Ikirezi, umukobwa wa Masamba ari mu bahanzi bahataniye Ottawa Idol -Video

Yanditswe na Munyengabe Murungi Sabin
Kuya 11 Nzeri 2017 saa 10:43
Yasuwe :
1 0

Ikirezi Annaiis Déborah umwana wa Masamba Intore ari mu bahatanye mu cyiciro cya nyuma cy’irushanwa rya Ottawa Idol rihuza abahanzi bakibyiruka bafite ubuhanga bwihariye.

Ikirezi Déborah w’imyaka 21 asanzwe atuye mu Mujyi wa Ottawa muri Canada, ni umunyempano mu kuririmba ndetse byashimangiwe n’amajonjora yanyuzemo bashakisha abahanzi bitabira Ottawa Idol umwaka wa 2017.

Ottawa Idol ni irushanwa rikomeye muri Canada, risanzwe rihuza abahanzi bakiri bato guhera ku myaka 13 kugeza kuri 21 mu kubafasha kurushaho kuzamura impano no kwigeragaza byisumbuyeho.

Abaritsinze mu myaka yashize bagiye bahabwa amahirwe yo gukorerwa indirimbo n’inzu zikomeye muri Canada no muri Amerika ndetse bagahabwa umwanya uhagije [wishyurwa n’abaritegura] bagacurangwa kuri Radio na Televiziyo zikomeye muri iki gihugu.

Iri rushanwa rimaze imyaka 14 ribera muri Canada, iry’uyu mwaka ryatangiye muri Nyakanga 2017. Mu majonjora yabereye ahitwa St. Laurent Centre muri Kanama, Ikirezi yatoranyijwe mu bana 26 bagomba kuzavamo utwara igihembo gikuru.

Muri iri rushanwa buri mwana ahitamo indirimbo eshanu azi kuririmba neza, izi nizo yifashisha kuva ku munsi wa mbere mu byiciro byose irushanwa ricamo hashakishwa uwahize abandi.

Ku mugoroba wo kuri uyu wa 10 Nzeri 2017, Ikirezi Déborah na bagenzi be bahatanye mu cyiciro kibanziriza icya nyuma hashakishwa abahanga kurusha abandi. Yabonetse muri 12 bagomba kuzatoranywamo umwe kuri finale.

Masamba wagaragaje ko atewe ishema n’uyu mukobwa we, aheruka gutangariza IGIHE ko ko Ikirezi afite impano idasanzwe mu kuririmba ndetse ngo ijwi rye n’ubuhanga afite nta wabyemera ataramubona aririmba.

Ikirezi aheruka kuza mu Rwanda gusura se muri Kamena 2014, icyo gihe yazanye na murumuna we Mucyo Alvain. Ikirezi Déborah yanaririmbye mu gitaramo Gakondo Group yakoreye mu kigo Agahozo Shalom Youth Village mu gikorwa cyitabiriwe na Madamu Jeannette Kagame.

Abegukanye Ottawa Idol mu myaka 14 ishize:

- 2004 Nadia Mayer (Rockland, ON)
- 2005 Gabrielle Giguere (Glebe)
- 2006 Sarite Harris (Alta Vista)
- 2007 Kelcie Brown (Greely)
- 2008 Régine McCamus (Aylmer, Quebec)
- 2009 Angela Rozman (Orleans)
- 2010 Amanda Nantsios (Barrhaven)
- 2011 Jordan McIntosh (Carleton Place)
- 2012 Ally Maheral (Munster Hamlet)
- 2013 Lindsay White (Orleans)
- 2014 Bernice Reyes (Orleans)
- 2015 Stephanie (Orléans)
- 2016 Megan Francoeur

Abahanzi 12 bashakishwamo uzahabwa igihembo cya Ottawa Idol 2017
Ubwo Ikirezi na musaza we baheruka kuza mu Rwanda gusura Masamba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza