Kwamamaza

Intimba igiye guturitsa umutima MC Monday uvuga ko yagizwe igicibwa

Yanditswe kuya 18-11-2016 saa 16:43' na IGIHE


Umuhanzi Gashumba Assouman usigaye wiyita Saga Assou[MC Monday] aravuga ko afite agahinda n’intimba ikomeye ku bw’ibibazo by’urudaca no guhezwa mu bintu byose kugeza ubwo asigaye asaba akazi ntihagire umureba n’irihumye.

MC Monday wahinduye izina akiyita Saga Assou yanditse ubutumwa burebure kuri Facebook avuga ko yahinduwe igicibwa mu bantu ndetse ngo hari abamwita umujura, umutekamutwe n’izindi nyito zimwambura ubumuntu.

Yavuze ko amaranye imyaka ikibazo yaburiye igisubizo kuko ngo ‘atumva impamvu radio zidacuranga ibihangano bye nk’abandi bahanzi kandi ntacyo yacumuye’.

Yagize ati “Ishobora kuba ari Post yanjye ya nyuma, ibiri imbere Allah ni we ubizi. Mfite ikibazo kireba inzego nyinshi zitandukanye. RBA ni ikihe cyaha nakoze gituma indirimbo zanjye zitavuzwa kuri Radio y’igihugu cyangwa CRI ziri mu ntara? Arthur Asiimwe, Radio zigenga (ni uburenganzira bwanyu) ariko se hari itegeko ryatanzwe na Leta ribabuza kuvuza ibihangano byanjye? Baturage mwe mubona ntarengana nzira ubusa?”

MC Monday yongeyeho ko ageze ku rwego rwo kujya gusaba akazi dosiye ye ikajugunywa mu za mbere ndetse ngo ntacyibonamo ubumuntu kubera guteragiranwa no kwamburwa agaciro ku mpamvu ataramenya.

Yagize ati “Narasebejwe bihagije n’abantu batandukanye, nta muntu ducudika ngo birambe, bamwe banyita umu-escro, ibandi, umujura, imbwa, igipinga n’ibindi bashatse. Iyo hagize inkuru inyandikwaho comments ziba ari izo gutukana gusa.”

“Sinkijya no gusaba akazi ahantu ngo bakampe, no mu batoranyijwe sinzamo ngo njye Paul Kagame aranyanga kuko naririmbye inyoni! Hari uwo yabwiye ko anyanga ngo abitubwire? Niba aribyo Nyakubahwa azavuge icyo anziza kuko inyoni ni igihangano cya kera mu Rwanda navutse ngisanga, icyo nakoze byari ukugishyira muri studio gusa. Ndabaza niba narambuwe Ubunyarwanda nabyo mbimenye kuko nkeneye kongera kuba umuntu mu Rwanda.”

Yasoje inyandiko ye ariruhutsa ndetse avuga ko yiragije Allah. Ati “Ahuiiiiii, umutima uraruhutse! Allah Uburinzi bwawe buruta ubw’abantu, urukundo rwawe ni urw’agaciro kurusha urw’abantu, byombi ndabigusabye Allah.”

Yaherukaga avuga iby’uko yavuye mu muziki

MC Monday yaherukaga kuvugwa cyane mu itangazamakuru mu mwaka wa 2014, icyo gihe ku itariki ya 4 Werurwe 2014, yari yatangaje ko amanitse amaboko akaba asezeye muri muzika nyarwanda, ahanini kubera urusobe rw’ibibazo awubonamo, bitanatanga icyizere cyo kuzakemuka kubera aho bishingiye.

Icyo gihe yari yagize ati “Mvuye mu muziki mu buryo bwo kuvugira umuziki wo mu Rwanda, abawangiza bafite imbaraga kuko bashyigikiwe, mu Rwanda hari ubusumbane, bamwe mu biyita ko bakora bateza imbere muzika, nibo kibazo, barabizambya.”

Saga Assou yari yanavuze ko byari bimukomereye gukomeza urugamba rwo gukoresha ukuri aharanira iterambere rya muzika mu Rwanda. Yari yagize ati “Urugamba rwo gukoresha ukuri rurakomeye muri muzika nyarwanda, ushobora kuvugisha ukuri ugakomeretswa nk’uko batanyaguje imodoka yanjye n’ibindi.”

MC Monday na Ginty ubwo bari mu birori bya Salax Awards mu mwaka wa 2012

Saga Assou afatwa nk’impirimbanyi yaharaniye kuzamuka k’umuziki nyarwanda guhera mu myaka ya za 2000 kuzamura. Uretse kuba umunyamakuru anazwiho nawe kuba umuhanzi. Niwe waririmbye “Inyoni yaridunze”, "Gitanu", “Oh Rayon” n’izindi.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved