Meddy Saleh yaretse gukora amashusho y’indirimbo asaba imbabazi

Yanditswe na Dusabimana Aimable
Kuya 13 Kamena 2018 saa 01:34
Yasuwe :
1 0

Producer Meddy Saleh umaze kumenyekana cyane mu gukora amashusho y’indirimbo z’abahanzi bakomeye bakorera umuziki mu Rwanda n’abo hanze, yahagaritse uwo mwuga asezera yisegura ku bahanzi n’abandi bagiye bahurira mu mishinga itandukanye.

Ibi yabitangaje kuri uyu wa Gatatu, tariki 13 Kamena 2018, abinyujije mu butumwa yashyize ku rubuga rwa Instagram. Yavuze ko inzu ye itunganya amashusho ya Press It itazongera gukora ukundi ndetse ibikorwa byayo byose bizarangirana no gukora imishinga yari isigaye itarangiye igahabwa ba nyirayo muri uku kwezi.

Muri ubwo butumwa yashimiye inshuti zose zamubaye hafi mu gihe amaze mu ruganda rw’umuziki, arakomeza ati “Ubu ndashaka gutangaza ko Press It itazongera gukora mashusho y’indirimbo, habaye byinshi kandi ku bantu yababaje ndashaka kubasaba imbabazi biturutse mu ndiba z’umutima wanjye.”

Yakomeje agira ati “Hari ubwo tunengwa bidaturutse ku makosa y’ikigo, ku bw’iyo mpamvu Press It yafashe umwanzuro wo kutongera gukora amashusho y’indirimbo ukundi. Byari ibihe byiza iri niryo herezo ryabyo.”

Yavuze ko bitamworoheye kugera kuri uwo mwanzuro kubera ibintu bimwe na bimwe atabashaga gukemura. Yongeye kwisegura ku bahanzi ababwira ko ibitaragenze neza byose bitari ubushake bw’ikigo cye ahubwo urukundo rw’akazi ngo rwatumaga hari ibyo abantu batumva neza icyasha kikagifata.

Meddy Saleh uri mu bashimwaga n’abahanzi kugira umwete no gukorera kuri gahunda mu mishinga itandukanye bagiranaga, ntabwo yigeze asobanura mu buryo bweruye ibibazo yakomojeho mu butumwa bwe ndetse akanabisabira imbabazi. Yabusoje aha icyizere abakizamuka mu mwuga amazemo igihe kirekire.

IGIHE yagerageje kuvugana na Meddy Saleh ku bijyanye n’aya makuru ariko ntibyakunda. Yavuze ko ari hanze y’igihugu ariko ko aza kugira icyo atangaza nyuma.

Muri amwe mu makuru yatangiye kumvikana avugwa ku bibazo biri inyuma yo guhagarika ako kazi kuri Meddy Saleh, ni ay’imishinga yari afitanye n’abahanzi batandukanye bamaze igihe kirekire cyane bamusaba ariko ntasohoke ndetse byazamuye umunabi kuri bamwe nubwo ntacyo arabitangazaho.

Meddy yakoze nyinshi mu ndirimbo z’abahanzi bakunzwe mu Rwanda nka Buravan, Active, King James, Mani Martin, Knowless, Dream Boys, Tom Close, Teta Diana, Christopher n’abandi batarondoreka.

Usibye abahanzi b’Abanyarwanda yakoranye na bo, Meddy Saleh yari amaze kugeza ibikorwa bye ku rwego mpuzamahanga. Yakoranye na A.Y, Chameleone, Harmonize na Pallaso yakoreye indirimbo eshatu n’abandi batandukanye.

Reba imwe mu ndirimbo Meddy Saleh yari aherutse gukorera amashusho

Meddy Saleh yari yarubatse umubano n'abahanzi bo mu bihugu by'abaturanyi bari bamuziho ubuhanga mu gutunganya amashusho y'indirimbo
Meddy Saleh ntaratangaza byeruye icyatumye ahitamo kureka gukora amashusho y'indirimbo
Meddy Saleh yaretse gukora amashusho y’indirimbo asaba imbabazi
Meddy Saleh yari umwe mu batunganya amashusho bazwi cyane mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza