Konti ya Instagram ya Miss Akiwacu Colombe yashimuswe

Yanditswe na Uwiduhaye Theos
Kuya 10 Ukwakira 2019 saa 12:43
Yasuwe :
0 0

Konti ya Instagram ya Miss Akiwacu Colombe wabaye nyampinga w’u Rwanda mu 2014 yashimuswe n’abantu bikekwa ko bakomoka muri Turukiya, bahanagura ibyo yari afiteho byose.

Iyi konti y’uyu mukobwa umaze kwamamara cyane mu ruhando rw’imideli mu Bufaransa, yashimuswe kuri uyu wa Kane tariki 10 Ukwakira 2019 n’abantu bataramenyekana neza ariko akeka ko bashobora kuba ari abo muri Turukiya.

Akiwacu yabwiye IGIHE ko ari mu bwigunge, uyu mukobwa usa nk’uwumiwe, ati “Konti yanjye bayitwaye, byabaye nta kundi.”

Konti y’uyu mukobwa yari ifite akamenyetso kagaragaza ko yemejwe na Instagram ko ari iye, kazwi nka Blue Tick.

Aka kamenyetso ariko nk’uko benshi bajya babyibeshyaho ntabwo gaha ubudahangarwa konti ya Instagram bwo kuba itashimutwa kuko icyo kamaze gusa ari ukwerekana ko ikoreshwa na nyirayo, ibindi byose iba imeze kimwe nk’izindi zisanzwe zitagafite.

Miss Akiwacu Colombe yari afite abantu ibihumbi 150 bamukurikira.

Akiwacu Colombe amaze imyaka ine mu Bufaransa, amaze kwimariramo ibyo kumurika imideli ndetse ni kimwe mu bimutunze n’ubwo afite akandi kazi akora.

Aherutse kwitabira Paris Fashion Week iri mu birori bimurikirwamo imideli bikomeye ku Isi, iri mu cyiciro kimwe na London Fashion Week, Milan Fashion Week na New York Fashion Week.

Uyu mukobwa yari aherutse kuza mu Rwanda muri Nzeri 2019, aho yatashye inzu ebyiri yubakiye imiryango ine y’ababyeyi barokotse Jenoside yakorewe Abatutsi bazwi nk’Intwaza bo mu Karere ka Rwamagana, nyuma y’ubukangurambaga yagiye akora mu buryo butandukanye.

Akiwacu yatowe nka Nyampinga w’u Rwanda mu 2014 ubwo iri rushanwa ryatangiraga gutegurwa na Rwanda Inspiration Backup ikibikora kugeza n’ubu.

Akiwacu akorera ibikorwa byo kumurika imideli mu buryo bw'umwuga mu Bufaransa
Akiwacu akorera ibikorwa byo kumurika imideli mu buryo bw'umwuga mu Bufaransa
Miss Akiwacu asigaye akorera ibikorwa byinshi mu Bufaransa
Muri Kanama 2017 Miss Akiwacu yavugishije benshi ubwo yagaragaraga mu gikorwa cyo kwerekana ibisuko n’imideli mu Bufaransa
Konti ya Instagram ya Akiwacu Colombe yashimuswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza