Inzozi za Demarce Heshima uhagarariye u Rwanda muri Miss Afrique Canada

Yanditswe na Uwiduhaye Theos
Kuya 4 Kamena 2019 saa 08:08
Yasuwe :
0 0

Damarce Heshima yaserukiye u Rwanda mu irushanwa ry’ubwiza rya Miss Afrique Canada, rihurije hamwe abakobwa bakomoka muri Afurika bo mu bihugu bitandukanye, ariko baba muri iki gihugu.

Heshima yiga ibijyanye n’itumanaho mu bya politiki muri Kaminuza ya Québec muri Canada.

Afite imyaka 21, yavukiye i Kigoma muri Tanzania. Ari mu mwaka wa nyuma wa kaminuza. Afite uburebure bwa 1, 55 cm. Gusa afite inzozi zo kuziga ibijyanye n’amategeko mu cyiciro cya gatatu cya kaminuza (Masters).

Ati “Nifuza kuziga byinshi ndetse nifuza kubona impamyabumenyi y’icyiciro cya gatatu cya kaminuza mu by’amategeko.”

Heshima yagiye guhatana mu irushanwa rya Miss Afrique Canada mu buryo bumutunguye kuko yagiye aherekeje inshuti ze bikarangira nawe yiyamamaje.

Ati “Nagiye ngiye gushyigikira inshuti yanjye mbona ukuntu ibintu bimeze ndavuga nti cyaba ari igitekerezo cyiza njye nitabiriye maze kumva byinshi ku irushanwa. Kubera ko ritanga amahirwe atandukanye arimo kuba wakora ikintu ku mugabane wose wa Afurika.”

Ni ubwa mbere yari yitabiriye amarushanwa nk’aya

Avuga ko we n’umuryango we bagiye kuba muri Canada ubwo yari akiri muto cyane, akemeza ko adashobora kumenya impamvu bahisemo Canada ariko akavuga ko ari igihugu cyiza.

Mbere ababyeyi be babaga muri Repubulika Iharanira Demokarasi ya Congo kuko musaza we ari nawe mukuru yavukiye muri icyo gihugu we na murumuna we bakavukira muri Tanzania. Mu 2004 nibwo ababyeyi bagiye kuba muri Canada.

Afite umuryango mu Rwanda urimo babyara be na ba nyirarume ndetse rimwe na rimwe ajya aza mu Rwanda ariko ahaheruka afite imyaka 14.

Afite byinshi k’u Rwanda birimo imiyoborere myiza, isuku iri mu mujyi wa Kigali, uburyo abagore bahawe ijambo ndetse n’uko abitukuza bahagurukiwe.

Ati “U Rwanda ni igihugu cyiza, kuri njye ni igihugu ibihugu bya Afurika byakwigiraho byinshi by’umwihariko Kigali ni umujyi ufite isuku cyane muri Afurika. Abaturage ni beza, buri kimwe kiri kugenda neza. Muri Politiki abagore bahawe umwanya. Bamaganye ibijyanye no kwitukuza, ni igihugu cyakwigirwaho byinshi.”

Akomeza ashima uburyo Perezida Paul Kagame ashyira imbere ibibazo by’abaturage akabitaho mu buryo bwiza kugira ngo igihugu gikomeze gutera imbere.

U Rwanda ruri guhindura byinshi mu bihugu bya Afurika, ruri kuzana udushya mu bintu bitandukanye birimo ikoranabuhanga n’ibindi.

Abajijwe niba yarigeze areba irushanwa rya Miss Rwanda rikomeye kurusha ayandi mu Rwanda, avuga yarirebye mu 2012 akishimira uburyo abakobwa bitinyuka.

Ati “Irushanwa rya Miss Rwanda narirebye ubwo nazaga mu Rwanda mu 2012, byari bishimishije kubona ukuntu abanyarwandakazi bitinyutse. Navuga ko byanshimishije kubona ukuntu abakobwa bo mu gihugu cyanjye bagutse atari mu bijyanye n’ubwiza gusa ahubwo ugasanga bafite ubumenyi banasobanutse. Ni byiza cyane.”

Igitangaje kuri Heshima ntabwo yumva yaba ahantu hamwe ahubwo yifuza kuba mu bihugu bitandukanye ariko byose byo muri Afurika, mu gihe yaba ari mu kazi nyuma yo gusoza amasomo ye ya kaminuza.

Damarce Heshima ahatanye n’abandi bakobwa 17 yambaye nimero 15, abo bahatanye barimo abakomoka mu bihugu nka Sénégal, Côte d’Ivoire, Cameroun, Congo-Brazzaville, RDC, Guinée Conakry, Gabon, Benin, Nigéria, Burkina Faso, Mali, u Burundi n’u Rwanda.

Iri rushanwa ari guhatanamo ritegurwa na sosiyete yitwa Miss Afrique Canada (MAC) isanzwe itegura amarushanwa ahuza abakobwa bakomoka muri Afurika mu kububakamo imbaraga n’icyizere cy’ejo hazaza.

Miss Afrique Canada izasozwa ku itariki ya 21 Kamena 2018 mu birori bizabera mu Mujyi wa Montréal mu nzu mberabyombi yitwa ‘L’Olympia’ yakira abantu 2 600.

Umwaka ushize ikamba rya Miss Afrique Canada ryegukanywe n’umukobwa ukomoka muri Nigeria witwa Wuraola Taibat Adeyemi naho uwitwa Safiatou Barry wo muri Guinea aba igisonga cya Mbere mu gihe Uwase Nancy Sibylle ukomoka mu Rwanda yabaye igisonga cya Kabiri.

Gutora uyu mukobwa ni ukunyura hano

Damarce Heshima niwe uhagarariye u Rwanda muri iri rushanwa rya Miss Afrique Canada
Demarce Heshima ahagarariye u Rwanda mu irushanwa rya Miss Afrique Canada
Uyu mukobwa yavukiye muri Tanzania akurira muri Canada
Yishimira kuba ari kumwe n'inshuti ze aseka yishimye nta kibazo bikaba akarusho iyo n'umuryango umuri hafi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza