Ikiganiro na Kidum: Umunyarwandakazi babyaranye, urugendo rwa muzika, kuba umudepite n’ibindi

Yanditswe na Uwiduhaye Theos
Kuya 27 Gicurasi 2019 saa 11:03
Yasuwe :
0 0

Jean Pierre Nimbona amaze kwamamara mu muziki wa Afurika y’Iburasurazuba nka Kidum Kibido, ari no mu bakuze bagifite umuvuduko wo kugendana n’ibigezweho bigatuma aba umwe mu bahora bahagaze bwuma mu muziki.

Yavuze byinshi ku buzima bwe birimo uko yashatse kuba umudepite nyina akamwangira, uko yacikirije amashuri kubera intambara, uko yatandukanye n’abagore batatu yashakanye nabo.

Kidum yatangiye gukora umuziki kuva mu 1994. Mu 1995 ajyanye indirimbo kuri radiyo bamutera utwatsi ngo ntabwo azwi, mu 1999 nibwo yashyize hanze indirimbo yise ‘Yaramenje’ yakunzwe mu buryo bukomeye ikamufungurira amayira mu muziki ikaza no kwitirirwa album ye ya mbere yashyize hanze mu 2001.

Iyi album yaje ikurikirwa n’izindi zirimo ‘Shamba’ (2003), ‘Ishano’ (2006), ‘Haturudi Nyuma’ (2010) na ‘Hali Na Mali’ (2012).

Ari mu bahanzi bafashe ibendera ry’umuziki w’i Burundi mu gihe kirenga imyaka 20, kandi agahorana umwihariko wo kutajya ava mu mitwe y’abakunda umuziki no guhora agendana na buri kiragano kimusanze mu muziki.

Uyu muhanzi umuziki we umaze gushinga imizi mu bihugu bitandukanye ariko yawutangiriye muri Kenya aho yahungiye atararangiza amashuri yisumbuye, yari ageze mu mwaka wa 12 wayo urugendo rw’amashuri ye akarucumbikira aho, akiyegurira umuziki kuko n’ubundi yari asanzwe avuza ingoma.

Kidum ubu afite imyaka 44. Amaze gutandukana n’abagore batatu ubu abana n’undi yashatse bwa kane bamaranye imyaka irindwi.

Ubwo yari mu Rwanda, IGIHE yamusuye kwa MadeBeats aho yari ari gutunganyiriza indirimbo ze nshya zirimo iye bwite n’indi azahuriramo na Bruce Melodie, aduhishurira byinshi.

Yemeza ko nta mpano ya politiki afite kuko yashatse kuba umudepite bikamwangira

IGIHE: Akazi kawe muri iki gihe kameze gate ?

Kidum: Ndi gukora indirimbo nyinshi. Zimwe ndi njye nyine izindi ndi gukorana n’abandi bahanzi. i Nairobi mpafite collabo zigera ku munani, na Kampala nshakayo indi imwe ndetse no mu Rwanda ndi gukorana na Bruce Melodie na Marina.

IGIHE: Mu gihe umaze mu muziki umaze kwandika indirimbo zingahe ?

Kidum: Maze kwandika indirimbo zirenga ijana. Igitangaje ni uko iyo ngiye kureba ibyo maze kugeraho simbibara gutyo ahubwo ndavuga nti ni bangahe maze gukora ku mitima yabo.

Abahanzi benshi bakunze kurwanira icyitwa hit, njyewe hit nazikoze kuva kera ariko si cyo nabaga nshyize imbere ahubwo ni uko nabaga nkunze ibyo nkora. Igikuru ni ukumva ubutumwa mba natanze. Indirimbo mbona abantu bazikunda, igikuru ni ukumva ubutumwa mba natanze muri izo ndirimbo.

Mfite indirimbo zimaze imyaka 20, izimaze imyaka 15 mfite n’izindi nanditse nkiri ku ishuri. Hari nk’indirimbo yitwa ‘Kundana’ nayanditse ndi mu mwaka wa Cyenda w’amashuri yisumbuye i Burundi, hanyuma nza kugerageza kuyisohora kuri radiyo ya Minisiteri y’urubyiruko banga kuyicuranga kuko nta zina nari mfite nta na kimwe nari ndi.

Hashize imyaka itandatu nagarutse n’izindi ngufu zirenze, nkora iyitwa ‘Yaramengeje’ iza izana na za zindi bari baranze. Nakoze akazi gakomeye icyo gihe ntuma urubyiruko rwinshi rwiyumva mu bihangano byanjye.

IGIHE: ‘Yaramengeje’ ni ubuhe butumwa bwihariye yari ifite bwatumye isamirwa hejuru?

Kidum: Yari ifite ubutumwa bw’akamaro muri icyo gihe cy’intambara, Abarundi bari kurwana kubera ibibazo by’amoko na politiki zitandukanye rero iyo ndirimbo yakoze akazi ko gusubiza hamwe abantu.

IGIHE: Ni irihe banga ukoresha kugira ngo uhora uri mu bahanzi bakunzwe?

Kidum: Icya mbere ukora ikintu ukunda. Ntabwo nkora ngamije gukora ahubwo mba nshaka gutanga ubutumwa buguma mu mutima wawe igihe kinini. Icya kabiri buri mwanya mba mfite ikintu cyo gushaka kumenya ibishya, kandi nkabigerageza.

Nahoranye intego yo gukora ikintu cyiza kandi kiramba mu mitima y’abantu.

IGIHE: Ni ubuhe buhamya bwihariye ufite bwaturutse ku ndirimbo zawe ?

Kidum: Nkiririmba ikirundi abantu benshi byarabagoraga kumenya icyo mvuga ariko ubu barabitahuye. Urugero naguha ni igihe nasohoraga ‘Shamba’ niyo nanditse ndi kugerageza kuvuga imvugo imwe ariko irimo izindi eshatu, nakoreshaga imvugo imwe indirimbo iririmbye neza ariko ngatanga ubutumwa mu mvugo eshatu.

Hari nk’aho mvuga nti nkiri muto nari nziko mu migani ko ibikoko akazi kabyo ari ukuryana ariko bakatubwira muri iyi migani ko byavugaga maze gukura namenye ko bya bikoko batubwira mu migani ari ‘Abarundi’ kuko ufite imbaraga arya undi utazifite. Nari ndi gutanga ubutumwa bw’amahoro.

Hanyuma ku zijyanye n’urukundo, izo naririmbye mvuga nti ‘icyampa namira nkeri mu maraso yawe, nkica virusi zose zirimo zituma utanyizera.’ Iyo bayita imvugo ngereranyo ariko uba ufite ubutumwa uri gutanga.

Rero hari abana bavutse kubera izo ndirimbo, hari abakoze ubukwe kubera izo ndirimbo… nk’ubu i Nairobi hari ahantu ncuranga, mpamaze imyaka 20 buri wa Gatanu. Abantu bakoze ubukwe mburirimbamo, abana baravuka ubu nibo basigaye bankurikira, nibo usanga bicaye bari gusoma byeri bari kumva indirimbo z’umusaza. Ugomba gukunda icyo ukora. Njye nabitangiye ndi muto.

IGIHE: Ujya uteganya kuzahagarika umuziki mu masaziro yawe ?

Kidum: Burya njye ntinya kuvuga ibintu by’ejo hazaza ntarahagera, ariko igihe nikigera nkumva bitakindimo nzabivamo ntangire guhinga no korora.

IGIHE: Ni ibihe bintu byaguciye intege mu muziki?

Kidum: Umuziki uca intege cyane. Ni ikintu kirimo ishyari cyane. Hari aho byageze n’abafana babijyamo, ab’uyu cyangwa uriya hari n’ibigezweho aho usanga abanyamakuru barabaye aba-manager kuko aziko ari ijwi ry’abahanzi, ugasanga yatangiye kureba amakosa atajyanye n’akazi.

Ikintu cyangoye ni uguhindura umuziki ubucuruzi, kandi twese ntabwo dufite impano yo gukora ubwo bucuruzi ahubwo turi abahanzi.

Usanga noneho utakiririmba usigaye mu byo gushabika, abagukunze kubera uko uririmba bagatangira gutakaza wa mwimerere wawe bagukundiye, nawe ukavuga uti sinarara ubusa ngo ndimo ndashaka gukundwa gusa.

Hari ababishoboye nabo byananiye ariko bagikomeje kuririmba. Umwanya umwe ndifuza ko bisubira nka mbere aho turirimbira abantu kubera ko dushaka gutanga ubutumwa.

IGIHE: Icyo kintu wari uvuze cyo kuva mu muziki utanga ubutumwa ukinjira mu bucuruzi wabitangiye ryari ?

Kidum: Igitangaje njye ntabwo ndabyinjiramo kuko nta kintu cyambabaza nko kumva umuntu ambwira ngo nsigaye ndirimba nabi, najya ku igorofa nkasimbuka nkagwa hasi (ariko ibyo simbyifuza).

IGIHE: Ko wavukiye mu Burundi muri Kenya wahageze ute ?

Kidum: Ni ibibazo by’intambara yo mu 1993, 1994 no mu 1995.

Ariko mu 1993 no mu 1994 nabaga mu Burundi niga mu 1995 njya no kwiga ku ishuri mbayo, ariko muri uwo mwaka nenda gusoza kwiga ndi mu mwaka wa 12 w’amashuri yisumbuye birananira.

Icyo gihe byasabaga ko umuntu ajya mu ruhande rwa leta cyangwa se urw’abayirwanyaga rero buriya iyo bigeze ku bintu by’intambara ntabwo si buri wese waremye atyo.

Na hano hari ushobora kubona intambara itangiye agasohoka gake gake akigendera, hakaba n’abandi bavuga bati njye ndabijyamo, njyewe rero nahisemo kujya mu muziki.

Nagiye muri Kenya ntangira kurwana no kubaho mfite imyaka 21, icyo gihe nibwo natangiye kuvuza ingoma, ntangira kubona ko nshobora kwishyura inzu, ntangira kumenya ubuzima bwo hanze utari kumwe na Papa wawe , ntangira kwitunga… ibyinshi nabyiyigishije ndi njye nyine bishatse kuvuga ko nagiye ngwa kenshi nongera mbyuka ibindi mbyigishwa n’Isi, ndi muri Kenya ni nabwo namenye agaciro k’umuntu.

Muri Kenya bafite amoko 42, buri bwoko bufite ubutaka. Iwacu nari mvuye mu gihugu aho bareba uburebure, amazuru bikaba ikibazo umuntu akahasiga ubuzima. Ntangira kureba agaciro ko kubana, ndafunguka mu mutwe.

Binyinjiramo nza kuvuga nti ngomba gutangira kwiga kwigisha abantu. Nabaye muri Kenya nigirayo byinshi ndetse no kubana n’umugore mbyiyigishiriza aho, nyuma data yaje gupfa mbura n’uko njya kumushyingura. Byose ndabizi, gukundwa no kudakundwa ndetse no kugira amafaranga no kutayagira.

Natangiye kwisunika mu gukora ibintu bitera benshi imbaraga wabona umuntu ntugire kwibaza ngo uyu ni umuki ? ahubwo ukabona ko yirabura n’amaraso ye asa nk’ayanjye.

Abantu batangiye kumbwira ko mfite ijwi ryiza, ngenda mbika amafaranga, birakunda indirimbo yanjye nashyize hanze irakundwa cyane no mu Rwanda.

Narakomeje ndakundwa, nshyira hanze izindi zirimo ‘Intimba’ na ‘Muri Serumu’. Mu Rwanda nahakoreye igitaramo byari bikomeye cyane cyabereye kuri ‘French Cultural Center’ yari yuzuye ntarava ku kibuga cy’indege.

Icyo gihe nari mfite imyaka 29 ni nabwo banzaniye umwana wanjye wa mbere nari narabyariye i Burundi mfite imyaka 20, agahora ambaririza. Nabonaniye nawe muri icyo gitaramo. Mbere yabonaga umurundi uje mu Rwanda akamubaza ati ni wowe papa? Wari umunezero uvanze n’amarira.

IGIHE: Hari aho wavuze ko wagiye muri Kenya utarasoza ishuri, waje kurisoza gute ?

Kidum: Ntaryo ndasoza kugeza uyu munsi.
Wari uzi ko bansabye ko njya kubwira abanyeshuri biga muri Kaminuza ya Boston ntinya ibyongereza by’abanyamerika mbabwira ko ntiteguye ariko bari babonye ko nshoboye.

N’Icyongereza nzi uyu munsi nakiyigishije mu byumweru birindwi kuri koleji yo muri Kenya maze kukimenya mpagarikira aho, ndavuga nti ibi birahagije.

IGIHE: Uwo mwana bakuzaniye wari uvuzeho ibye bimeze bite ?

Kidum: Yavukiye i Burundi ariko nyina ni Umunyarwandakazi w’i Burundi rero ubwo mu Rwanda amahoro yagarukaga bahise bataha akurira inaha. Yavukiye mu Burundi akurira mu Rwanda.

IGIHE: Akura atakuzi ?

Kidum: Ntabwo yari anzi ariko natangiye kuririmba nca ku maradiyo cyane nyina amubwira ko arinjye se.

IGIHE: Tuje mu buzima busanzwe, ubona ari iki gisenya ingo muri iki gihe ?

Kidum: Abantu bafite ubwisanzure, haje iterambere mbere na mbere nasanze umwanzi wa mbere w’ingo ari amatelefoni, ni byiza kuzigira ariko umuntu ufite umugore ufashe telefoni ye ukarebamo usanga nta zina ry’umukobwa ririmo ariko aba abafite. No ku bagore ni uko rero.

Mu Kirundi turavuga ngo akari mu ihene ni nako kari mu ntama, bishatse kuvuga ko ibyo ubona ku bagabo ari nabyo biri ku bagore.

Hanyuma n’ubwigenge n’ibigeragezo birimo gushaka cyane ibintu n’amafaranga n’iby’abantu.

Umuntu aba ashaka kuryamana n’abantu bose, umugabo akabona ko afite amafaranga akavuga ati mfite uburenganzira bwo kugira abagore bose nshaka.

Ikindi ni amaso, iyo uri umugabo ugatangira gukanura cyane ubona abakobwa benshi beza cyane, ukabona uko Imana iri kubarema ubu bitandukanye n’uko yabaremaga kera amaso akagutera ingorane agatumanaho n’ubwonko ugatangira kugira ingorane.

N’abagore nabo bibaho, nabo batangira kubona abasore bateruye ibyuma, abapfubuzi n’ibindi nk’ibyo.

Ndetse unababajije wasanga birata ko bari barapfubye bwa bwisanzure bugatuma umugore avuga ati mfite ubwigenge bwo gushaka umupfubuzi.

Aho rero hahita haza ikibazo, erega nanjye byagiye bimbaho kenshi ntabwo ndi kwigisha abantu ndi kuvuga ibyo nagiye mbona. Ubwisanzure, umurengwe, ubukene, kudakora imibonano mpuzabitsina n’ibindi.

IGIHE: Wowe kugira ngo utandukane n’abagore batatu byatewe n’iki ?

Kidum: Urabizi gutandukana cyangwa gushakana… ibyo ni ibintu bituranye cyane, abantu barabana ukabona ubukwe, ahubwo nashatse kwibaza iyo umuntu ari gupanga ubukwe haba hari imbaga nyinshi iri kubutegura ariko iyo bagiye gutandukana usanga bose bakwepye.

Mutumvikanye muratandukana, mwumvikanye murabana, mwubahana murabana, mucana inyuma ntimubana…. Hari ibindi bikorwa n’Imana pe, ntabwo navuga ngo biterwa n’iki nanjye mbona byabaye.

IGIHE: Uwo uheruka kutwereka mu gitaramo cya Rwanda Konnect Gala cyabaye umwaka ushize mumaranye igihe kingana gute ?

Kidum: Uriya tumaranye imyaka umunani tubanye imyaka irindwi.

IGIHE: Umugambi wawe wo kuba umudepite warangiye ute ?

Kidum: Mu 2005 haba amatora ya mbere nyuma y’intambara nibwo nashatse kuba umudepite mbona nta muhamagaro wa politiki mfite.

Iyo ukunzwe ushobora kwibaza ko byose ubishoboye ariko hari ibintu bikorwa kubera ubifitiye umuhamagaro. Reka nce amazimwe hano nta muhamagaro wa politiki mfite n’uwo kuba umucuruzi ntawo mfite, icyo mbashije ni ukuririmba.

Kidum ari kumwe n'umugore yashatse nyuma yo gutandukana n'abandi batatu, bamaranye imyaka irindwi

IGIHE: Icyo gihe byarangiye gute ?

Kidum: Ibaze wisanze uri kuyobora inama uri kuvuga imbere y’abantu nyoko akaba ariwe ukurwanya imbere y’abantu, wabishobora ?

Akavuga ngo urimo kubeshya, wowe uri kuvuga amateka y’igihugu, ukavuga uti mu 1965 byagenze gutya … sinari nakavutse ni porogaramu y’ishyaka bampaye ngo mvuge ntigeze niga no mu ishuri, uwa mbere uri kundwanya akaba mama ari imbere avuga ati va aho reka kubeshya abantu. Si iby’iwanjye. Si umuhamagaro wanjye.

IGIHE: Mu minsi ishize byavuzwe ko warozwe…

Kidum: Ni ibintu bisanzwe. Mu kazi kacu niko bimeze. Abanzi ni benshi, hari umuntu undeba akavuga ati iki kigabo ni kimvireho. Ndamwanga kubi. Hakaba n’undi uvuga uti uyu muntu avugira uruhande kanaka kubera ko icyo gihe navuze ibitaramushimishije turangizanye nawe.

Hakaba n’abandi bavuga bati uyu mugabo no kumureba ahora agenda aho tudashaka, urumva ni ibibazo byinshi cyane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza