Ibyishimo bidasanzwe mu ruhurirane rw’ibitaramo byasoje umwaka wa 2016 (Amafoto)

Yanditswe na Munyengabe Murungi Sabin
Kuya 1 Mutarama 2017 saa 12:01
Yasuwe :
0 0

Iteka ijoro risoza umwaka riberamo ibintu bidasanzwe mu bihugu byose ku Isi ahanini abaturage baba bishimira ibyagezweho abandi bagashima Imana ko yabarengeje imitego yashobora kwangiza byinshi mu buzima bwabo.

Mu ijoro ribanziriza intangiriro z’umwaka wa 2017, mu Mujyi wa Kigali habereye ibitaramo by’impurirane mu rwego rwo gufasha abatuye mu Rwanda kwizihirwa no kurushaho kuryoherwa n’iminsi mikuru.

Uretse ibitaramo byari byeteguwe mu Mujyi wa Kigali mu ijoro ryo kuwa 31 Ukuboza 2016 abantu ku giti cyabo bari bateguye iminsi mikuru mu ngo zabo abandi bahitamo kujya kurara mu nsengero mu buryo bwo kwiyegereza Imana no kuyiragiza imigambi bafite mu gihe kizaza.

Mu masaha y’ijoro ryo kuri uyu wa 31 Ukuboza 2016 mu mihanda yose ya Kigali hari urujya n’uruza rw’abantu bagaragaza ibyishimo bidasanzwe buri wese mu cyiciro cye bishimira ko bagiye kwinjira mu mwaka mushya.

Mu gusezera umwaka wa 2016 hari abahanye impano abandi babanza gusangirira hamwe n’imiryango yabo mbere y’uko bafata umwanya wo kwitabira ibi bitaramo byabereye mu bice bitandukanye by’Umujyi wa Kigali.

By’umwihariko, ibitaramo bitatu bikomeye kurusha ibindi, icyabereye imbere y’inyubako ya Kigali Heights (cyiswe New Year’s Eve Countdown), igitaramo gihenze cyane cya Koffi Olomide cyabereye muri Kigali Convention Center n’ikindi cy’umuhuro cyiswe Xclusive Vibe Party cyahuje The Ben n’abafana i Nyarutarama; ibi ni byo bisa n’aho byari byashidukiwe na benshi.

Imbere ya Convention Center babyinnye burinda bucya

Igitaramo cyiswe New Year’s Eve Countdown cyari umwihariko urebeye ku mitegurire yacyo n’uburyo gahunda zari zipanze kuva kigitangira kugeza gisojwe. Ubwitabire bwari buke ugereranyije n’ubunini bw’aho igitaramo cyabereye ariko abahageze bahagiriye ibihe byiza.

Iki gitaramo ni nacyo cyitabiriwe n’umuririmbyi Mun G wo muri Uganda, yabanjirijwe n’aba Dj babigize umwuga mu kuvanga imiziki barimo DJ Focus, Bisoso, Chop, Cliff na Bisoso.

Iki cyabaye kibangikanye n’ikindi gikomeye cyane cyitabiriwe na Koffi Olomide muri Kigali Convention Center nacyo cyateguwe na Kigali Count Down Events.

Igitaramo cya Koffi Olomide cyitabiriwe n’umubare munini nubwo ibiciro byo kwinjira byari biremereye kuri bamwe, cyari umwihariko ndetse cyatambukaga kuri Televiziyo y’u Rwanda. Uretse itsinda ry’abanyamakuru bakorera RBA nta wundi munyamakuru wari wemerewe gutara inkuru mu gitaramo cya Koffi Olomide.

Abitabiriye igitaramo cya Koffi Olomide n’icyabereye imbere y’inyubako ya Kigali Heights bakase umuziki kugeza mu masaha y’urukerera ntacyo bikanga kuko umutekano wari urinzwe bikomeye cyane ku buryo nta muntu washoboraga kuba yahutazwa cyangwa ngo agire ikimuhungabanya.

Hejuru y’inyubako ya Kigali Convention Center ni naho harasiwe fireworks mu kwishimira ko Abanyarwanda binjiye mu mwaka mushya wa 2017. Byari ibyishimo ndengakamere, benshi bahoberanye abandi basimbukira hejuru bishimira umwaka binjiyemo.

Ibyishimo byasabye benshi ubwo Perezida Kagame yatunguraga abari bateraniye mu gitaramo cya New Year’s Eve Countdown agaca imbere y’inyubako ya Kigali Heights agasuhuza abafana nabo bakungikanya amajwi bagira bati ’Muzehe wacu’.

Itangazamakuru ryahejwe mu muhuro wa The Ben n’abafana

The Ben wari umaze imyaka itandatu aba muri Leta Zunze Ubumwe za Amerika yagarutse mu Rwanda, yaje kwitabira igitaramo cya East African Party gisanzwe gitumirwamo abahanzi bakomeye muri Afurika no ku Isi.

Mbere y’iki gitaramo yateguriwe umuhuro n’abafana kuri Hotel Villa Portofino i Nyarutarama mu ijoro ryo kuwa 31 Ukuboza. Ibi birori byateguwe na kompanyi yitwa Elite ifatanyije na EAP.

Uyu muhuro wiswe Xclusive Vibe Party usanzwe uba mu ijoro ribanziriza East African Party gusa mu myaka yatambutse nta munyamakuru wabuzwaga kwinjiramo ngo atare amakuru ariko uyu mwaka byari akarusho.

XClusive Vibe Party yitabiriwe ku rwego rushimishije ndetse The Ben na we yishimiwe n’abamubonye mu minota mike yamaze imbere y’abafana akanabaririmbira ‘Habibi’.

Umunyamakuru wageraga kuri Hotel Villa Portofino mbere y’uko yemererwa kwinjira ubuyobozi bwa kompanyi yitwa Elite ari nabwo bwateguye iki gitaramo bwamumenyeshaga ko ‘agomba kuzinga ibikoresho bakabimubikira akareba igitaramo yarangiza agataha nta shusho cyangwa ifoto afashe’.

Umunyamakuru wa IGIHE uri mu babujijwe gutara inkuru muri iki gitaramo yabajije Umuyobozi wa Elite, Habimana Laurent Christian impamvu itangazamakuru ryahejwe undi asubiza ko “Abanyamakuru bari bakenewe mu kwamamaza igitaramo gusa”.

Hari abihanganiye kureba umuhuro wa The Ben n’abafana badafata amakuru gusa uwumvaga ashyizweho amananiza yahitaga yikubura agataha.

ROC NYE party yitabiriwe n’abafana mbarwa

Igitaramo nagarukamwaka cya ‘ROC NYE party’ cyagombaga gususurutswa n’aba Dj bakomeye muri Afurika n’i Burayi cyaranzwe n’ubwitabire buri ku rwego rwo hasi ugereranyije n’uko cyitabirwaga mu myaka yatambutse.

Iki cyabereye hejuru y’inyubako ya CHIC mu Mujyi wa Kigali rwagati, cyari cyatumiwemo aba Dj bakomeye barimo DJ Dollar wo muri Senegal na DJ Omzee usanzwe ukorera i Brussels.

ROC NYE party cyateguwe na Roc Events isanzwe izobereye mu gutegura ibitaramo mu Rwanda, cyagombaga gutangira saa tanu z’ijoro kugeza bucyeye ariko byageze saa munani z’ijoro hari abafana batarenze mirongo itanu.

Kuri uyu wa 1 Mutarama 2017 hateganyijwe ikindi gitaramo gikomeye cyatumiwemo The Ben wavuye muri Amerika, iki kirabera mu marembo ya Stade Amahoro i Remera kwinjira ni amafaranga ibihumbi bitanu ahasanzwe ndetse n’ibihumbi icumi mu myanya y’icyubahiro.

Koffi Olomide waraye utaramiye muri Convention Center yatumiwe mu kindi gitaramo kigomba kubera kuri Serena Hotel mu ijoro ryo kuri iki Cyumweru aho kwinjira ari amafaranga ibihumbi 20 ahasanzwe ndetse n’ibihumbi 40 mu myanya y’icyubahiro.

Imbere ya Convention Center byari ibirori...

Azam TV yatambutsaga ibi birori
Ibyishimo byari byose nyuma yo kwinjira mu mwaka wa 2017
Akanyamuneza kari kose
Abafana bari bategereje kureba uko fireworks ziraswa bishimira umwaka mushya
Abaje muri iki gitaramo barebye ibintu biryoheye amaso
Buri wese yabyinaga ibye
Televiziyo zikomeye zakurikiranye iki gitaramo
Dj Bissosso ubwo yavangaga imiziki

Mbere y’uko Koffi Olomide ajya imbere y’abafana

The Ben yahuye n’abafana, itangazamakuru riracecekeshwa

Igitaramo cyabereye hejuru ya CHIC ni gutya byari byifashe

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza