Mukasonga na Sentore basigiye umunezero abakoraniye i Khouribga basingiza u Rwanda (Amafoto)

Yanditswe na Munyengabe Murungi Sabin
Kuya 16 Nzeri 2017 saa 03:24
Yasuwe :
0 0

Abahanga mu ngeri zifitanye isano n’umuco bakoraniye mu iserukiramuco ryashinze imizi muri Maroc, uyu mwaka u Rwanda rwahawe agaciro k’ikirenga nk’igihugu gifite umwihariko muri Afurika.

- Mukasonga yahawe igihembo araturika ararira
- Sentore yasize Abarabu bitoza guhamiriza
- ‘U Rwanda, igihugu cyazutse kandi gihishemo ubutunzi’
- Ikuzo n’icyubahiro ku muco w’u Rwanda mu maso y’amahanga

Iserukiramuco rikomeye rya Festival du cinéma africain de Khouribga rimaze imyaka 40 ribera muri Maroc, iry’uyu mwaka ryabareye mu Ntara ya Khouribga, kuri uyu wa Gatanu tariki ya 15 Nzeri 2017 habaye ibirori bibanziriza umusozo.

Ibirori by’uyu munsi byari agahebuzo! Abitabiriye hafi ya bose wabonaga batangariye cyane umuco w’u Rwanda haba muri sinema n’imbyino zibyinwa mu mujyo usa ukwawo. By’umwihariko Jules Sentore yaririmbye benshi baranyurwa, byabaye akarusho ubwo abakobwa babarizwa muri diaspora nyarwanda muri Maroc basesekaye imbere y’abashyitsi babyina bashayaya maze uyu muhanzi na we aca umugara ibirori bishyuha byihariye.

Abiganjemo abaturuka muri Maroc n’abandi bashyitsi bo mu bihugu birimo Ghana, Cote d’Ivoire, Senegal, Mali, Nigeria, Canada n’ahandi bari bateraniye mu nzu ya Médiathèque de Khouribga ari naho Jules Sentore yataramiye nk’umuhanzi w’imena watumiwe uyu mwaka.

Sentore yaririmbaga anacuranga inanga akayisimburanaho n’umusore w’umuhanga wamukoreraga mu ngata akanamwunganira mu majwi. Iki gicurangisho cyatangariwe cyane ariko bigeze ku mbyino nyarwanda biba akarusho kuko wasangaga bamwe mu banyamahanga bagerageza gutega amaboko ariko bikabagora.

Iri serukiramuco ryibanda ku guteza imbere sinema ya Afurika no kuzamura umuco biciye mu muziki, buri mwaka hatoranywa igihugu kigomba kuvamo umuhanzi uzerekana umuco wacyo binyuze mu ndirimbo.

Ibirori bibanziriza umusozo uteganyijwe kuri uyu wa Gatandatu tariki ya 16 Nzeri 2017 byanagaragayemo umubyeyi w’umuhanga mu kwandika ibitabo, Mukasonga Scholastique yegukanye watanze ikiganiro kirambuye ku buhanzi bwe n’umuzi nyakuri w’icyatumye afata ikaramu akandika.

Mukasonga Scholastique azwi cyane ku rwego mpuzamahanga nk’umwanditsi ukomeye ndetse mu 2012 yabiherewe igihembo cyitiriwe Renaudot kubera igitabo yise "Notre-Dame du Nil", yanahawe ibindi n’amashimwe ashimangira ko ‘u Rwanda rufite abanditsi mu ngeri zose.”

Mukasonga...

Mukasonga wavuze mu ncamake bike mu bigaragaza urwango karundura Abatutsi banzwe kugeza ubwo mu 1994 rwagize ubukana bw’ikirenga bakicwa muri Jenoside yabakorewe. Yashimangiye ko mu bitabo bye atazahwema kwibaza ku cyateye amacakuburi ashingiye ku moko yaranze u Rwanda mu bihe byashize.

Uyu mubyeyi w’imyaka 61 yasoje iki kiganiro [cyari kiyobowe n’umwanditsi unazwi nk’umunyamakuru wabikoze igihe kinini Maati Kabbal] bamwe batangiye kwitsa umutima mu buryo busa n’ubugaragaza ko amateka u Rwanda rwanyuzemo ashaririye.

Yagenewe igihembo na Fondation du Festival du Cinéma Africain nk’umwanditsi ufite inkuru yihariye. Mukasonga agishyikirizwa iri shimwe yaturitse ararira avuga ko ‘muri Maroc yahagiriye umugisha udasanzwe mu nshuro eshatu yahageze’.

Mu kiganiro na IGIHE, Mukasonga yagize ati “Ibi bigaragaza ko babonye neza ko u Rwanda ari igihugu bashobora kwizera kandi gifite aho kiri kugana, ni ibintu bikomeye kandi byadufashije gukundisha abantu igihugu cyacu.”

“Ishimwe nahawe ni ikimenyetso cyerekana ko udashobora kwibagirwa icyakozwe uyu munsi, nzahora nibuka ko hari ikintu cyatumye bavuga u Rwanda hano uyu munsi.”

Muri bitabo bye nka "Inyenzi" cyangwa muri "les Cafards" byo mu 2006, "La Femme aux pieds nus" cyo mu 2008 ndetse na "L’Iguifou" cyo mu 2010, Mukasonga ntahwema kwibaza ku cyateye amacakuburi yabyaye Jenoside yakorewe Abatutsi.

Mukasonga yashimiwe akazi gakomeye yakoze mu kwandika ibitabo byuje inkuru z'agaciro ku muryango

By’umwihariko mu kuvuga "Notre-Dame du Nil" yashakaga kugereranya u Rwanda nk’umukobwa w’isugi w’umwirabura, wagenewe isura n’umukoloni w’Umubiligi aherereye mu misozi y’u Rwanda ku isoko ya Nil. Ariko ngo na none ni nk’ishuri ry’abakobwa ryagizwe umutako w’amahanga maze ubwoko bwari bugizwe n’abantu bake butsikamirwa n’ubwari bugizwe na benshi.

Muri Festival du Cinéma Africain, uyu mwaka u Rwanda rwari ruhagarariwe n’abahanzi ba sinema umunani barimo Jean Kwezi, Jean Luc Habyarimana, Richard Mugwaneza banahawe igihembo ku bw’akazi gakomeye bakoze mu kuzamura ubu buhanzi ndetse na Kennedy Mazimpaka usanzwe ari umuyobozi wungirije w’urugaga rwa sinema mu Rwanda.

Ibihembo bikomeye byitezwe mu iserukiramuco rya Khouribga

Filime ’Umutoma’ ya Kwezi John yakinwemo na Bamporiki Edouard yerekanwe muri Khouribga.

Muri birori bizasoza iri iserukiramuco kuri uyu wa Gatandatu, hazanatangirwamo ibihembo bikomeye muri sinema, filime zo mu bihugu 14 bya Afurika zihatanye uyu mwaka harimo izo muri Sénégal, Mozambique, Ghana, Bénin, Mali, Algérie, Afrique du Sud, Burkina Faso, Togo, Uganda, Tunisie, Maroc, Egypt, n’u Rwanda.

Mu bihembo bizatangwa harimo ikizagenwa n’abagize akanama nkemurampaka, icy’uwayoboye neza filime kurusha abandi, icy’umukinnyi w’umugabo, ndetse n’umukinnyi wa filime wahize abandi mu cyiciro cy’abagore.

Filime izahabwa igihembo, izanagenerwa ibahasha irimo 400,000 dhs azatangwa n’umuryango OCP utegura iri serukiramuco. By’umwihariko ariko hari igihembo cyitiriwe umwanditsi Ousmane Sembene wo muri Senegal, iki kizaba kizaherekezwa n’ibahasha irimo amadolari 5000.

Mu bagize akanama nkemurampaka harimo umwanditsi Abdellatif Lâabi, umukinnyi wa filime Rokhayaa Niang, umuhanzi w’umushushanyi Zoulikha Bouabdellah wo muri Algérie, umukinnyi wa filime Sonia Oukacha, umuhanzi Ray Lema, Pedro Pimenta na mugenzi we Nico Simon ndetse na Perezida wa Europa Cinemas-Luxembourg.

Iserukiramuco rya Khouribga ryahaye icyubahiro u Rwanda mu buryo bwihariye
Ibi birori byabereye mu nzu ya mu nzu ya Médiathèque de Khouribga
Mazimpaka Kennedy se wa Nkusi Arthur ari mu bitabiriye iri serukiramuco
Mukasonga Scholastique azwi cyane ku rwego mpuzamahanga nk’umwanditsi ukomeye
Ikiganiro cyatanzwe na Mukasonga cyari kiyobowe n’umwanditsi unazwi nk’umunyamakuru wabikoze igihe kinini Maati Kabbal
Mukasonga yavuze ko yagiriye umugisha muri Maroc nyuma yo kujyayo inshuro eshatu
Agace kari kicawemo n'abaserukiye u Rwanda
Jules Sentore yari yazanye abakobwa biga muri Maroc bamufasha kwerekana imbyino gakondo zo mu Rwanda
Umukinnyi ukomeye mu Misiri ashimira Jules n'umucuranzi we
Guverineri wa Khouribga Mohamed Sabri ni we washyikirije Sentore igihembo
Sentore yashimwe nk'umuhanzi uririmba yitsitsa ku muco
Uyu mukinnyi wa filime mu Misiri na we yahawe ishimwe
Nour-Eddine SAIL ubwo yashyikirizaga igihembo Jean Luc, Richard Mugwaneza na John Kwezi
Mukasonga na Guverineri Mohamed Sabri

Munyengabe Murungi Sabin/Cassablanca-Maroc


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza