Koffi Olomide yageze i Kigali

Yanditswe na Munyengabe Murungi Sabin
Kuya 29 Ukuboza 2016 saa 03:50
Yasuwe :
0 0

Umuririmbyi w’icyamamare muri Congo, Koffi Olomide yamaze gusesekara mu Mujyi wa Kigali aho azaririmbira mu nyubako ya Kigali Convention Center kuwa 31 Ukuboza 2016.

Koffi Olomide ubusanzwe witwa Antoine Christophe Agbepa Mumba yaje mu Rwanda aturutse muri Congo Brazzaville, niho yafatiye indege yamugejeje i Kigali kuko iwabo muri Repubulika Iharanira Demokarasi ya Congo nta ngendo z’indege zerekeza mu rwa Gasabo. Yaje gukora imyiteguro ya nyuma y’igitaramo azakora afatanyije n’abacuranzi bagize itsinda Quartier Latin.

Koffi Olomide yari amaze amasaha make yanditse kuri Facebook ati “Koffi Olomide na Quartier Latin kuri uyu wa Gatandatu bazakorera igitaramo muri Convention Center ya Kigali guhera saa tatu z’ijoro…”

Kwinjira mu gitaramo cya Koffi Olomide bizaba ari ukwishyura amafaranga ibihumbi 35 mu myanya isanzwe ndetse hari n’ameza azicarwaho n’abishyuye ibihumbi magana atanu [500,000].

Koffi Olomide watangiye umuziki mu 1978 yakunzwe mu ndirimbo zakanyujijeho nka “Loi” yakoranye na Quartier Latin, “Danger de mort”, “Micko”, “Effrakata”, "Monde arabe" n’izindi zitabarika. Muri iyi minsi aharawe cyane muri iki gihe kubera indirimbo yise ‘selfie’ iri no mu zatumye acuruza cyane mu mwaka wa 2015 ndetse na 2016.

Koffi aje mu Rwanda nyuma y’ibibazo amazemo iminsi byakuruwe n’imigeri yateye umukobwa umubyinira. Icyo gihe hari kuwa 22 Nyakanga 2016, abantu batunguwe no kubona Koffi Olomide asohotse mu kibuga cy’indege cya Jomo Kenyatta International Airport agahondagura umwe mu bagore bamubyinira.

Icyo gihe byamuviriyemo gufungirwa muri Kenya ndetse leta ifata umwanzuro wo kumuhambiriza asubira iwabo muri Congo naho akihagera ntiyaraye iwe kabiri leta ihita imusubiza muri Gereza amaramo iminsi ibiri.

Uyu muhanzi wiyita Grand Mopao aherutse gusaba imbabazi abafana be muri Kenya avuga ko ibyamubayeho atari yabigambiriye ndetse ko ‘ubu yabaye umugabo utunganye’.

Koffi Olomide umaze imyaka 38 akora umuziki afite impamyabumenyi y’icyiciro cya kabiri cya kaminuza mu ishami rya Business Economics yakuye ahitwa Bordeaux mu Bufaransa.

Yavukiye i Kisangani afite indi mpamyabumenyi y’icyiciro cya Gatatu cya kaminuza mu ishami ry’Imibare yakuye muri Kaminuza ya Paris.

Yaherukaga kuza gukorera igitaramo i Kigali mu mwaka wa 2009, icyo gihe yaririmbiye kuri Stade Amahoro, yari yatumiwe na sosiyete y’itumanaho yitwaga Rwandatel.

Koffi Olomide aragera i Kigali mu ndege ya RwandAir

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza