Makanyaga Abdoul yatumye abakundana bahuza urugwiro mu gitaramo cya Saint Valentin (Amafoto)

Yanditswe na Dusabimana Aimable
Kuya 15 Gashyantare 2017 saa 02:24
Yasuwe : XX
0

Inganzo idashira y’umuhanzi Makanyaga Abdoul ubirambyemo yongeye kunyura imitima ya benshi mu bitabiriye igitaramo cyateguwe mu rwego rwo gususurutsa no gufasha abakundana guhuza urugwiro ku munsi wa ‘Saint Valentin’.

Iki gitaramo cyiswe ‘Kigali Lovers Night’ cyabereye i Gikondo kuri Ambassadors Park mu ijoro ryo ku wa Kabiri tariki 14 Gashyantare hizihizwa umunsi ngarukamwaka w’abakundanye.

Umuhanzi Mavenge Sudi ni we wabimburiye abandi baririmbye, yasusurukije abitabiriye iki gitaramo mu ndirimbo ze zakanyujijeho zirimo ‘Gakoni k’abakobwa’ na ‘Simbi’ zakunzwe cyane mu bihe byo hambere.

Mavenge Sudi yakurikiwe na Umutare Gaby waririmbye indirimbo ebyiri gusa. Iki gitaramo cyanasusurikijwe na Nyiranyamibwa Suzanne, umuririmbyi w’inararibonye waboneye benshi izuba mu bahanzi nyarwanda.

Nyiranyamibwa Suzane yaririmbye indirimbo ze zakanyujijeho zirimo ‘Ndavunyisha’, ‘Nimuberwe Bakobwa’, ‘Telefone’ n’izindi.

Iki gitaramo cyanasusurukijwe n’umuhanzi Andy Bumuntu w’umuhanga mu kugorora ijwi aririmba indirimbo ze n’izo yagiye asabwa n’abitabiriye iki gitaramo biganjemo abakundana bari basohokanye.

Makanyaga Abdoul na Band ye baririmbye nyuma bishimiwe cyane n’abitabiriye iki gitaramo mu buryo bukomeye mu gihe cy’amasaha arenga abiri bamaze baririmba, banyuzagamo bakanifatanya na bo babyina zimwe mu ndirimbo basubiyemo z’abahanzi bakanyujijeho bagakundwa bigatinda.

Iki gitaramo cyari umuziki w'umwimerere

Makanyaga Abdoul yaririmbye umuziki w’inyuramatwi, asusurutsa abitabiriye iki gitaramo yifashishije indirimbo ze zakunzwe cyane zirimo izibanda ku rukundo nka ‘Wanyeretse Urukundo’, ‘Rubanda’, ‘Nshatse Inshuti’ n’izindi.

Mbere y’uko igitaramo kirangira Makanyaga Abdoul yafashe umwanya mu izina ry’abateguye iki gitaramo n’abakiririmbyemo yisegura ku bitabiriye bitewe no kuba Mariya Yohana wari witezwe muri iki gitaramo atabashije kwifatanya na bo bitewe n’ikibazo cy’uburwayi yagize.

Mariya Yohana yari yitezweho gutanga inama zijyanye n’urukundo ku bitabiriye iki gitaramo ndetse akifatanya na Mavenge Sudi na Makanyaga Abdoul bahuriye mu itsinda ‘Beninganzo’ bamurika indirimbo nshya bise ‘Shishoza’ bakoranye n’abandi bahanzi bagezweho.

Ben Nganji yayoboye iki gitaramo
Bizihiwe n'igitaramo
Mavenge yaririmbye benshi baranyurwa
Mavenge asanzwe acurangisha imoso
Andy Bumuntu yaririmbye 'Ndashaje' n'izindi ndirimbo ze.
Nyiranyamibwa yishimiwe cyane mu ndirimbo ze zakunzwe hambere
Nyiranyamibwa yaririmbye abari bamukumbuye barizihirwa
Umutare Gaby mu ndirimbo z'urukundo yanejeje benshi
Makanyaga yibukije benshi ibihe byo hambere mu ndirimbo za karahanyuze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza