Mukeshabatware yasaruye akayabo mu myaka 50 amaze mu ikinamico

Yanditswe na Munyengabe Murungi Sabin
Kuya 25 Gicurasi 2017 saa 10:48
Yasuwe :
1 0

Mukeshabatware Dismas, ni umugabo w’igikwerere wubatse amateka ku bw’ubuhanga bwihariye mu gukina ikinamico no kwamamaza Imvaho, iyi myuga yombi ayimazemo imyaka irenga 50.

- Izina Mukeshabatware Dismas ni ikimenyabose kubera ikinamico
- Izina rye ryaciye ibintu mu kwamamaza Imvaho
- Yasaruye akayabo mu buhanzi mu myaka irenga 50 abumazemo
- Yaguze inzu ebyiri zifite agaciro k’amafaranga arenga miliyoni 250
- Mu 1971, yagiye kwiga amasomo ya gisirikare
- Mu 1980, yinjiye mu Itorero Indamutsa
- Mu bana bana barindwi yabyaye, batanu bakina ikinamico

Afite imyaka 67, arubatse afite umugore n’abana barindwi[abakobwa batanu n’abahungu babiri], yavukiye mu Karere ka Nyaruguru mu Murenge wa Kivu.

Yatangiye gukina ikinamo akiri mu mashuri abanza, abishyiramo imbaraga ageze mu yisumbuye muri Saint Andre aho yize Indimi n’Ubuvanganzo guhera mu 1965. Yinjiye mu ikinamico nk’umwuga guhera mu 1980 mu kigo cyahoze cyitwa Orinfor, akaba yarakinaga mu itorero Indamutsa.

Izina rye rizwi mu makinamico nka “Mpariye abaseka[imari ya shuni]” yakinnye ari Shuni, Icyanzu cy’Imana[iyo benshi bita Uwera], Ibigeragezo[yakinnye ari umucuruzi witwa Nyangenzi], Amabanga ya maso y’inyana n’izindi zitabarika.

Mu kiganiro cyihariye yagiranye na IGIHE, Mukeshabatware yavuze ko amaze gukina amakinamico akabakaba igihumbi mu myaka irenga 50 abimazemo ndetse ku giti cye yagize uruhare mu gukora filime esheshatu zirimo ‘Beninganzo y’amateka’, ‘Ryumeho’ gusa aho akina yitwa Mbirikanyi.

Mu 1971 yigeze kujya kwiga ibya gisirikare mu ishuri rya ESO Butare gusa ntiyabirambyemo kuko yasanze atari umuhamagaro we arabisezezera asubira mu mwuga we.

Mu 1972 kugeza mu 1978, yakoze mu icapiro rya Gisirikare ryitwaga AR ryakoreraga muri Etat Major ya Camp Kigali, icyo gihe yahawe aka kazi avuye kwiga i Burayi ibijyanye n’itangazamakuru ryandika.

Ati “Ubundi njyewe mu gice cy’itangazamakuru nize iby’itangazamakuru ryandika, ibaze rero ko nari mvuye kwiga hanze bakampemba 2000frw ku kwezi. Amafaranga yari urusenda rwose, ariko yari na menshi da, kuko Primus yaguraga abiri.”

Mu 1980 yahawe akazi mu icapiro rya Orinfor, akigeramo hahita hatangizwa gahunda yo gukina ikinamico aba mu ba mbere batoranyijwe yinjira mu itorero Indamutsa atyo.

Ati “Icyo gihe hari ikintu cyari cyadutse mu Burundi cyitwa ‘Ninde’, yarageraga abantu bakava kuri Radio Rwanda bakajya gukuriki iyo kinamico ntibumve inyigisho zo kuri radio y’igihugu cyacu. Uwari Perezida w’u Rwanda, uriya Kinani yasabye Orinfor ko ikintu cy’amakinamico cyatangira, uwayoboraga Orinfor icyo gihe yari Christophe Mfizi.”

Itorero Indamutsa ryagitangira benshi bitaga ibyo bakina ‘ikinangeso’ gusa Gasimba François Xavier [benshi bitirira igitabo yanditse ‘Isiha rusahuzi’] abiha inyito y’ikinamico ndetse rirahama.

Ati “Ikinamico yarakunzwe cyane, icyo gihe ku munsi w’ikinamico wasangaga abacuruzi b’amabuye ya radio basakiwe. Byaje gutyo, Abanyarwanda bakunda ikinamico gutyo, twari dufite abakinnyi b’abahanga cyane abo ba Sebanani, Ndamyabera Andre, Baganizi Eliphaz, Mukarushema Josephine, uyu Depite Byabarumwanzi François na madamu we Mukandengo Athanasie, n’abandi”

Mu 1985, Mukashabatware na bagenzi be bari bagize itorero Indamutsa boherejwe mu Budage bajya guhabwa amahugurwa kugira ngo babe abakinnyi b’umwuga. Avuyeyo, mu 1986 yahise atangira ibyo kwamamaza ari nabwo yasaruye amafaranga menshi yabyaje ibikorwa by’iterambere.

Ikiganiro kirambuye na Mukeshabatware

IGIHE: Numvise uvuga ko wabaye mu buzima bugoye mu cyaro, byari bimeze gute?

Mukeshabatware: Icyo gihe mu gihugu byari akajagari, nta terambere ryari rihari, twambaraga ibirenge, twabaga mu nzu z’ibyatsi [...] Njyewe natangiye ishuri mu 1959 ku Ngoma ya Rudahigwa, ndanamuzi, icyo gihe ni abamisiyoneri bazaga kutuvana mu ngo badushyira mu ishuri. Natangiye twandikisha wino, nta mafaranga y’ishuri twatangaga, uwajyaga mu ishuri yabaga ari umwana w’umutegetsi, njyewe nagize amahirwe kuko data yari kirongozi[kiongozi] wa sous chef i Nyarurembo.

IGIHE; Ubwo waje kuva iyo ugera i Kigali gute?

Mukeshabatware: Ndangije amashuri abanza nibwo naje i Kigali. Kuva mu cyaro aho nakuriye nari menyereye kwiberaho gutyo noneho nkajya mu mujyi byarangoye, urumva nakuze twibera mu nzu y’ibyatsi kuva hasi kugera hejuru, twigaga twambaye ibizibaho, nta musore wambaraga ikabutura, reka da! Nambaraga ikizibaho[umwambaro ushushe nk’igipira kirekire], ikabutura nayambaye nyuma. Ngeze i Kigali byabanje kuntonda.

IGIHE: [Umunyamakuru atangare], ubwo abasore mwajyaga ku ishuri mutambaye amakabutura koko?

Mukeshabatware: [Na we akubite igitwenge] Have have sha! Ikabutura wayambaraga gute se? Uri mwene nde se? Ku ishuri wasangaga twese ari impuzankano imwe, twambaraga amakanya[nta nkweto mu birenge], uwambaraga inkweto yarakubitwaga.

IGIHE: Ubwo inkweto wazambaye bwa mbere ryari?

Mukeshabatware: Mu 1965 nibwo nakojeje inkweto mu kirenge nje kwiga muri Saint Andre.

IGIHE: Urugendo rwo kuva i Nyaruguru kugera i Kigali, rwari urwa mbere ukoze mu modoka?

Mukeshabatware: Ntabwo narukoze n’imodoka, imodoka nayuriye ngeze i Butare. Navuye iyo iwacu i Nyaruguru ngera i Butare n’amakanya[agenza ibirenge nta nkweto], ntakwiyemeyeho inkweto nazikozaga mu kirenge nkumva zirandiye, nongeye kuzambara ninjiye muri bisi[bus] yamvanye i Butare inzana i Kigali.

IGIHE: Byari bimeze gute ukigera i Kigali?

Mukeshabatware: Ngeze i Kigali naratunguwe, narumiwe, nasanze iri hanyuma ya Butare, Muhima na Gisozi hari urutoki gusa. Mu Mujyi wa Kigali hari etage imwe gusa nabwo yari iposita hariya Makuza yubatse. Nageze i Kigali mu 1965 aribwo batashye iyo etage, nibazaga ukuntu Umurwa w’u Rwanda wuzuyemo ivumbi bikanyobera. Ka kaburimbo kari kari hariya hubatse BCR [I&M Bank] kakagenda kakagera kuri Camp Kigali, ahandi hose ari ibitaka. Iyo bisi yitwaga TP[Transport Publique] yamvanye aho ingeze muri Saint Andre.

Ngeze ku ishuri nabwo byari ihurizo rikomeye, bwarije mbona amatara araka, nararyamye sinasinzira naraye nkanuye buracya, bwari ubwa mbere mbonye amashanyarazi kuko iwacu nari nzi igishirira gusa.

IGIHE: Ibyo kwamamaza no gukorera Orinfor wabyinjiyemo ryari?

Mukeshabatware: Ibyo kwamamaza nabitangiye mu 1986, natangiriye ku Ikawa, icyo gihe rwahise rwambikana mu kwamamaza, ni njye wari uyoboye kuko hari na Radio imwe gusa, nyuma haje izindi radio abandi nabo babona akaryo […] nakomeje kubifatanya no gukora mu icapiro rya Orinfor no gukina amakinamico, nakinnye arenga 600 ndetse n’ubu ndacyakina muri Musekeweya, nkina nitwa Rutaganira.”

IGIHE: Nigeze kumva bavuga ngo Perezida yaragutumiye mbere yo kujya kumusura uva iwawe utabaza abaturanyi. Ibyo byabayeho?

Mukeshabatware: [Aseke atembagare], uransekeje wa mwana we! Ibyo nanjye nabyumvise kenshi, ariko ni igiparu baba batera, hari ababivuga bashaka uburyo agatama kabaryohera, abandi bagakubitamo umunyu kugira ngo inkuru ziryohe, barambeshyeye.

IGIHE: Imodoka abantu bavuga ko Perezida yaguhaye yo bite?

Mukeshabatware: Nabikubwiye, Abanyarwanda bavuga ibyo bashaka, ibyo byageze no muri za Amerika sinamenya. Ariko se koko Perezida yagutumira ukagenda utabaza abaturanyi kandi ari ikintu gishimishije? Iby’imodoka nabyo ni ugukabya.

IGIHE: Mu gipangu cyawe ariko ndabona nta watera agati ngo kagwe hasi kubera imodoka nyinshi, izi ni iza nde?

Mukeshabatware: Izi ubona harimo iz’abashyitsi baje kudusura, izindi zisigaye harimo izanjye. Izo zose bavuga si izanjye, Umunyarwanda iyo avuga inkuru akukumba byose akanagamo n’igitunguru kugira ngo biryohe. Imodoka yampaye mwese muyigendamo, ni amahoro yampaye, iyo amahoro ahari n’imodoka icumi urazigura.

IGIHE: Urwenya utera, n’iby’abantu bakuvugaho mu ikinamico, umugore wawe abyakira ate?

Mukeshabatware: Na we biramusetsa cyane, abandi byabasetsa se we ntaseke. Iyo bibaye mahire umugore akabona uzanye ihaho se yabuzwa n’iki guseka. Umugore wanjye na we araseka.

IGIHE: Mu mitungo ufite ngo harimo n’ishuri ribanza wubatse ku Kimisagara. Iryo warishinze ryari?

Mukeshabatware: Abantu rero barakabya cyane, iryo shuri twaritangije mu 2000, ryitwa APEK. Ni ishuri ry’ababyeyi, ni njye wazanye igitekerezo dusaba inkunga, ryatangiye ari ishuri ry’ababyeyi ndibera umuyobozi nk’imyaka umunani. N’ubu ndacyari umuyobozi w’icyubahiro[President d’honneur] nkaba nshinzwe na komisiyo y’ubutabera.

IGIHE: Imitungo yose bakuvugaho ko numva uyihakana, nta nyungu wavanye mu ikinamico no kwamamaza?

Mukeshabatware: Inyungu irahari rwose, mu mafaranga nabonye yatumye ngura uru rugo ntuyemo kuva mu 2009, naguze hano kuri miliyoni 25, ku Kimisagara naho nahaguze indi nzu ya miliyoni umunani ariko ngenda nongeranya ku buryo imaze kuba nini cyane, iraruta iyi. Naguze ku Kimisagara mu 1999, nayiguze icyo gihe inzu zikigura urusenda […] Iyo yo ku Kimisagara irahenze, udafite miliyoni 120 sinayiguha, ntibibaho.

IGIHE: Mu bana bawe nta n’umwe ukina ikinamico?

Mukeshabatware: Mu bana banjye barindwi batanu bakina ikinamico, no mu kwamamaza baramfasha, harimo n’umwe uri kurangiza mu itangazamakuru muri Mount Kenya, aramfasha kwamamaza. Mu ikinamico yitwa ‘Icyerekezo cy’iterambere’ yari iya Minisiteri y’Ubuhinzi, hakinnyemo abana bane banjye.

Mukeshabatware amaze imyaka irenga 50 akina ikinamico

Mukeshabatware urangwa no gutebya no kugira amaringushyo mu kiganiro, atuye i Gisozi mu mudugudu wubatswe n’umunyemari Gaposho, atuye mu gice kibarizwamo abakungu benshi ndetse urebeye ku nzu ye biguha ishusho y’uko ahagaze ku mufuka.

Urugo atuyemo yaruguze mu myaka icyenda ishize kuri miliyoni 25 gusa ubu agaciro karwo kikubye inshuro zirenga enye. Mu bindi yavanye mu gukina ikinamico harimo inzu ‘ifite agaciro karenze miliyoni 120’ iri ku Kimisagara ndetse afite n’ibindi bikorwa bibyara inyungu.

Mukeshabatware Dismas mu rugo rwe ruherereye ku Gisozi
Urugo rwe rwubatse mu gace kabarizwamo abakungu benshi
Kimwe mu bipangu Mukeshabatware yaguze abikesha ikinamico no kwamamaza
Iwe mu rugo uhasanga imodoka nyinshi

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza