Imbamutima za Hakizimana, umuhanzi wiyemeje guhangana n’ibibazo by’intonganya mu ngo

Yanditswe na Uwiduhaye Theos
Kuya 12 Kamena 2019 saa 12:57
Yasuwe :
0 0

Umugabo witwa Hakizimana Polcarpe yarahiriye gukora ibikorwa bitandukanye bituma ingo zubatse ku misenyi zongera kubaho mu mudendezo usesuye.

Uyu muhanzi ubusanzwe afite ibihangano bitandukanye bikomoza ku bikorwa bye leta, amahoro, imibanire myiza mu ngo n’ibindi bitandukanye bituma abantu babaho mu busugire.

Asanzwe akora mu Karere ka Gakenke mu Ntara y’Amajyarugu, ashinzwe gutanga ubufasha mu by’amategeko no kurwanya ruswa n’akarengane mu mushinga w’Abanya-Norvège.

Uyu mugabo yateguye igitaramo kigamije gukangurira abaturage kubana neza no kurwanya amakimbirane mu muryango kuko akomeje kugira ingaruka zitandukanye. Kizaba tariki 14 Kamena 2019.

Yagize ati “Igitekerezo cyaturutse ku bunararibonye bw’ubuzima nabayemo, nakoze igihe kinini mu nkiko z’u Rwanda mu gihe kigera ku myaka 17, icyo gihe nahuye n’abaturage bafite ibibazo by’imibanire binsaba rero ko njye nk’umuhanzi ntera indi ntambwe nkagira undi musanzu ntanga, nicyo cyatumye ntegura iki gitaramo.”

Iki gitaramo gifite insanganyamatsiko igira iti “Umuryango wanjye, ishema ryanjye, agaciro kanjye n’ishema ryanjye.”

Kizaba kirimo umwihariko w’indirimbo zikubiyemo ubutumwa bwo kubanisha neza umuryango, kwerekana agaciro k’umubyeyi, kwerekana inshingano z’ababyeyi ku bana, kwerekana icyubahiro abana bagomba ababyeyi, kwerekana imibanire y’abaturanyi, igihugu cyiza n’ibindi.

Gukangurira abaturage bumwe mu burenganzira bafite ndetse n’amwe mu mategeko akunze kugira aho ahurira nabo kugira ngo babashe gusobanukirwa inshingano zabo mu muryango.

Hazatangwamo ubuhamya bw’umuryango wigeze kubaho mu nduru n’intugunda, werekana itandukaniro ry’uko babayeho muri icyo gihe na nyuma yo kuva mu ntonganya.

Hakizimana w’imyaka 42 avuga ko na mbere yakundaga guharanira uburenganzira bw’ikiremwamuntu ariko akaza kubona ko ibyo akora bidatuma arenganura abantu bose uko abyifuza.

Ati “Na mbere nakundaga uburenganzira bw’ikiremwamuntu nkumva ko umuntu afite agaciro kandi nkumva nagaharanira rero kujya mu rukiko numvaga nshaka umusanzu wanjye mu kurenganura abarenganye. Nyuma nasanze hari abarengana ntashobora guhura nabo batagera mu rukiko, kandi abo numva umusanzu wanjye nawushyiramo kuko kubasanga bataragera aho bahura n’amategeko numvaga aribyo byatanga umusaruro.”

Avuga ko impamvu yahisemo guhanga akuze aribwo yumvaga afite ubutumwa bukomeye yageza ku bantu b’ingeri zitandukanye mu muryango nyarwanda.

Iki gitaramo cye kizabera ahitwa mu Murenge wa Muyongwe ku kibuga cy’umupira, kwinjira bizaba ari ubuntu. Avuga ko iki gikorwa kitazarangirira mu Karere ka Gakenke ahubwo ateganya kuzazenguruka igihugu cyose.

Yatumiyemo abanyarwenya bamamaye muri filime nyarwanda nka Kanyombwa ndetse na Samusure.

Umva zimwe mu ndirimbo za Hakizimana

Uyu muhanzi yihariye ku kuba afite ubutumwa bwo kunga imiryango iri mu ntugunda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza