Mutesi Jolly agiye muri Amerika yizeye kuzagarukana ikamba rya Nyampinga w’Isi

Yanditswe na Munyengabe Murungi Sabin
Kuya 24 Ugushyingo 2016 saa 06:33
Yasuwe : XX
0

Nyampinga w’u Rwanda Mutesi Jolly azitabira Miss World 2016, ni ku nshuro ya mbere iki gihugu kigiye guhagararirwa muri iri rushanwa mpuzamahanga ry’ubwiza rizahuza abakobwa bagera ku 120.

Irushanwa rya Nyampinga w’Isi rizasozwa 20 Ukuboza 2016, rigiye kuba ku nshuro ya 65 kuko ryabaye bwa mbere mu 1951. Nyampinga wa mbere w’Isi yatowe mu 1951, yitwa Kiki Håkansson akomoka muri Sweden.

Miss Mutesi Jolly azerekeza mu Mujyi wa Washington kuri uyu wa Gatanu tariki ya 25 Ugushyingo 2016. Mbere yo kuva i Kigali yavuze ko afite icyizere cyo kuzagarukana intsinzi gusa ngo yiteguye kuzabyakira naramuka adatsinze.

Yagize ati “Kuri njyewe ni ishema, abantu benshi bagiye bavuga ko ari amahirwe u Rwanda rugize ariko ni ikimenyetso kigaragaza ko bishoboka kandi ni inshingano zanjye gutsinda. Ntabwo ngiye nihagarariye, ngiye guhagararira igihugu cyanjye, nzakora ibishoboka byose ishema ryanjye ndihagarareho.”

“Abanyarwanda ndabizeza intsinzi, ni urushanwa nzakora ibishoboka mbaheshe ishema, nzagerageza mu mbaraga n’ubumenyi bwanjye nkore icyiza kurushaho…”

Mu kiganiro yagiranye n’itangazamakuru mbere yo kujya muri Amerika, Jolly yari yaherekejwe na nyina na we ushimangira ko umuryango uzakomeza gushyigikira uyu mukobwa mu rugendo agiyemo.

Yagize ati “Kuba Jolly agiye i Washington muri Miss World ni ishema no ku Banyarwanda, cyane kuri twebwe umuryango […] Ibisabwa byose, tugomba kuzamushyigikira uko bishoboka ibihe byose nk’umwari w’u Rwanda.”

Itike y’urugendo Mutesi Jolly rwerekeza i Washington yayihawe na sosiyete ya RwandAir . Umuyobozi ushinzwe iyamamaza bikorwa n’iterambere ry’isoko muri iyi sosiyete, Manzi Patrick yavuze ko gutera inkunga Mutesi Jolly ari uburyo bwiza RwandAir ikoresheje mu kwimenyekanisha muri Amerika aho iteganya gutangira ingendo mu mwaka wa 2017.

Icyizere ni cyose kuri Mutesi Jolly

Yagize ati “U Rwanda nk’igihugu giteye imbere mu bukerarugendo , twese twemera ko Miss Rwanda ari kimwe mu bintu twakoresha mu kumenyekanisha ubukerarugendo. Uko umwaka utashye ingendo z’indege ziragenda ziyongera, niyo mpamvu kuba twagiranye ubufatanye na Miss Jolly ni uburyo bwiza bwo kumenyekanisha indege zacu muri Amerika […] Kuri Miss Jolly tumwifurije intsinzi, biranashoboka cyane ko yazitwara neza agatahana ikamba.”

Umuyobozi ushinzwe ubucuruzi muri Cogebanque, Mujyambere Louis de Montfort yavuze ko iyi banki yishimiye gukorana na Miss Mutesi Jolly kuko yabahesheje ishema ndetse ngo bamufata nk’icyitegererezo ku bandi ba Nyampinga bamubanjirije.

Ati “Miss Rwanda Mutesi Jolly twagiranye imikorera myiza mu rugendo rwe, yerekanye ko ari urugero rwiza ku bandi ba Nyampinga bamubanjirije. Gukorana na we byaduteye ishema, dutangiye kubona umusaruro mwiza muri iki gikorwa cya Miss Rwanda mu myaka itatu ishize turi umuterankunga mukuru w’irushanwa.”

Mujyambere yongeyeho ati “Kuba Miss Rwanda yarabaye urugero rwiza akaba anagiye muri Miss World twagiye kandi ntagusubira inyuma, biduteye imbaraga cyane, nka Cogebanque tuzakomeza kumutera inkunga uko dushoboye kose.”

Umuyobozi wa Rwanda Inspiration Back Up, Ishimwe Dieudonne uzaherekeza Mutesi Jolly, yahise atangaza ko bongeye guhabwa isoko ryo gutegura Miss Rwanda bityo ko nibava muri Amerika muri Miss World azahita yanzika n’ibikorwa byo gushaka Nyampinga w’umwaka wa 2017.

Yizeye kuzatsinda
Manzi Patrick umuyobozi muri RwandAir
Mujyambere Louis de Montfort, Umuyobozi ushinzwe ubucuruzi muri Cogebanque
Ishimwe Dieudonne uyobora Rwanda Inspiration Back Up yavuze ko bagiye guhita batangira gutegura Miss Rwanda 2017
Umubyeyi wa Mutesi Jolly yavuze ko bazashyigikira umwana wabo muri Miss World
Rwandair yahaye Miss Mutesi Jolly itike y'indege izamujyana i Washington
Mujyambere Louis de Montfort, Umuyobozi ushinzwe ubucuruzi muri Cogebanque na Mutesi Jolly
Mu kiganiro n'itangazamakuru

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza