Kwamamaza

Makanyaga agiye guhuza abahanzi bakoze umuziki mu myaka 50 ishize

Yanditswe kuya 3-11-2016 saa 10:07' na Munyengabe Murungi Sabin


Umuririmbyi Makanyaga Abdul amaze igihe kinini ategura album y’indirimbo zakunzwe mu myaka igera kuri 50 amaze akora umuziki, azayimurikira mu gitaramo cyihariye ateganya kuzatumiramo abo mu kigero cye.

Nyuma y’iyi myaka yose akora umuziki, Makanyaga agiye kumurika album ya mbere izaba igizwe n’indirimbo z’indobanure yakoze kuva mu 1969 kugeza ubu.

Makanyaga Abdul azwi cyane mu ndirimbo zo hambere nka “Suzana”, “Rubanda”, “Nshatse inshuti”, “Mukamurenzi” n’izindi.

Yabwiye IGIHE ko album agiye gushyira hanze ari yo ya mbere kuva yatangira kuririmba. Izaba igizwe n’indirimbo zakunzwe mu myaka yo hambere ndetse n’izo mu gihe cya vuba.

Ati “Ni album ya mbere ngiye gushyira hanze, natangiye kuririmba mu 1969 ariko ntabwo nigeze nkora album. Ni ubwa mbere […] nzashyiraho indirimbo zakunzwe hambere n’iza vuba zifite amashusho.”

Makanyaga yavuze ko igitaramo cyo kumurika album ye cyagombaga kuba mu kwezi k’Ukuboza 2016 ariko ngo ntibikimushobokeye kuko Producer Clement wamufashaga kuyitunganya yagize akazi kenshi no gukora ubukwe bituma imirimo ya nyuma no kuyinoza bidakorwa mu gihe bari bateganyije.

Yagize ati “Urabona uriya musore wagombaga kumfasha yagize utubazo muri iyi minsi, namwumva cyane sinamurenganya kuko yagize ubukwe asa n’uhuze ntibyagenda uko twari twabiteganyije. Album yagombaga kujya hanze mu mpera z’umwaka ariko ndabona byahindutse.”

Makanyaga yavuze ko igitaramo cyo kumurika album ye ya mbere yacyimuriye muri Gashyantare 2017 kugira ngo abanze yisuganye neza. Ati “Igitaramo nagishyize nko mu kwezi kwa kabiri, indirimbo zose zizaba zararangiye neza, n’ubu zisa n’izarangiye kuko hasigaye enye gusa.”

Muri iki gitaramo, Makanyaga ateganya kuzahuriza hamwe abahanzi bakunzwe mu gihe cye bakiriho bose akabahuza n’abakora umuziki muri iki gihe. Ati “Ndashaka kuzakora igitaramo gitandukanye n’iby’abandi kuko mfite ubunararibonye, nzatumira abahanzi bose b’urungano bakiriho ariko n’abato nzabazana harimo n’abazamfasha.”

Makanyaga wavukiye i Huye mu Majyepfo y’u Rwanda mu 1947, ahitwa i Ngoma. Yatangiye kuririmba mu 1969, yahereye ku ndirimbo ya mbere yise “Urabeho Mariyana”. Yaririmbye muri Orchestre “Les Copain” na Irangira ari nayo abarizwamo ubu.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved