Ikiganiro na Knowless: Yavuze ku muryango we, ruswa y’igitsina, Safi, ibitazwi mu muziki we n’ibindi

Yanditswe na Uwiduhaye Theos
Kuya 22 Gicurasi 2019 saa 12:41
Yasuwe :
0 0

Ingabire Jeanne [Butera Knowless] ni umwe mu bahanzikazi bafite izina rikomeye mu Rwanda, niwe wenyine mu b’igitsinagore ufite ibigwi byo kuba abitse igikombe cya Primus Guma Guma Super Star yatwaye ubwo yabaga ku nshuro yayo ya gatanu.

Uretse ibyo niwe wenyine mu bagore bo mu kiragano cye ufite album nyinshi, cyane ko amaze gushyira hanze enye ubu akaba ari kwitegura gushyira hanze iya gatanu mu mpera z’uyu mwaka.

Amaze kubaka ibigwi bikomeye ku buryo hari benshi abera urugero mu muziki, ndetse na benshi mu bahanzi bagize amahirwe yo gukorana indirimbo nta kabuza bamenyekana kurushaho.

Tutagiye kure wareba indirimbo aherutse guhuriramo na Passy wahoze muri TNP igatuma yongera kuza ku ikarita ibarizwaho abahanzi mu muziki nyarwanda, hari n’izindi ku buryo uwavuga ibigwi bye ntiyabirangiza.

Butera Knowless ni umwe mu bamaze kungukirwa bikomeye n’umuziki kuko yiyishyuriye amashuri ya kaminuza ndetse mu 2017 yahawe Impamyabumenyi mu Ishami ry’ubukungu muri Kaminuza yigenga ya Kigali n’ibindi bikorwa byinshi atifuza gushyira mu itangazamakuru.

IGIHE yamusuye kuri Kina Music, inzu itunganya umuziki we, imuganiriza byinshi byerekeye ubuzima bwe busanzwe n’ubw’umuziki.

Butera Knowless ni umwe mu bagore bamaze kwandika izina rikomeye muri muzika nyarwanda

Ikiganiro kirambuye twagiranye

IGIHE: Muri iyi minsi uhugiye mu biki ?

Butera Knowless: Muri iyi minsi mpugiye n’ubundi mu bintu bijyanye n’akazi kanjye, bijyanye n’umuziki. Mfite indirimbo nyinshi zigomba gusohoka muri uyu mwaka n’amashusho yazo n’ibindi bitandukanye ndetse no gukora kuri album yanjye ya gatanu.

IGIHE: Album yawe izaba iriho indirimbo zingahe ?

Butera Knowless: Izaba iriho indirimbo ziri hagati ya 10 na 12 ariko kugeza ubu ntabwo ndafata izina ryayo, ariko nzajya kuyirangiza naramaze kuribona.

IGIHE: Album yawe iheruka yitwaga ‘Queens’, iyo ugiye guha izina album ugendera kuki ?

Butera Knowless: Iyo ugiye guha izina album ugendera ku bintu byinshi, hari igihe uyita izina ugendeye ku ndirimbo ufite, ukaba wumva iyo ndirimbo ariyo ikwiriye kuyitirirwa cyangwa bigaterwa n’amagambo ufite muri wowe wumva yakwitirirwa album yawe.

Kuri Queens, iyo ndirimbo ndayifite yitwa East Africa Queens, numvaga nshaka gutera imbaraga abakobwa bo muri Afurika y’Iburasurazuba. Numvaga nshaka kuyihuza n’uburyo numva natera imbaraga abakobwa cyangwa abagore.

IGIHE: Uvuze kuri ‘Queens’ unyibutsa ko hari indirimbo zimwe zirimo iyitwa ‘Fall in Love’ wahuriyemo na Davy Ranks, East African Queens yawe na A.Y, ‘Vuga Oya’, ‘Ukimpata’ na ‘Ntakuwepo’ utigeze ushyira hanze. Byatewe n’iki?

Butera Knowless: Kuri album indirimbo zose ziba ziriho hagati ya 10 na 12 akenshi ziba ziri kuri album zitandukanye, rero hari igihe zimwe na zimwe zidahita zijya hanze ahubwo uziguze akazumva izindi ukagenda uzishyira hanze gahoro gahoro.

Rero izo zose zirahari gusa twarangije gushyira hanze album nk’umuhanzi tukirangiza album nagiye ngira izindi ndirimbo nyinshi numva nashyira hanze ariko zirahari.

IGIHE: Ni iyihe album yawe ikurutira izindi?
Butera Knowless: Biragoye! Ariko iyitwa ‘Butera’ nashyize hanze ari iya gatatu kubera ko nayikoze nshaka guha icyubahiro umuryango wanjye kugira ngo igihe icyo cyose nzaba ntahari ibihangano biriho bizahoreho, nayitiriye umuryango kugira ngo njye numva ko hari agaciro nabahaye.

IGIHE: Ni ryari wari ugiye gusohora indirimbo, ugahita ugira igitekerezo bintunguranye cyo gushyira hanze indi ?

Butera Knowless: Akenshi njye bimbaho. Hari igihe ndangiza indirimbo nkahita ngiro ibyiyumviro by’indi. Ariko iya mbere ni ‘Ujya Unkumbura’ kubera ko nagiye muri studio ndangije kuyikora mpita numva igomba guhita ijya hanze.

Mu mpera za 2016 abakunzi banjye bigeze kujya banyandikira ngo barankumbuye, sinzi ukuntu nagiye muri studio ntangira gutekereza abantu birirwa banyandikira bambwira ngo ariko wowe ntabwo ujya udukumbura mpita njya muri uwo mwuka gutyo. Indirimbo iza ityo.

IGIHE: Uretse ‘Ujya Unkumbura’ ni iyihe ndirimbo yindi yawe yavuye mu bitekerezo by’abafana?

Butera Knowless: Hari indi yitwa ‘Urugero’, nanditse ku mbuga nkoranyambaga zanjye mbabaza ikintu bumva nazakurikizaho mu ndirimbo zanjye nifuzaga kuba nagendera ku byifuzo byabo.

80 % by’ibitekerezo byansabaga gukora indirimbo y’urukundo ariko iganisha ku bukwe nibwo nahise mpura na Danny Vumbi nsohoza isezerano.

Na ‘Yuda’ byabaye gutyo mu bindi bitekerezo abantu baje bansaba kuba nakora indi ndirimbo ivuga ku buzima busanzwe mpita bihurirana n’uko nari nyifite mpita nyishyira hanze ntyo. Navuga ko nka 60 % Yuda yagiye hanze kubera ibitekerezo byabo.

IGIHE: Ni utuhe tuntu ujya wibuka ugitangira mu umuziki wakoze ukumva biragusekeje?

Butera Knowless: Ibyo nibuka mu muziki, icya mbere nagiraga isoni nyinshi cyane. Iyo najyaga gufata amajwi y’indirimbo buri muntu wese yahitaga asohoka kandi bakazimya amatara yaho mpagaze.

Ikindi kugira ngo njye ku rubyiniro byabaga ari ibintu bigoye cyane nkumva mfite igihunga, ikindi kuri camera ngiye gufata amashusho y’indirimbo byabaga ari intambara kubera abantu benshi babaga bahari, njye ku bwanjye numvaga nasigarana n’uri gufata amashusho kandi ari ibintu bidashoboka. Byarangoraga cyane mu ifatwa ry’amashusho.

IGIHE: Muri video ya ‘Ninkureka Ukagenda’ Tom Close aba ari umugabo wawe ujya ku rugamba agapfirayo, igitangaje ni uko agaruka mu baje gushyingura umurambo we?

Butera Knowless: Muri ‘Ninkureka Ukagenda’ abantu benshi muri iriya video bagize ngo Tom Close arapfa akagaruka mu basirikare baje gushyingura bateruye umurambo we, ariko siko biri kuko ntabwo yari gupfa na none agaruke ari mu bateruye umurambo. Harimo undi musore bitiranyije na Tom Close wari uri mu bariya bakinnye ari ingabo.

IGIHE Muri iki gihe ubona umuziki w’abagore uhagaze ute ?

Butera Knowless: Ugahaze neza usanga abakobwa bagerageza kwitinyuka. Hari abana benshi bifuza kugera ku rwego rukomeye, n’ubwo bataragera ku kigero cy’abagabo ariko ntabwo ari bibi cyane.

IGIHE: Hari abavuga ko kuba igitsinagore ari gike mu muziki biterwa no kuba bakwa ruswa y’igitsina. Nibyo?

Butera Knowless: Ibintu byo kuba hari abahanzikazi cyangwa se abakobwa muri rusange bashobora gucibwa intege n’ibintu babona mu muziki batangiye bikaba byabaca intege birimo na ruswa ishingiye ku gitsina nanjye narabyumvise ariko rero nta buhamya mbifitiye kuko ntibyambayeho ariko hari abandi numvise byabayeho.

Umuntu waba inzitizi ku wundi kubera gushaka kumusambanya ntabwo ari ubumuntu kandi umuntu wese yacibwa intege nabyo gusa na none burya ikintu cya mbere gishobora gutuma ubitsinda ni ukuvuga ‘Oya’ mu gihe gikwiriye, itavuguruzwa.

IGIHE: Kuva mu Ruhango kugera i Kigali, ushobora kutuganiriza ku rugendo rwawe muri muzika ?

Butera Knowless: Ubundi ukuntu natangiye umuziki, nararirimbaga kuva kera, nari umuyobozi w’abana mu ishuri ryo ku rusengero nabaga ndi mu batoranyijwe na mwarimu. Ndi n’akana gato gafite imyaka ibiri najyaga ndirimba ndi imbere ya mama wanjye.

Nari mfite inzozi zo kuzaba umuhanzi uririmba ku giti cye nkajya muri studio, inshuro numva nabonye zo kujya muri studio twabaga turi abantu benshi. Nari mfite inzozi zo gukora indirimbo nkumva ijwi ryanjye njye nyine mu ndirimbo.

IGIHE: Indirimbo yawe ya mbere wakoze yitwaga gute? Mwayikoze ryari ?

Butera Knowless: Nabitangiye niga mu mashuri yisumbuye ubwo nigaga muri APACE, abantu benshi bayumvishe bakambwira ko nakoze indirimbo nziza.

Hari umuhungu witwaga Young Junior we yari amaze kumenyekana ayumvishe ashaka ko dukorana babimbwiye mpita numva biranshimishije cyane ko yari umuririmbyi usanzwe abimenyereye turakorana.

Natangiye kugira inzozi zo kuba umuhanzi ntangiye kwigira hejuru ariko nkiri umwana numvaga ari ibintu bigarukira mu rusengero.

Nkora indirimbo ya mbere nari mfite imyaka 18, nigaga mu mwaka wa gatandatu. Ntabwo nigeze nyishyura ni Junior wayikoze, njya muri studio ntabwo twari tuziranye hari abandi nagiye mperekeje yumva bavuga ko nanjye ndi umuririmbyi ampa beat ansaba kuzayiririmbamo. Umunsi wakurikiyeho nasubiyeyo arinjye ugiye gukora.

IGIHE: Iyo ndirimbo ijya hanze abo mwaririmbanaga ndetse n’abanyeshuri bagenzi bawe babyakiriye bate ?

Butera Knowless: Bamaze kumva indirimbo yanjye baratunguwe kuko nari umuntu usanzwe acecetse. Haba mu bo twaririmbanaga, abo twiganaga ndetse n’abandi babyumvishe ntabwo babyiyumvishaka baravugaga ngo baduhinduriye ntabwo Kabebe yabasha gukora ibintu nk’ibi.

Iyo ndirimbo yitwaga ‘Nyumva’.

IGIHE: Abakurera bo babimenye babyakiriye bate?

Butera Knowless: Ntabwo babyiyumvishaga ariko barandetse kuko bazi ko iyo niyemeje ikintu ntajya mva ku izima.

IGIHE: Ujya bwa mbere ku rubyiniro byari ryari?

Butera Knowless: Navuga ko bwa mbere nagiye ku rubyiniro ubwo Meddy yamurikaga album ye ya mbere mu 2009, ntabwo iyo ndirimbo yanjye nababwiye yari yagasohotse ariko Young Junior icyo gihe yaransabye cyane ati uze kuza turirimbe ya ndirimbo.

Ndavuga nti indirimbo itarasohoka nta muntu n’umwe uyizi, biragenda gute? Yarampumurije ambwira ko araba yaririmbye ize ndetse akanabwira abantu uwo ndiwe akananyerekana nk’umuhanzi mushya.

Mana yanjye byari ibintu bidasanzwe! Nari mfite ubwoba bwinshi cyane, nibazaga umuntu uri bumbone uko arabyumva. Hari mu kiruhuko gikuru, nshyiramo amataratara ngo hatagira umuntu umenya ko arinjye.

IGIHE: Amafaranga yawe ya mbere wakoreye yari angahe?

Butera Knowless: Igitaramo nakoreyemo amafaranga bwa mbere byari ibihumbi 80 Frw, icyo gihe ntabwo nari ndi kumwe na Young Junior sinzi niba yaranyitangiye aho batwishyuye yose akayampa gusa niyo nabonye. Ntabwo nibuka neza gusa byari mu gitaramo twakoreye mu ntara nabwo muri icyo gihe nkitangira umuziki.

IGIHE: Ni iyihe ndirimbo wandikanye agahinda? Ni ukubera iki ?

Butera Knowless: Indirimbo numva nanditse mfite agahinda nivugaho ni ‘Sinzakwibagirwa’ nayikoreye ababyeyi banjye ariko nashakaga ko n’undi muntu ufite undi muntu yibuka yajya imufasha.

IGIHE: Inganzo yawe iza ite ?

Butera Knowless: Inganzo yanjye ukuntu iza, biba bitewe n’ibintu bitandukanye, nshobora kuryama nijoro nta bitotsi nkumva hari ibintu binjemo nabyazamo indirimbo, nshobora kuba ndi kugenda mu muhanda nkahura n’ikintu kikampa amagambo navugaho, kuba nahuza ubuzima nagiye mbona ku bantu batandukanye ndetse no kujya muri studio nkaba nakumva beat nkafatiraho ari nabyo bikunze kubaho.

IGIHE: Hari indirimbo zimwe wagiye uririmbamo abantu bakavuga ko wateranaga amagambo na Safi, zirimo ‘Wari urihe’ ndetse na ‘Vuba Vuba’ , wabivugaho iki ?

Butera Knowless: Nta ndirimbo n’imwe nigeze nkora ndi guterana amagambo n’umuntu, iyo ndirimbo ‘Vuba Vuba’ njya kuyirimba ntabwo nari numvise amagambo ya Safi kuko nagiye muri studio ndi kumwe na Christopher yamara kuririmba nanjye nkaririmba ariwe nsubiza.

Mu kurangiza indirimbo nibwo bahuje igitero cyanjye ni icya Safi, numvise indirimbo numva icyanjye gikurikirana nicye urumva umuntu wese wayumvise biroroshye gukurikiza amarangamutima ye.

Abantu bamwe bumvise ko ari ugusubizanya. Nta ndirimbo n’imwe naririmba nsubiza umuntu ntibibaho gusa umuntu ashobora kubifata uko ashaka agendeye ku mateka akaba yabihuza.

‘Wari uri he’ yo hari hari beat; nashakaga kwandika indirimbo y’urukundo numvise iyo beat nandika nibaza ukuntu ushobora guhura n’umuntu ukibaza uti kuki duhuye ubu, kuki ntakubonye kera, ntakumenye kera, kuki ntakumenye mbere? Ni ibintu bibaho mu buzima nta hantu byari bihuriye n’umuntu uwo ariwe wese.

IGIHE: Ubundi mu ntangiro za buri mwaka mwajyaga mu biruhuko mu Bwongereza, uyu mwaka byagenze bite ko mutagiyeyo?

Butera Knowless: Mu ntangiro z’umwaka akenshi akazi ntabwo kaba ari kenshi. Niwo mwanya twabonaga tukaba twajya mu Bwongereza, ariko muri uyu mwaka nari mfite ngomba kwitegura n’umutima wanjye wose cyari kiri muri Gashyantare, nagombaga gufata umwanya nitegura kuva mu Ugushyingo 2018.

Nyuma yacyo hari ibindi bitandukanye kuko kuva muri Mutarama kugeza muri Mata 2019 nari mfite ibindi bitaramo bitandukanye, mu ntangiro z’umwaka nari mfite akazi kenshi bituma tutajya muri icyo kiruhuko.

IGIHE: Mu minsi ishize Clement yatubwiye ko wamukundishije kurya imyubati, wowe ni ikihe kintu yagukundishije ?

Butera Knowless: Hari isosi akunda y’amagi ntabwo nari nyimenyereye natangiye kuyikunda tubanye.

Butera Knowless afite umuhigo wo kuba ariwe mukobwa wenyine wabashije kwegukana irushanwa rya Primus Guma Guma Super Star mu myaka umunani ryamaze

IGIHE: Ni inde wazanye igitekerezo cyo kwita umwana wanyu Ishimwe Butera Or ?

Butera Knowless: Twese twabifatiye hamwe, iryo zina twari turifite mbere rya Or, ikindi twumvaga dushaka ko agumana amazina y’umuryango yaba uwanjye n’uwa Clement ku buryo buri gihe azaba ikimenyetso cy’umuryango.

Ikintu gitangaje nta n’ubwo twigeze tugenda ngo dushake amazina cyane, byahise byikora. Clement niwe wabanje kuvuga ngo uyu mwana mba numva ari ‘Or’ nanjye numva kararyoshye cyane, hanyuma rero ibya Ishimwe Butera ni ibintu twari twaravuze ko agomba gufata amazina y’ababyeyi bose.

IGIHE: Ubu arangana ate?

Butera Knowless: Or afite imyaka ibiri n’amezi make azi kuvuga ibintu byose ariruka ni umwana ushimishije. Iyo murebye mbona urukundo rw’Imana. Burya kubona umwana ari uruhinja, hari igihe ureba umwana ukavuga uti uyu mwana hari igihe kizagera njye mvuga anyumve? Hari igihe se kizagera akicara ? Hari igihe azagenda ? ibyo byose agenda acamo bihita bikwereka urukundo rw’Imana, biguha urukundo rurenze.

IGIHE: Mu bihe agezemo hari ibimenyetso by’impano yari yatangira kugaragaza ?

Butera Knowless: Ubu biracyivanze, ntabwo navuga ngo afite impano iyi cyangwa iyi, ariko uko azagenda akura tuzagenda tumenya impano afite. Akunda ibintu bitandukanye birimo umuziki, gushushanya ndetse no gukina umupira, ubu navuga ko bikivanze.

IGIHE: Ni iyihe ndirimbo yawe akunda cyane ?

Butera Knowless: Biterwa n’igihe, mu minsi ishize muri laptop yanjye hari harimo amashusho y’indirimbo ya ‘Yuda’ iyo yajyaga kureba imikino y’abana kuri internet yabanzaga kubona aya mashusho byatumye imuzamo cyane ariko n’izindi arazizi.

IGIHE: Kuki utacyambara impeta ?

Butera Knowless: Nta kintu kidasanzwe cyabaye. Ntabwo kugira ngo ubone mu rugo tumeze neza ari ikimenyetso wabona ku maso icya mbere ni ku mutima. Ikintu cya mbere cyubaka urugo rugakomera ni imitima yacu. Impeta rero ejo n’ejo bundi mwazibona ariko ntabwo aricyo kintu gikomeye cyakwerekana ko umubano umeze neza.

Twagiye kuzongeza ntabwo ziraza, kuba zitaraza nta kintu bidutwaye.

IGIHE: Mubasha gutandukanya gute kuba mwarashakanye nk’umugabo n’umugore, n’akazi ?

Butera Knowless: Mu kazi tuba tumeze nk’umukozi n’umukoresha, iyo tugeze mu kazi mba nzi ibyo ngomba gukora, ibindi byo kuba umuryango biba byigiyeyo ni uko twabanye kuva kera. Nta kintu na kimwe kitubangamira kijyanye no kuba ndi umuririmbyi Clement akaba manager wanjye no kuba twarashakanye biba bitandukanye, mu rugo ho tuba turi umuryango.

Reba ‘Day to Day’ indirimbo Butera Knowless aheruka gushyira hanze

Knowless na Ishimwe Clement mu kazi baba ari umukozi n'umukoresha mu rugo bakaba umuryango
N'ubwo ari umubyeyi ku rubyiniro ntiwarabukwa
Umwana wa Butera Knowless na Clement amaze kumenya ibintu byinshi
Umwana wa Knowless yamwerekanye amaze amezi atanu avutse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza