Igor Mabano yifashishije Shaddy Boo mu ndirimbo ye nshya y’urukundo

Yanditswe na Uwiduhaye Theos
Kuya 24 Gicurasi 2019 saa 09:56
Yasuwe :
0 0

Igor Mabano uri mu bahanzi bari kuzamuka neza mu muziki, yashyize hanze indirimbo ye nshya yahuriyemo na Nel Ngabo uherutse gusinyishwa muri Kina Music, igaragaramo Shaddy Boo.

Mu kiganiro Igor Mabano yahaye IGIHE yavuze ko igitekerezo cy’iyi ndirimbo yise ‘Gake’ cyaje we na Ngabo bari muri Studio, bakumva bagomba gukora indirimbo ivuga ku bwiza bw’umunyarwandakazi.

Ati “Indirimbo yatangiye turi muri studio iza ari ukuvuga ku mukobwa w’umunyarwandakazi mushobora kuba mwahurira hanze y’igihugu cyangwa no mu gihugu ariko ukabona ari mwiza ndetse akwiye kwitwa Umunyarwandakazi.”

Yungamo ati “Iyo umubonye bwa mbere ntabwo wihutira kumuvugisha ahubwo ubanza kumenya koko ko avuga ikinyarwanda ukamwegera gake gake, bisaba kumuvugisha witonze mu muco nyarwanda, bisaba kwitwararika. Urabanza ukamureba ukamutinya.”

Mu mashusho y’iyi ndirimbo hagaragamo Shaddy Boo uri mu bagore babica bigacika ku mbuga nkoranyambaga mu Rwanda.

Itangira basa nk’abasohokeye ahantu haro abantu batandukanye, we na Igor Mabano bakajya bahuza amaso umwe yajya ashaka kwegera undi akagira amakenga y’uko ashobora guseba, nyuma bikaza kurangira begeranya bagatangira no kubyinana.

Mabano yavuze ko gukoresha Shaddy Boo ari ibintu bifite akamaro kuri we kuko ari umwe mu bakobwa bakurikiranwa cyane mu Rwanda, ndetse akaba ataramugoye kuko asanzwe akurikirana ibikorwa bye.

Ati “Shaddy Boo ni urundi rwego, ari mu bakobwa bakurikiranwa cyane. Kumugira mu mashusho y’indirimbo yanjye aba ari amahirwe. Twahujwe na Kina Music nza gusanga ari umuntu wari usanzwe akurikirana ibikorwa byanjye, ntabwo yangoye.”

‘Gake’ ni indirimbo ya gatanu kuri album ya mbere ya Igor Mabano izajya hanze mu mpera z’uyu mwaka. Amajwi yakozwe na Kina Music naho amashusho afatwa na Meddy Saleh. Amashusho amwe yafatiwe mu Rwanda andi akorerwa i Mombasa.

Igor Mabano ari kwitegura album ye ya mbere
Igor Mabano ni umwe mu bahanzi bahagaze neza muri muzika nyarwanda muri iki gihe
Igor Mabano yahuriye muri iyi ndirimbo na Nel Ngabo uherutse gusinya muri Kina Music
Igor Mabano yavuze ko gukorana na Shaddy Boo ari ikintu gikomeye
Meddy Saleh niwe wakoze amashusho y'iyi ndirimbo
Shaddy Boo agaragara mu mashusho y'iyi ndirimbo nshya ya Igor Mabano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza