Gospel, ni igitaramo cyo guhimbaza Imana kandi umuntu azatanga icyo afite. Ni igikorwa twateguriye abanu bose."

"Intego twihaye ni gushinga ishuri ryigisha umuziki ni ugushyira imbaraga mu guteza imbere Igihugu, ni nayo mpamvu twibanze cyane ku bana batishoboye. Turashaka kubitaho atari mu buryo bwo kubishyurira amashuri gusa ahubwo no mu buryo bwo kumenya neza niba ibyo bize hari icyo bizabagezaho mu buzima busanzwe na bo bakanafasha n’abandi."

Yakomeje avuga ko uyu muryango akuriye usanzwe ufasha abana badafite kirengera ukabarihirira amashuri by’umwihariko abiga amasomo agendanye n’imyuga ndetse n’umuziki. Yavuze bakira ari abantu b’ingeri zose bifuza kwiga gucuranga ibyuma birimo Piano, Ingoma n’ibindi byosee by’umuziki.

Biteganyijwe ko iki gitaramo kizakusanyirizwamo inkunga yo gushinga iri shuri kizabera Kicukiro mu Kagarama ahitwa New Life Bible Church ku wa 5 Werurwe 2017 guhera ku isaha ya saa kumi z’umugoroba, kwinjira ni ubuntu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza