Ingofero Michael Jackson yambaye mu myaka 30 ishize yaguzwe akayabo

Yanditswe na Philbert Girinema
Kuya 2 Mutarama 2017 saa 02:14
Yasuwe : XX
0

Nyuma y’imyaka itandatu umuririmbyi w’ikirangirire ku Isi Michael Jackson apfuye, ingofero yifashishije mu mashusho y’imwe mu ndirimbo ze yaguzwe asaga miliyoni umunani z’amafaranga y’u Rwanda.

Michael Jackson yakundaga kwambara ingofero z’umweru zo mu bwoko bw’izo bita ’Fedora’ haba mu bitaramo no mu buzima busanzwe. Iyagurishijwe yayambaye mu ndirimbo yise "Smooth Criminal" yakoze mu 1987 no muri filime yitwa Moonwalker yagaragayemo.

Ikinyamakuru 7sur7 cyatangaje ko iyi ngofero yaguzwe n’umugabo ukomoka mu Bubiligi usanzwe akusanya ibyambawe n’ibyamamare n’indi mitako ihenze igurishwa muri cyamunara hirya no hino ku Isi ayitanzeho akayabo k’ama-euro ibihumbi icumi ahwanye n’asaga miliyoni 8 mu mafaranga y’u Rwanda.

Ikigo cyitwa Catawiki cyo mu Buholandi cyagurishije iyi ngofero cyavuze ko kimwe n’ibindi bikoresho by’uyu muririmbyi w’icyamamare, yagize agaciro cyane nyuma y’urupfu rwe muri 2009, umwihariko ifite ngo ni amagambo Michael Jackson yayanditseho.

Ibikoresho bya Michael Jackson byagiye bigurwa akayabo nyuma y’aho yitabye Imana birimo n’indi ngofero yambaraga yaguzwe ibihumbi 25 by’ama-euro mu ntangiriro za 2016. Abantu batandukanye barimo n’ibyamamare ku Isi bagiye batanga akayabo ku byambawe n’uyu muririmbyi akiriho, Lady Gaga ni umwe mu batunze byinshi.

Michael Jackson yaherukaga gushyirwa ku mwanya wa mbere mu byamamare byapfuye ariko byinjije amafaranga y’umurengera mu mwaka wa 2016 ku rutonde rwasohowe n’ikinyamakuru Forbes ku wa 12 Ukwakira mu 2016. Kuva yatabaruka yagiye aza ku mwanya wa mbere uretse muri 2012 ubwo yitambitswe na Elizabeth Taylor.

Reba indirimbo Smooth Criminal ya Michael Jackson

Igiteranyo cy’amafaranga Michael Jackson yinjije mu myaka ishize apfuye kijya kungana na miliyari ebyiri z’amadolari. Ni nayo ajya guhwana n’amafaranga yakoreye kuva mu 1979 kugeza muri 2009 ubwo yapfaga.

Iyi ngofero yaguzwe asaga miliyoni umunani
Amagambo yanditse kuri iyi ngofero niyo yatumye ihenda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza