Miss Supranational: Akiwacu na bagenzi be bakoze imyitozo bitegura imyiyereko ya mbere

Yanditswe na Munyengabe Murungi Sabin
Kuya 22 Ugushyingo 2016 saa 08:47
Yasuwe : XX
0

Nyampinga uhagarariye u Rwanda, Akiwacu Colombe na bagenzi be bahahataniye ikamba rya Miss Supranational umwaka wa 2016 bakoze imyitozo ya mbere bitegura ibirori by’imyiyereko y’ibanze ibimburira irushanwa.

Irushanwa rya Miss Supranational ku nshuro yaryo ya munani, rigomba kuzahuza abakobwa barenga 80 bo mu bihugu bitandukanye byo ku Isi harimo n’u Rwanda.

Ikamba rya Miss Supranational rihataniwe n’abakobwa bagera kuri 80 bo mu bihugu bitandukanye. Kuri uyu wa Mbere tariki ya 21 Ugushyingo 2016 aba bakobwa bose berekeje mu gihugu cyo mu majyepfo ya Pologne muri Repubulika ya Slovakia [mu birometero 547 uvuye aho aba bakobwa bari bacumbitse].

Muri Slovakia ni naho bakoreye imyitozo bitegura imyiyereko ya mbere no kubonana bwa mbere n’akanama nkemurampaka k’irushanwa. Mu byo bitoje harimo gutambuka no kwiyerekana mu mideli ari nabyo bizashingirwaho mu guhitamo abafite ikimero no kutagira igihunga.

Muri Slovakia bacumbikiwe muri hoteli ikomeye yitwa Horizont Resort Vysoké Tatry ari nayo bagombaga gukoreramo ibi birori kuri uyu wa Kabiri tariki ya 22 Ugushyingo 2016.

Miss Akiwacu Colombe mu myitozo muri Slovakia

Abakobwa babiri mu batumiwe ntibabashije guhatana uyu mwaka, Miss Northern Ireland yagize ikibazo cy’uburwayi ahita asubizwa iwabo. Nyampinga wa Sierra Leone we yimwe ibyangombwa byagombaga kumwerera kwinjira muri Pologne ku mpamvu abateguye irushanwa batamenyeshejwe bityo na we akaba yavanwe mu bahatana uyu mwaka.

Miss Supranational izasozwa ku itariki ya 2 Ukuboza 2016 ahitwa Krynica-Zdrój muri Pologne [Poland]. Abategura iri rushanwa batangaje ko rizajya ryerekanwa kuri televiziyo mu bihugu 120 byo ku Isi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza