Induru yavuze muri Miss Burundi 2018, abakobwa 16 bakuyemo akarenge

Yanditswe na Munyengabe Murungi Sabin
Kuya 7 Nyakanga 2018 saa 12:40
Yasuwe :
0 0

Akajagari n’ibibazo uruhuri mu irushanwa ryo gutora Nyampinga w’u Burundi byatumye abakobwa hafi ya bose bari bahataniye ikamba bafata umwanzuro wo gukuramo akarenge hasigaramo umukandida umwe rukumbi.

Nyampinga mushya w’u Burundi yagombaga kuzatorwa mu birori byari biteganyijwe ku wa Gatandatu tariki ya 21 Nyakanga 2018 agasimbura Miss Nikuze Annie Bernice watowe muri Nyakanga 2017.

Abakobwa 16 muri 17 bari bahataniye ikamba rya Miss Burundi 2018 banditse ibaruwa bamenyesha Umuyobozi Mukuru wa Burundi Events itegura iri rushanwa ko barisezeyemo kubera akajagari n’ibibazo ubuyobozi bwananiwe gukemura.

Muri iyi baruwa abakobwa banditse ku wa Gatanu tariki ya 6 Nyakanga 2018, bagaragazamo imbogamizi bafite ku bihembo bizahabwa uzahiga abandi n’ibisonga bye. Aba bakobwa bashimangiye ko nta cyizere bafitiye ikigo gitegura irushanwa bashingiye ku mpinduka bijejwe rigitangizwa muri Gashyantare 2018 ariko kugeza uyu munsi akaba nta kintu na kimwe barabona.

Muri iyi baruwa hari aho bagira bati “Nyakubahwa muyobozi mukuru, ku itariki ya 28 Gashyantare 2018 ari nayo tariki irushanwa rya Miss Burundi 2018 ryatangijwe, Burundi Events itegura Miss Burundi yatangaje ko izatanga ibihembo birimo imodoka n’ubutaka bwa m2 400 n’amafaranga yagombaga gutangazwa[mu minsi iri imbere] ku bazaba ibisonga.”

“Ubwo butaka kugeza ubu ntiburagaragazwa ndetse n’amafaranga agomba kuzahembwa abakobwa bazaba ibisonga bya Nyampinga w’u Burundi 2018 ntiyatangajwe mbere y’iminsi 15 y’ibirori nyamukuru nk’uko mwabyemeye.”

Aba bakobwa bongeyeho ko “Gahunda yo gushaka amajwi biciye ku rubuga www.missburundi.be , no kubutumwa bugufi ndetse no kuzenguruka mu itangazamakuru tumenyekanisha imishinga yacu ku baturage mwabitwijeje muri Kamena, ariko kugeza uyu munsi nta na kimwe cyakozwe ndetse n’urubuga rwa Miss Burundi ntirukiba ku murongo.”

Uko ari cumi na batandatu, basinye iyi baruwa bavuga ko bahisemo gusezera mu irushanwa kuko “impinduka Burundi Events yavuze ko zizagaragara muri iri rushanwa nta n’imwe abakandida babonye”.

Aba bakobwa basezeye, mu gihe ku itariki ya 4 Nyakanga 2018, abantu barindwi barimo abigishaga abakandida ndetse n’abagize ubuyobozi bwa kompanyi itegura Miss Burundi basezeye mu buryo bwatunguranye.

Aba bakigenda, bavuze ko bajyanwe n’imikorere idahwitse y’abategura irushanwa n’akajagari kadindiza Miss Burundi 2018 ku buryo nta cyizere babonaga cy’uko umuhango wo kwambika ikamba wari kuzagenda neza.

Abakobwa 16 banditse basezera mu irushanwa hasigaramo umukandida umwe rukumbi
Aba bakobwa bari bamaze igihe batangiye umwiherero bitegura Miss Burundi 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza