Inganzo yaratabaye! Uko umukino wa Vital’O na Rayon Sports watumye Masamba aririmbira i Kigali rwihishwa

Yanditswe na Muvunyi Arsène
Kuya 5 Kamena 2019 saa 08:48
Yasuwe :
0 0

Habura ukwezi kumwe ngo Abanyarwanda bizihize ku nshuro ya 25 umunsi wo Kwihobora, hibukwa urugamba Inkotanyi zamaze imyaka ine zirwana ngo Abanyarwanda bari barahejejwe ishyanga basubire mu rwababaye, zikanahagarika Jenoside yakorewe Abatutsi.

Amahoro, iterambere n’umutekano Abanyarwanda baganjemo muri iki gihe ni imbuto zeze kuri uru rugamba rwarwanywe n’abasore n’inkumi bari bakiri bato, ariko bahuje umutima wo gukunda igihugu.

Umuhanzi mu njyana gakondo Masamba Intore ni umwe mu barwanye uru rugamba akoresha inganzo ye mu kongerera imbaraga abarwanishaga imbunda, afatanyije n’Itorero Indahemuka na Kamaliza.

Zimwe mu ndirimbo zakoreshwaga yatangiye kuzihangira i Burundi aho yari yarahungiye ndetse yaziririmbaga mu bitaramo byo gukusanya inkunga y’urugamba.

Mu kiganiro IGIHE yagiranye na Masamba Intore, yakomoje ku bihe yanyuzemo mbere y’urugamba rwo kubohora igihugu n’uburyo yari afite inyota yo gutaha.

Bimwe mu bihe atazibagirwa ni uburyo mu 1986 yahaze amagara ye akinjira mu Rwanda akurikiye ikipe ya Vital’O y’i Burundi yari igiye gukina na Rayon Sports.

Byamusabye gukora urugendo rurerure kugira ngo yinjire mu Rwanda ntawe ubimenye mu bashoboraga kumugirira nabi.

Ati “Sinagombaga guca muri Butare byari bikomeye. Nabanje kujya i Goma, urwo rugendo rwari rurerure. Nazamutse umusozi witwa Nkomo mbere y’uko ugera Bukavu, mfata imodoka ngera kuri Goma mbanza gusura marume witwa Cyoya wabaga i Goma, guca muri Gisenyi rero abantu barambwira bati ‘umuntu arambuka agasa nk’ugiye kwinywera byeri’.”

Masamba yibuka neza ko icyo gihe ikipe ya Vital’O yatsinze, bajya mu birori byo kwishimira intsinzi, arahimbarwa birangira aririmbye indirimbo zo gukumbura u Rwanda, ibintu byashoboraga no kumwicisha.

Ati “Turicara barambwira bati ‘turirimbire’. Mbaririmbira za ndirimbo zose, mbabwira nti ‘burya rero ntimwihebe hazagera aho dutaha’, ariko ngeze aho ngira ubwoba ndavuga nti ‘ubanza nkoze ishyano ariko ubutumwa bwanjye bwari bumaze gutambuka.”

Avuga ko iyo atagira umuntu w’inshuti ye wahise amujyana mu modoka akamugeza i Gisenyi, yashoboraga kudahoboka abari baramumenesheje.

Inganzo yaratabaye

Mu 1989 Masamba wari warabonye amahirwe yo kujya kwiga muri Kaminuza yo mu Busuwisi, yasanze abandi muri Uganda bifatanya mu rugamba rwo kubohora u Rwanda.

Ni umwe mu bateraga imbaraga bagenzi be bari kumwe ku rugamba bifashishije indirimbo zirimo “Kibonge, “Sisi Wenyewe”, “Haturudi Nyuma”, “Moto Utawaka”, Dukumbuye Rwanda yacu, Nzovu, Urungano Ruratashye n’izindi yari ahuriyeho n’Itorero Indahemuka.

Masamba yemeza ko “indirimbo, inganzo byagize akamaro kenshi cyane kugira ngo abantu bongere bumve ko ari Abanyarwanda, bagarure ubunyarwanda bwabo kandi bifuze gutaha harimo no kurutabarira mu rubyiruko, abafite amafaranga bakayatanga.”

Aha niho yahereye ategura igitaramo yise “Inganzo Yatarabaye” kiba mu bihe byo kwizihiza umunsi wo Kwibohora uba tariki 04 Nyakanga, aho yongera kuririmba indirimbo zo mu bihe by’urugamba.

Icy’uyu mwaka gifite umwihariko kuko yahaye inkoni mwishywa we Jules Sentore uzatarama tariki 05 Nyakanga 2019 ariko na we akazakiririmbamo. Kizabera mu ihema rya Kigali Conference and Exhibition Village [Camp Kigali].

Msamba avuga ko ari uburyo bwo gutera imbaraga abakiri bato ko bakwiye guhimba ibiganisha ku mpinduka nziza z’umuryango nyarwanda nk’uko abandi bahimbiye urugamba.

Ati “Ubu ntiduhimbira urugamba ariko sosiyete y’abanyarwanda ifite byinshi. Ni bice rero mu nganzo kugira ngo ishobore gutabara byinshi dukeneye. Ni bive kuri abo bakuru bijye no mu bato ariko bahore bumva ko koko iki gihugu atari impano, abantu baragiharaniye.”

Masamba avuga ko bishobotse mu Ukuboza uyu mwaka yazashyira hanze igitabo yise “Inganzo Yaratabaye”, gikubiyemo amateka ye yose.

Buri mwaka Masamba akora igitaramo kigaruka ku ndirimbo zo ku rugamba
Jules Sentore yeguriwe igitaramo 'Inganzo Yaratabaye'
Masamba yemeza ko inganzo yafashishije mu rugamba rwo kubohora u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza