Icyo ibyamamare bitandukanye byavuze ku isezera rya Perezida Obama

Yanditswe na Dusabimana Aimable
Kuya 12 Mutarama 2017 saa 07:49
Yasuwe :
0 0

Ibyamamare bitandukanye muri Leta Zunze Ubumwe za Amerika byagize icyo bivuga ku ijambo rya nyuma Perezida Barack Obama yavuze nk’Umukuru w’iki gihugu.

Mu mbwirwaruhame ya nyuma Perezida Obama yagejeje ku baturage ba Amerika mu Mujyi wa Chicago aho yatsindiye amatora ubugira kabiri, yashimiye abamufashije mu gihe amaze ku buyobozi, agaruka cyane ku byo igihugu cye cyagezeho ndetse n’urugendo ruri imbere rutegereje uzamusimbura.

Uburyo Perezida Obama yagaragaje imbamutima akanasuka amarira ubwo yavugaga ijambo rye rya nyuma nk’Umukuru wa Leta Zunze Ubumwe za Amerika, byatumye agarukwaho cyane mu bitangazamakuru bikomeye, benshi mu byamamare babanye na we neza na bo bagize byinshi bavuga.

Ellen DeGeneres uri mu bafite ibiganiro bikunzwe cyane muri Leta Zunze Ubumwe za Amerika ari mu babimburiye abandi gusezera kuri Perezida Obama (uyu ari mu bakunze kwibasira Donald Trump mu bihe by’amatora).

Mu butumwa yanditse kuri Twitter, Ellen yagize ati "Barack Obama ndagukunda birenze umwanya w’amagambo nabasha gushyira kuri Twitter mbisobanura."

Kerry Washington uzwi cyane muri filime y’uruhererekane yitwa ’Scandal’ we yasezeye kuri Perezida Obama akoresha amagambo yakunze gukoresha yiyamamariza kuyobora iki gihugu [Yes We Can].

Umuririmbyi Katy Perry yashimiye Barack Obama avuga ko yatanze urugero rudasanzwe kandi rwiza mu miyoborere, yongera kwibanda ku magambo yavuze mu ijambo rye rya nyuma asaba abaturage kongera gutahiriza umugozi umwe nyuma y’ubuyobozi bwe.

Drake uri mu baraperi bahagaze bwuma muri iki gihe, yanditse kuri Instagram agira ati "Nk’umunya-Canada wita Amerika igihugu cye mu gice cy’umwaka nzagendana impanuro zawe ndetse n’ibitibagirana mu ntekerezo zanjye igihe twari kumwe mu biro byawe."

Uyu muraperi yakomeje avuga ko Perezida Obama yamubereye icyerekezo. Yagaragaje ko ari mu bamushima ashize amanga. Umuririmbyi Ne-Yo we mu gihe Perezida Obama yavugaga ijambo rye rya nyuma nka Perezida wa Amerika yavuze ko atifuza ko ryarangira, na we ari mu bamusezeyeho bamugaragariza urukundo.

Madonna na we yashyize ifoto kuri Twitter ari kumwe na Perezida Obama, avuga ko ari ’Umwami mu bagabo’ yongeraho ko ’nta wundi Perezida nka we Amerika izagira.’

Ku wa 20 Mutarama 2017 nibwo Donald Trump uheruka gutorwa azarahirira kuyobora Leta Zunze Ubumwe za Amerika nka Perezida wa 45 nyuma y’imyaka 8 mu myaka ubutegetsi bufitwe na Barack Obama.

Madonna yise Obama 'Umwami mu bagabo'
Obama yafashwe n'imbamutima asuka amarira asezera ku Banyamerika
Perezida Obama muri manda ebyiri yayoboye Amerika yakunze gushyikirana n'abahanzi n'ibyamamare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza