Kamichi yahinduye ibitekerezo nyuma y’ibyabereye mu gitaramo cya The Ben i Kigali

Yanditswe na Philbert Girinema
Kuya 2 Mutarama 2017 saa 08:55
Yasuwe : XX
0

Imyaka ibiri irashize umuririmbyi Adolphe Bagabo [Kamichi] wiyitaga umwami wa Afrobeat mu Rwanda ageze ku mugabane wa Amerika, yari yarahagaritse ibikorwa bijyanye na muzika gusa ibyabereye mu gitaramo cya The Ben i Kigali byamuhinduriye intekerezo.

Kamichi waririmbye ‘Aho Ruzingiye’, ‘Barandahiye’, ‘Byacitse’, ‘Kabimye’ ‘Ifirimbi ya Nyuma’, ‘Imitoma Irenze’ n’izindi yahagurutse mu Rwanda yerekeza muri Leta Zunze Ubumwe za Amerika mu ijoro ryo kuwa 15 rishyira 16 Mata 2014 ahagana saa sita z’ijoro.

Nyuma yo kugenda, Kamichi yumvikanye gacye cyane mu itangazamakuru nabwo akagarukwaho cyane ku makuru ajyanye n’ubuzima bwe mu rukundo n’ajyanye n’igihe ateganya kugarukira mu Rwanda.

Muri iki gihe Kamichi atuye mu Mujyi wa San Antonio wo muri Leta ya Texas. Abaririmbyi b’abanyarwanda baba muri Amerika bakunze kuvuga ko kimwe mu bimugora kugira ngo akomeze umuziki ari uburyo atuye kure ya bagenzi be barimo na Producer Lick Lick.

Kamichi yihaye nyirantarengwa y’igihe azagarukira mu muziki

Mu magambo amaze iminsi yandika abinyujije ku rukuta rwe rwa Facebook, Kamichi akomeje kugaragaza urukumbuzi afitiye abakundaga ibihangano bye atarajya muri Leta Zunze Ubumwe za Amerika, n’uburyo yifuza kongera kumva ijwi rye aririmba mu ndangururamajwi.

Amasaha macye mbere gato y’igitaramo cya The Ben, uyu muririmbyi wakunze kwiyita ‘Rutindukaninkubito’ yanditse yifuriza ’umwaka mushya muhire ku nshuti, abafana, n’umuryango’, ahishura ko mbere y’umunsi wa Saint Valentin azaba yarasohoye indirimbo nshya.

Nyuma yo kubona ibyabereye mu gitaramo The Ben yakoreye i Kigali mu ijoro ryo ku wa 1 Mutarama 2017, Kamichi yavuze ko uburyo abafana baririmbye izina rye byatumye yongera gutekereza ku kuba yasubira mu muziki.

Ati "Imyaka isaga itatu igiye gushira ntakora indirimbo, mbaho mu buzima bwo hasi busanzwe... Gusa kubona abantu ibihumbi baririmba izina ryanjye mu gitaramo cya The Ben byatumye nongera kwiyumva nk’umuntu ukomeye nanone. Vuba aha nzabikora."

Kamichi yiyemeje gusubukura umuziki nyuma yo kubona ibyabereye mu gitaramo cya The Ben i Kigali

Mu gitaramo cy’amateka The Ben yakoze mu gihe cy’amasaha abiri ataruhuka muri Parikingi ya Stade Amahoro, yaririmbye indirimbo ze nyinshi zakunzwe mu Rwanda zirimo ’Amahirwe ya nyuma’, ’Amaso ku maso’, ’Urarenze’ n’izindi.

Yanaririmbye zimwe mu ndirimbo yagiye akorana n’abahanzi b’abanyarwanda zirimo ’Rahira’ yakoranye na Liza Kamikazi, ’Imfubyi’ yaririmbanye na Bulldogg, Sinarinkuzi na Tom Close ndetse na ’Zoubeda’ yakoranye na Kamichi mu 2010, iri no mu zatumye amenyekana.

Kamichi wihaye ingamba nshya zo gusubukura ibikorwa by’umuziki nyuma yo kubona uburyo indirimbo yakoranye na The Ben yishimiwe, ijwi rye ryaherukaga kumvikana mu ndirimbo ’Mbwira Numve’ y’itsinda The Benqs ririmo Skizzy wahoze aririmba muri KGB, iyi bayikoranye mbere gato y’uko ajya muri Amerika isohoka muri 2016.

Kamichi yakunze kuvuga ko agihugijwe n’amasomo n’ubuzima bwo muri Leta Zunze Ubumwe za Amerika. Yagiye amaze gusohora album ebyiri zirimo iyitwa ‘Ubumuntu’ yo mu 2011, n’iyitwa ‘Umugabirwa’ yamuritse mu 2012.

Ubwo Kamichi yerekezaga muri Amerika mu 2014
Tom Close yagaragaye ku rubyiniriro aririmbana na The Ben
Igitaramo cya The Ben cyabaye amateka adasibangana mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza