Mu gitabo cye, Corneille Nyungura yakomoje ku bumanzi bwe yambuwe na Nyirasenge

Yanditswe na Kanamugire Emmanuel
Kuya 8 Ukwakira 2016 saa 10:30
Yasuwe : XX
0

Cornelius Nyungura, Umuririmbyi w’Umunyarwanda uzwi ku izina rya ‘Corneille’, mu gitabo aherutse gushyira ahagaragara, yakomoje ku ntimba yatewe no kwamburwa ubumanzi bwe na Nyirasenge, wamusambanyije ataranatangira amashuri abanza.

Muri icyo gitabo yise ‘Là où le soleil dispa­raît’, Nyungura yibanze cyane ku ntimba yasigaranye nyuma yo kubona umuryango we wicirwa mu Rwanda mu ijoro ryo kuwa 15 Mata 1994.

Asanzwe ari umuntu utuje, ndetse byinshi kuri we ni amabanga. Iyo bigeze ku mateka ye biba ibindi bindi, ariko agace kayo gato yagahishuriye mu muzingo w’indirimbo (Album) yise ‘Parce qu’on vient de loin’.

Uwo mugabo, Se w’abana babiri Mérick na Mila, yafashe icyemezo cyo kwandika ubuhamya bwe, aho byamufashe imyaka itanu kugira ngo asohore igitabo yise ‘Là où le soleil dispa­raît’, ibiri muri iyo myaka akaba ari yo yamaze avuga kuri Jenoside yakorewe Abatutsi mu Rwanda.

Muri icyo gitabo, ni na ho yahishuriwe intimba yari imuri ku mutima nk’igikomere yakuye ku ihohoterwa yakorewe na Nyirasenge, wamuhohoteye akamwambura ubumanzi bwe agifite imyaka itandatu n’igice (6,5).

Mu kiganiro na Paris Match, Nyungura yagize ati “Nari mfite imyaka itandatu n’igice ubwo Masenge yampohoteraga, akanyambura ubumanzi bwanjye nkiri umwana. Ibyo byanteye ihungabana cyane mu buzima bwanjye bw’imyororokere n’uburyo nashoboraga gushyikirana n’abagore. Kugeza ubwo nahuraga n’Umugore wanjye Sofia, nari ntarabasha kumenya ingano y’ingaruka natewe n’iryo hohoterwa.”

Muri icyo gitabo kandi, Nyungura yagarutse ku buhunzi n’ubwigunge yanyuzemo, inzira yaciyemo yatumye aba icyamamare ndetse n’urukundo rwe n’umugore we Sofia.

Nyungura yavukiye i Freiburg mu Budage tariki 24 Werurwe 1977, abyarwa na Emile Nyungura na nyina w’Umunyarwandakazi. Aba bombi bari baragiye kuba muri icyo gihugu kubera amasomo, hanyuma bagaruka gutura mu Rwanda.

Icyo gihe yari afite imyaka 6, maze nyuma y’imyaka 11 (ubwo yari agize 17) yahavuye ajya mu buhungiro aza kongera gusubura mu gihugu yavukiyemo, aho yavuye ajya kuba muri Canada ari na ho atuye hamwe n’umugore n’abana be babiri.

Yatangiye kwigaragaza nk’umunyamuziki mu 1993 ubwo yatwaraga Prix Découvertes mu irushanwa ryari ryateguwe na Televiziyo y’u Rwanda, ibyo byose bikaba biri muri icyo gitabo yasohoye gikubiyemo byose ku buzima bwe.

Cornelius Nyungura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza