Neza wari umaranye iminsi n’umukunzi we muri Nigeria ari i Kigali

Yanditswe na Muvunyi Arsène
Kuya 24 Gicurasi 2019 saa 08:53
Yasuwe :
0 0

Umuhanzikazi w’umunyarwanda Neza Masozera Patricia uzwi nka Neza yaraye i Kigali nyuma y’ibyumweru birenga bibiri yari amaze muri Nigeria aho yari yaragiye gusura umukunzi we Skales.

Mu ntangiriro z’uku kwezi kwa Gicurasi 2019 nibwo umuhanzikazi Neza yizihije isabukuru y’umwaka umwe amaze akundana n’icyamamare muri muzika Skales wo muri Nigeria.

Byari ibyishimo bidasanzwe kuri aba bombi n’inshuti zabo ku buryo, uyu mukobwa usanzwe aba muri Canada yafashe indege imugeza i Lagos muri Nigeria kugira ngo yishimane n’umukunzi we bisesuye.

Ibyumweru birenga bibiri byari bishize Neza na Skales bari kumwe nk’uko uyu mukobwa yakundaga kubyerekana ku mbuga nkoranyambaga.

Ku mugoroba wo kuri uyu wa Kane nibwo yashyize amashusho magufi ku rubuga rwa Instagram ari mu ndege ya RwandAir yari imuzanye i Kigali, nyuma yo yongeye kugaragaza ifoto ari muri hoteli agaragaza ko yageze ku ivuko amahoro.

Nta byinshi biramenyekana ku rugendo rw’uyu mukobwa niba no mu bimuzanye haba harimo gahunda za muzika cyangwa ari ugusura umuryango we gusa.

Neza yamenyekanye cyane mu 2017 ubwo yakoranaga na MCG Empire ya MC Galaxy wo muri Nigeria. Muri iki gihe yakoze indirimbo zitandukanye harimo Uranyica, Vibe, Slay Mama n’izindi zatumye abona igihembo cya AFRIMMA 2017 nk’umuhanzi utanga icyizere ku mugabane Afurika.

Neza watandukanye na MCG Empire mu mwaka ushize amaze igihe nta ndirimbo ashyira hanze. Yaherukaga i Kigali mu gitaramo cya Kigali Jazz Junction cyabaye mu Ukuboza 2017 aho yafatanyije na Masamba.

Skales afite indirimbo nyinshi zakunzwe zirimo “Fire Waist” yakoranye na Harmonize, “Currency” yakoranye na Davido, “Body” yakoranye na Sarkodie n’izindi. Yanakoranye na Neza iyitwa “Good Life.”

Neza na Skales bamaze iminsi bari kumwe muri Nigeria
Neza na Skales bafashe ifoto y'urwibutso mbere y'uko batandukana
Skales na Neza bamaze umwaka bakundana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza