Joss Stone ukunzwe cyane mu Bwongereza agiye gutaramira i Kigali

Yanditswe na Munyengabe Murungi Sabin
Kuya 2 Ugushyingo 2016 saa 10:05
Yasuwe :
0 0

Umuririmbyi Joscelyn Eve Stoker [Joss Stone] ukunzwe cyane mu Bwongereza agiye kuza mu Rwanda aho azakorera igitaramo gikomeye mu Mujyi wa Kigali kuwa 27 Ugushyingo 2016.

Joss Stone w’imyaka 29, ni umuririmbyi, umwanditsi w’indirimbo akaba n’umukinnyi ukomeye wa filime mu Bwongereza. Yatangiye umuziki nk’umwuga mu mwaka wa 2011 aracyawukora, aririmba mu njyana ya RnB na Reggae.

Yakunzwe cyane mu ndirimbo zitandukanye zirimo “The Answer”, “While You’re Out Looking for Sugar”, “The Love We Had ”, “Spoiled ”,” Karma”, “Tell Me ’Bout It”, “Super Duper Love”, “You Had Me” n’izindi zitandukanye.

Joss Stone wegukanye igihembo mu biruta ibindi ku Isi, Grammy Awards 2015 mu cyiciro cya Best Reggae album, azaririmbira i Kigali kuwa 27 Ugushyingo 2016 gusa aho igitaramo kizabera ntiharatangazwa.

Karengera Kirenga Eric Soul uhagarariye Afrogroov yagize uruhare rukomeye mu itegurwa ry’Iki gitaramo, yabwiye IGIHE ko uyu muhanzi azaza i Kigali kuhakorera igitaramo mu rugendo rw’ibindi bikomeye ari gukorera mu bihugu bitandukanye ku Isi.

Yagize ati “Iki gikorwa cyihariye ni kimwe mu bigize urugendo rw’ibitaramo Joss Stone yise ‘Total World Tour’[…] Ni iby’agaciro gakomeye kuba tugiye kumwakira mu Rwanda.”

Yongeraho ati “Kugira ngo kizitabirwa n’abantu mu ngeri zose, twateguye igitaramo kinini ariko kidahenze ku rubyiruko. Aho kizabera ntiharatangazwa gusa byose bizaturuka ku mbaraga n’ubufasha tuzahabwa n’itangazamakuru.”

Joss Stone ni muntu ki?

Joss Stone yazamutse cyane mu muziki mu mwaka wa 2003 abifashijwemo na album ye The Soul Sessions. Muri 2009 yasohoye indi album yise “Colour Me Free!” ibasha kugera ku mwanya wa cumi mu zari zikunzwe cyane kuri Billboard.

Muri 2011 yasohoye album ya gatanu yise “LP1,” nayo iboneka mu icumi za mbere zakunzwe kuri Billboard. Mu gihe cyose amaze aririmba, Stone yacuruje kopi za album zirenga miliyoni 14 ku Isi hose ndetse by’akarusho mu mwaka wa 2000 yabaye umuhanzi w’Umwongereza wacuruje cyane kurusha abandi mu gihe cye.

Joss Stone agiye kuza gukorera igitaramo mu Rwanda

Album eshatu ze za mbere zacurujwemo kopi zigera kuri 2,722,000 muri US, naho iwabo mu Bwongereza yazicurujemo kopi zigera kuri 2,000,000.

Stone yatwaye ibihembo bikomeye mu muziki ku Isi harimo bibiri muri Brit Awards ndetse na Grammy Award yatwaye umwaka ushize, icyo gihe yari mu byiciro bitanu.

Mu mwaka wa 2006 yinjiye mu byo gukina filime ahera ku yitwa “Eragon”, yanakinnye muri filime y’uruhererekane “The Tudors” yasohotse mu mwaka wa 2009. Mu mwaka wa 2006, Stone yabaye umugore ukiri muto wabonetse ku rutonde rw’abanyamafaranga rwo mu Bwongereza rwitwa “Sunday Times Rich List”, icyo gihe yari yinjije miliyoni 6 z’ama-pound.

Mu mwaka wa 2012, umutungo we wari ugeze kuri miliyoni 10 z’ama-pound ari nacyo cyamuhesheje kwesa umuhigo w’umuhanzi uri munsi y’imyaka 30 w’umukire kurusha abandi mu Bwongereza. Yatwaye ibihembo bitagira ingano ndetse aririmbira mu bitaramo bikomeye utabasha kurondora.

Amashusho y’ibitaramo Joss Stone yakoze

Joss Stone aririmbana na John Legend

Jeff Beck na Joss Stone


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza