Kayirebwa agiye gukora igitaramo cyihariye yizihiza imyaka 70

Yanditswe na Munyengabe Murungi Sabin
Kuya 1 Ugushyingo 2016 saa 05:26
Yasuwe : XX
0

Cécile Kayirebwa, inararibonye mu muziki waboneye benshi izuba mu bahanzi nyarwanda agiye kongera gutaramira abakunda ibihangano bye mu gitaramo cyihariye azakorera mu Mujyi wa Kigali.

Iki gitaramo cya Cécile Kayirebwa cyiswe ‘Igitaramo’ giteganyijwe kuzaba ku itariki ya 22 Ugushyingo 2016 ubwo uyu muhanzi azaba yizihiza imyaka 70 amaze abonye izuba.

Karengera Kirenga Eric, umwe mu bagize itsinda rifasha Kayirebwa gutegura iki gitaramo, yavuze ko kizaba cyihariye ndetse n’umuteguro w’uko icyumba kizaberamo uzaba umeze bizaba bishushanya ubukungu buhishe mu muco gakondo wa Kinyarwanda.

Yagize ati “Uyu mwaka Cécile Kayirebwa azuzuza imyaka 70, twateganyije ko hazaba igitaramo n’umuhango wo gukusanya inkunga yo gushyigikira umuryango udaharanira inyungu yashinze witwa Ceka I Rwanda mu kurushaho gusakaza no gusigasira umuco nyarwanda.”

Iki gitaramo kizaba kirimo inshuti, abavandimwe, abayobozi bakuru, abahanzi bakuze n’abakizamuka ndetse n’abakunzi b’umuziki nyarwanda muri rusange. Mu bahanzi batumiwe harimo Masamba, Ben Ngabo Kipeti, Muyango ndetse n’abahanzi bakibyiruka nka Jules Sentore, Mani Martin, Deo Munyakazi n’abandi.

Abahanzi bo bindi bihugu ariko basigaye bibanda cyane mu Rwanda na bo bazaba bari muri iki gitaramo barimo nka Tamfum (DRC), Tito (Argentine) ndetse na Tamon Oshimo (USA).

Muri iki gitaramo hazabamo umwanya wo kuririmba, kuganira no kwibukiranya ibyo hambere, guhanahana ubumenyi bushingiye ku muco, kwidagadura n’ibindi bikorwa bigamije guteza imbere umuco nyarwanda.

Kayirebwa mu gitaramo aheruka gukorera i Kigali

Cécile Kayirebwa yaherukaga gukora igitaramo gikomeye kuwa 27 Werurwe 2016 mu Mujyi wa Kigali, icyo gihe yaririmbiye kuri Hôtel des Milles Collines.

Cecile Kayirebwa w’imyaka 69, yatangiye kuririmba mu 1981, kuva icyo gihe kugeza ubu aracyakora umuziki. Mu gihe cyose amaze aririmba yasohoye album umunani zose ziriho indirimbo zakunzwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza