Ibiteye amatsiko ku buzima bwa Frankie Joe wamamaye mu ruganda rwa muzika, imideli na sinema

Yanditswe na Muvunyi Arsène
Kuya 27 Gicurasi 2019 saa 02:14
Yasuwe :
0 0

Frank Rukundo [Frankie Joe] azwi mu ndirimbo nyinshi zakanyujijeho mu bihe byahise. Harimo nka Kipenda Roho yakoranye na Kidumu, Umusonga, Bubbly Bubbly, Byina aherutse gushyira hanze n’izindi nyinshi.

Uretse umuziki ni n’umunyamideli, akaba yaranahagarariye u Rwanda mu irushanwa rya Big Brother Africa mu 2015 ryaberaga muri Nigeria.

Yakinnye filime zikomeye zirimo iyitwa “Painkillers”, filime y’uruhererekane “Common”, “Wynonna Earp” n’izindi.

Ni umugabo muremure wirabura w’ibituza binini bigaragara ko umubiri we yawuhase imyitozo ngororamubiri myinshi. Biragoye kubona isura ye yazinze iminkanyari kuko ahora aseka.

Kuri ubu atuye muri Canada ndetse yamaze kubona ubwenegihugu bwaho, ni umuturage nk’abandi bose.

IGIHE yagiranye na we ikiganiro kirambuye aduhishurira ibyo abantu benshi batari bamuziho.

Frank Joe afite Impano yo kumurika imideli

Bimwe mu byo wamenya kuri Frank Joe

IGIHE: Ibyishimo byuzuye kuri wowe ubibona gute?

Frankie Joe: Ibyishimo byuzuye mbibona ndi kumwe n’abantu b’inshuti zanjye banyiyumvamo nanjye nkabiyumvamo. Rero iyo ngiye kureba abantu nk’abo ngendera ku mico, imyitwarire, ibitekerezo, rimwe na rimwe ukuntu basetsa.

IGIHE: Ni iki kigutera ubwoba kurusha ibindi?

Frankie Joe: Mu by’ukuri navuga ko ari ubukene. Ubukene buragatsindwa kandi ni cyo gituma dukora cyane. Inaha hari amateleviziyo ya World Vision akunze kwerekana abana badafite uko babayeho, basaba gukusanya inkunga yo kubafasha, ukabona abana bato cyangwa abasheshakanguhe badafite uko babayeho nkumva ndahwereye. Ikintu cyitwa ubukene kintera ubwoba kandi buragatsindwa.

IGIHE: Ni iyihe ndangagaciro wiyumvamo wowe ubwawe?

Frankie Joe: Indangagaciro niyumvamo nkanjye Rukundo, sinjya mpemuka. Niba nakwemereye ko nzaguha ikintu cyangwa se nzagukorera ikintu ndagikora kandi nkagikorera ku masaha twavuganye n’uko twabivuganye kose.

IGIHE: Ni inde muntu mu bari ku Isi wishimira ndetse ukamwubaha cyane?

Frankie Joe: Hari abantu benshi ariko nka njye iyo ndebye abantu nubaha ni benshi. Nkanjye Frank Rukundo ababyeyi banjye ndabubaha mbabona nk’Imana, mbabona nk’ibintu ntagereranywa nicyo gituma iyo hashize umunsi tutavuganye na Mama…hari n’igihe ampamagara nka saa cyenda ndyamye.

Tugiye nko muri politiki Perezida Paul Kagame ni umuntu nubaha. Iyo avuze ijambo rirakoreka, ni umuntu ushyira mu ngiro ibyo yavuze, ni umuntu uhagarara ku ijambo.

IGIHE: Ni ikihe kintu utakazaho amafaranga cyane mu buzima bwawe?

Frankie Joe: Urebye umuziki wanjye wariye amafaranga pe! Ndawukunda kandi ugasanga n’iyo ntari gusohora indirimbo nyinshi usanga nkora ubushashatsi mvugana n’abandi bantu benshi muri uwo mujyo niho hatakarira amafaranga menshi. Ariko burya nk’abasore hari nk’akantu ujya wiyumvamo, rero ikintu cyitwa parfait [imibavu] kirayarya pe.

Frankie Joe arangwa n'ibyishimo buri gihe

IGIHE: Ni ryari ushobora gufata icyemezo cyo kubeshya?

Frankie Joe: Burya hari igihe usanga kubeshya ari ngombwa. Ndaguha nk’urugero nk’umupolisi agufashe wibagiwe nk’uruhushya rwo gutwara ibinyabiziga cyangwa utarayongeresheje agaciro ugatangira uti ‘sinabyibutse’ kandi wari ubizi.

Hari igihe kubeshya biba ngombwa ariko atari ibintu bizima nakwigisha umwana wanjye.

IGIHE: Ni iki wanga cyane mu mibereho yawe?

Frankie Joe: Nanga kugaragara nk’umubeshyi, umuntu w’ivuzivuzi nanga ibintu byose aho biva bikagera birimo ububeshyi, uburiganya ibyo byose ndabyanga, ndabyirinda kandi Imana izamfashe kutazabijyamo.

IGIHE: Ni inde muntu mu bari ku Isi ufata nk’usuzuguritse, udaha agaciro cyane?

Frankie Joe: Sinzi ko hari umuntu nshobora gusuzugura kereka yansuzuguye. Sintekereza ko mfite umuntu uriho nsuzugura kuko nta ruhare nagize kugira ngo uwo muntu abeho. Simuha umwuka, simugurira ibyo kurya. Sinzi uko hari uwo nasuzugura kuko bayeho ukwe mu gihe atinjiye mu buzima bwanjye.

IGIHE: Ni izihe ndangagaciro wishimira kubona ku mugabo?

Frankie Joe: Indagaciro mbona ishobora kuranga umugabo, ni wa mugabo uzahagarara ku ijambo, umuntu umeze nka Mandela. Umuntu uvuga ati reka ngerageze niba bizansaba imyaka 27 mbe mu gihome ariko abantu barye, banywe, bige, bishime.

IGIHE: Ni izihe ndangagaciro wishimira kubona ku mugore?

Frankie Joe: Burya umugabo n’umugore mbona twese turi kimwe. Indangaciro ziranga umugabo sinzi impamvu zitaranga umugore kuko twese turi umuntu umwe. Turahumeka, dushobora gukora ibintu bimwe. Kuko hari abagore twabonye benshi bakoze akazi keza.

IGIHE: Ni iki gikomeye wishimira ko wagezeho mu buzima bwawe?

Frank Joe: Icya mbere kuba ndi umubyeyi. Icya kabiri kuba ngerageza gukora ibintu byose nkunda cyane cyane umuziki. Burya nkatwe abahanzi iyo ukoze ikintu kizima ukabona umuntu uwo ari we wese bavuga bati ‘kariya karirimbo kankoze ahantu’ nkanjye nishimira ko Imana yampaye inganzo, kuririmba, nahura n’abantu bakanshimira.

IGIHE: Uramutse upfuye, ukagaruka ku Isi nk’umuntu cyangwa ikintu, wumva cyaba ari igiki?

Frankie Joe: Ndamutse mpfuye nkahita ngaruka, ndamutse ngize uwo mutima nk’uwa Mandela nkafungwa imyaka 27 ariko simve ku izima byaba ari agahebuzo.

IGIHE: Nihe wumva wifuza kuba mu buzima bwawe?

Frankie Joe: Kuri iyi myaka ngezemo maze kugenda mu bihugu bitandukanye. Ushobora kwifuza kuba Miami cyangwa se Frorida ariko kwa kundi uba mu bantu bakumva uvuze nk’icyongereza mu buryo busekeje ukabona bakwibajijeho cyane.
Mu zabukuru ngomba kuba mu Rwanda. Uzi kwa kundi ujya gukatisha itike y’indege utashye ukumva umutima uratuje niko mba nanjye niyumva. Aho wajya hose mu rugo ni mu rugo.

IGIHE: Ni ikihe kintu cy’agaciro utunze?

Frankie Joe: Ni umutima mwiza rwose. Nta kintu cyarusha agaciro umutima mwiza n’ubuzima bwiza. Mfite ubuzima bwiza kandi mfite n’umutima mwiza Imana izakomeze ibimfashemo.

IGIHE: Ni iki cyakubabaje mu buzima bwawe, ukumva wihebye cyane?

Frankie Joe: Mu 2003 nari mfite mubyara wanjye yandushaga imyaka nk’ine cyangwa itatu twarakundanaga pe! Yari afite ubwenge, afite ejo hazaza pe! Yigaga muri KIE ashaka kuba umwarimu kandi ubona abikunze.

Twari kumwe ku cyumweru agiye kujya muri Uganda kuko niho ababyeyi be babaga turaganira bisanzwe. Ndamubwira nti ‘ese ejo uzajya Kampala’? arambwira ati ‘oya nzajyayo ku wa kabiri.’

Bukeye ku wa mbere ahita afata bisi, ngira ngo byamujemo ajya i Kampala bageze ahantu hitwa i Kabale barenze i Gatuna bisi igongana n’ikamyo. Muribuka impanuka ya 2003 abana bagapfa benshi uwo mubyara wanjye yitwaga Grace nawe yarahapfiriye.

Kuva uwo munsi narababaye pe! Ku buryo natangiye kwibaza ubuzima, kwa kundi uhura n’umuntu utazi ko ari bugende ejo, ukajya kumva ngo yagiye.

Ni bya bintu wumva abantu bavuga cyangwa ukabibona muri filime ariko iyo bikubayeho nibwo umenya ko ubuzima atari ikintu cyo gukinisha. N’ubu nyuma y’imyaka hafi 20 hari ubwo mbyibuka nkumva umutima uraremereye.

Frankie Joe yifuza kuzasazira mu Rwanda

IGIHE: Ni iki ukunda gukora cyane?

Frankie Joe: Nkunda gukora cyane siporo. N’iyo naba ndushye cyangwa ndwaye. Iyo mfite umwanya njya muri box nkagenda nkakinaho gato.

IGIHE: Ni iyihe ndangagaciro ikuranga cyane mu buzima bwawe, igaragarira buri wese?

Frankie Joe: Ni urukundo rwinshi. Abantu benshi bavuga ko nirekura mba nisekera. Mfite urukundo rwinshi.

IGIHE: Ni iki uha agaciro cyane mu nshuti zawe?

Frankie Joe: Ni ubunyangamugayo. Inshuti nke mfite nta kubeshya kuko kumbeshya ni nko kunyica. Mba mbona undebye mu bwonko.

IGIHE: Ni abahe banditsi ukunda?

Frankie Joe: Sinkunda gusoma cyane ibitabo ariko nigeze gusoma igitabo cya Nelson Mandela cyitwa “The Long Walk To Freedom” ni igitabo cyari gifite amapaje hafi igihumbi n’amagana naragisomye ukagira ngo nanjye nari ndiyo.
Hari n’ikindi cya Martin Luther King nigeze gusoma cyitwa “Let The Trump Sound”. Ibyo bitabo narabisomye byose ugiye kureba ni ibitabo by’abantu bakanyujijeho bashakisha ubutabera wenda umunsi nanjye nzacyandika.

IGIHE: Ni inde muntu mu mateka wisanisha nawe mu buzima bwawe?

Frankie Joe yishimira ko ari umubyeyi

Frankie Joe: Nkunda abantu bareba imbere heza, nkunda abantu bahanga udushya, bashaka ibisubizo mu buryo butanyuranyije n’amategeko mu gihe ibyo bakora bigira ingaruka nziza kuri sosiyete.

Mandela kuri njye ni igitangaza. Ndamuvuga kandi nzahora muvuga kuko urebye ibintu yakoze n’ukuntu yabayeho azahora ari umuntu ukomeye kuruta abandi.

Uwa kabiri ni Mohamed Ali urebye amagambo yavugaga kandi yari umuntu utaranize cyane. Yajyaga mu kibuga agakora ibyo akora kandi agakubita abantu bose ariko yasohoka ukabona akamaro afitiye abantu n’ibibazo ashaka kubakemurira akoresheje ubwamamare bwe.

IGIHE: Ni iki gikomeye wicuza mu buzima bwawe?

Frankie Joe: Nta kintu nicuza mu by’ukuri. Mu myaka ngezemo ibyo nakoze narabikoze n’ibyo nkikora ndacyabikora, ibipfuye birapfa ariko ndavuga nti ‘byapfuye kubera iki n’iki’. Nta kintu mu buzima nshobora kwicara nkavuga nti ‘ndicuza’.

IGIHE: Wifuza ko wazatabaruka mu buhe buryo?

Frankie Joe: [yabanje gutinya gusubiza] Twese twaravutse kandi tuzatabaruka ariko sinshaka gutabaruka ubu, ndifuza ko Imana yazamfasha nkazabona abuzukuru banjye n’abazukuruza nkajya kuryama nkatabaruka gutyo.

IGIHE: Ni iyihe ntego ugenderaho mu buzima bwawe?

Frankie Joe: Intego yanjye ni “iyo amahirwe aje yafate” na nyakubahwa Perezida Kagame ajya abivuga. Iyo mbonye amahirwe n’iyo kaba ari akazi kameze gute ariko nkabona hari ikintu ndi bugakuremo ndagakora pe.

Byina ni yo ndirimbo nshya ya Frankie Joe

Reba amashusho ya Kipenda Roho ya Frankie Joe na Kidumu

Mu buzima bwe akunda gukora siporo kurusha ibindi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza