Mbonyi yateguye ikindi gitaramo cy’amateka azamurikiramo album ‘Intashyo’

Yanditswe na Munyengabe Murungi Sabin
Kuya 14 Ugushyingo 2017 saa 04:09
Yasuwe :
0 0

Israel Mbonyicyambu [Israel Mbonyi] uri mu bahanzi ba mbere bakundwa by’ikirenga n’abakunda indirimbo zihimbaza Imana yateguye igitaramo cyo kumurika album nshya yise ‘Intashyo’.

Mbonyi asanzwe afite indirimbo zikora ku mitima ya benshi ndetse zakunzwe bidasanzwe mu myaka itanu ishize uyu muhanzi atangiye umuziki. Izizwi cyane Mbonyi yaririmbye harimo ‘Number one’, ‘Hari impamvu’, ‘Ku migezi’, ‘Ndanyuzwe’, ‘Yankuyeho urubanza’, n’izindi.

Ubu aritegura kumurika album yise ‘Intashyo’ izaba igizwe n’indirimbo esheshatu mu gitaramo azakora ku itariki ya 10 Ukuboza 2017.

Yaherukaga gukora igitaramo cyo kumurika album ku itariki ya 30 Kanama 2015. Icyo gihe yakoze igitaramo cy’amateka aho Serena Hotel yakubise ikuzura abakunzi ndetse bamwe mu bafana babarirwa mu magana bari baje kureba igitaramo basubizwa inyuma kubera umuvundo wari uhari.

Mu kiganiro na IGIHE, Mbonyi yavuze ko album ye ‘Intashyo’ igizwe n’indirimbo esheshatu zarangiye harimo iyitwa ‘Indahiro’ yakoranye na Aime Uwimana, Amarembo y’Ijuru, Sinzibagirwa, Hari Ubuzima, Ibihe ndetse n’Intashyo.

Yongeyeho ati “Izina ‘Intashyo’ ry’indirimbo nitiriye album narihisemo ubwo nazengurukaga mu Rwanda murika album yanjye ya mbere, icyo gihe nagiye mpura n’abantu bakunda indirimbo zanjye kandi bari mu byiciro bitandukanye, abadafite ibyo kurya bihagije, abashonje, numva nabaririmbira mbahumuriza […] aho niho nakuye inganzo yo gukora ‘Intashyo’ nk’indirimbo y’ihumure kuri abo bantu bose.”

Mbonyi avuga ko album ‘Intashyo’ igizwe n’indirimbo z’umwihariko ahanini ushingiye ku butumwa buzikubiyemo ndetse ngo zikora ku mutima cyane ugereranyije n’izigize album ‘‘Uri Number One’ yaherukaga gushyira hanze.

Ati “Umwihariko ni uko iyi album yanjye igizwe n’indirimbo zikora ku mutima cyane, zivuga neza ubutumwa bw’ibintu biriho, navuze ku buzima bw’abantu muri rusange.”

Muri iki gitaramo ngo azafata umwanya munini wo kuririmba kugira ngo agere ku nyota y’abatarabashije gutaramana na we mu 2015. Ati “Nzagira umwanya munini wo kuririmba indirimbo zanjye izo kuri album ya mbere ndetse n’iya kabiri, ubushize ntabwo abantu barebye igitaramo uko bikwiye.”

Mbonyi ubwo yamurikaga album ya mbere yise 'Uri Number One'

Mbonyi azanacuruza album ‘Intashyo’, kopi imwe izagurishwa ibihumbi bitanu. Igitaramo kizabera mu ihema rya Camp Kigali kuwa 10 Ukuboza 2017 gusa ntaratangaza abahanzi bo mu Rwanda azaririmbana na bo.

Ubwo Mbonyi yamurikaga album ya mbere mu 2015:


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza