Ni nde waciye ikiraro cyambutsaga ba Nyampinga b’u Rwanda bajya kuba mu mahanga?

Yanditswe na Muvunyi Arsène
Kuya 6 Kamena 2019 saa 09:14
Yasuwe :
0 0

Amateka agaragaraza ko u Rwanda rwatoye bwa mbere Nyampinga mu 1992 ubwo ikamba ryambikwaga Nubuhoro Jeanne wishwe muri Jenoside yakorewe Abatutsi mu 1994.

Mu 1993 hatowe Uwera Dalila wagombaga gufata inshingano ze mu 1994 ariko Jenoside iba atarabasha kugira icyo akora.

Uyu yibera mu gihigu cy’u Bubiligi aho yari yarashatse umugabo, bakaza gutandukana.

Mu 2009 nibwo u Rwanda rwongeye kugira umukobwa wambikwa ikamba ry’uhiga abandi ubwiza, himikwa Bahati Grace wasimbuwe nyuma y’imyaka itatu.

Bahati Grace na we mbere y’uko asimburwa yahise yerekeza muri Leta Zunze Ubumwe z’Amerika aho yagiye gukomereza amasomo ye.

Mu 2015 nibwo yabonye impamyabumenyi y’icyiciro cya kabiri yakuye muri Kaminuza ya Kirkwood College aho yigaga ibijyanye no kuvura amenyo.

Aherutse guhabwa indi y’ibyerekeye Ibinyabuzima n’Ubutabire yatangiye gukorera kuva mu 2016. Kuva yagenda ntaragaruka mu Rwanda.

Uwamukurukiye ni Kayibanda Mutesi Aurore wambitswe ikamba rya Nyampinga w’u Rwanda 2012. Kayibanda na we 2015 yavuye mu Rwanda yerekeza muri Turikiya aho yakomereje amasomo mu bijyanye n’ubwubatsi.

Kuri ubu asigaye atuye muri Leta Zunze Ubumwe z’Amerika aho abana n’umuryango we dore ko aherutse gusezerana n’umukunzi we imbere y’amategeko.

Akiwacu Colombe wabaye Miss Rwanda 2014 na we akimara gutanga ikamba yahise yerekeza mu Mujyi wa Paris mu Bufaransa aho yagiye kwiga ibijyanye n’Ubucuruzi muri Institut Supérieur du Commerce de Paris, akaba yarasoje mu mwaka ushize.

Akiwacu Colombe ajya aza mu Rwanda ndetse afite umushinga wo kubakira abatishoboye umaze igihe utararangira.

Uyu yasimbuwe na Kundwa Doriane mu 2015 na we wahise yerekeza muri Canada akimara gutanga ikamba mu 2016.

Yagiye avuga ko agiye kwiga ariko biza gutahurwa ko afite ibindi akora bihabanye n’amasomo.

Nyuma ya Kundwa Doriane inkubiri yaba Nyampinga b’u Rwanda bajyaga gutura mu mahanga yahise ihagarara, kugeza n’ubu abakurikiyeho bane bari mu Rwanda.

Haba hari uwababujije?

Mu 2016 hatowe Mutesi Jolly ndetse ahagararira u Rwanda bwa mbere mu irushanwa rya Miss World ryabereye muri Leta Zunze Ubumwe z’Amerika.

Kuko byari bimaze kuba nk’akamenyero benshi batekerezaga ko azahita yurira indege akajya iyo bakuru be baciye.

Ibi siko byaje kugenda kuko yahise atangira amasomo muri Kaminuza y’u Rwanda, atangiza n’umushinga mushya yise “Inter-generation Dialogue” ugizwe n’ibiganiro bihuza urubyiruko n’abayobozi bakomeye ku rwego rw’igihugu.

Yanahawe inshingano mu irushanwa rya Nyampinga w’u Rwanda aho amaze imyaka ibiri ari umwe mu bagize akanama nkempurampaka.

Mu kiganiro yagiranye na IGIHE, Mutesi Jolly wari warabonye ishuri mu Bwongereza yavuze ko yahisemo kuguma mu Rwanda kuko ariho yabonaga amahirwe menshi kurusha ahandi.

Ati “Buri muntu aba afite indoto ze, rero njye uko nabibonaga nta kintu cyagombaga kunkura mu Rwanda kuko nabonaga amahirwe menshi ahari. Ikigo nari naramaze kukibona ariko na none nagombaga gukoresha amahirwe nari mfite kugira ngo nyabyaze umusaruro. Nasanze kuba najyayo natakaza amahirwe kuruta uko naguma aha niga.”

Umushinga we ngaruka mwaka “Inter-generation Dialogue” Mutesi Jolly yari yatangije uri mu byatumye yanga kujya mu mahanga nubwo hari abamugiraga inama yo kugenda.

Iradukunda Elsa wamukurikiye mu 2017 na we ntaho yigeze ajya. Yakomeje gushyira mu bikorwa umushinga we wo kurihira abana amashuri bo mu karere ka Rubavu no kuvuza abafite indwara y’ishaza, ibintu akora rimwe mu mwaka.

Mu mwaka ushize yahawe inshingano zo kuba ambasaderi wa Made In Rwanda binajyanye n’umushinga yari yakoze acyambaye ikamba.

Ubu yatangiye kwiga muri kaminuza y’u Rwanda aho yiga ibijyanye n’ubukungu.

Yabwiye IGIHE ko yahisemo kuguma mu Rwanda nyamara yari afite uburyo bwinshi bwo kujya kwiga hanze dore ko yari anafite ishuri ryo muri Canada ryamwemereye.

Ati “Ni amahitamo yanjye kuguma hano. Nuko nifuza kwiga mu Rwanda, igihugu cyanjye. Byari gushoboka ko nagenda ariko ntabwo nabishakaga. Haba kwiga ku nkunga cyangwa kwiyishyurira byari gushoboka ariko ntabwo nabishakaga.”

Iradukunda Elsa avuga ko urubyiruko rwo muri Afurika muri rusange rudakwiye kurarikira kujya kuba mu bihugu byo mu Burayi n’Amerika ‘kuko ibyo bakurikira babibona n’inaha twese dufatanyije.”

Iradukunda Liliane watanze ikamba uyu mwaka na we ari mu Rwanda ndetse akomeje umushinga we wo kurwanya imirire mibi mu bana. Nta gitekerezo cyo kuva mu Rwanda afite.

Inkubiri yaba nyampinga b’u Rwanda bakoreshaga aya mahirwe nk’ikiraro kibajyana mu mahanga, yarangiye mu 2016 ubwo Inspiration Back Up yatangiraga gucunga inyungu z’abatowe.

Umuyobozi w’iyi sosiyete, Ishimwe Kagame Dieudonné, yavuze ko nta we babujije kujya mu mahanga ahubwo ari imitima nama yabo bakoresheje bagahitamo kuguma mu rwababyaye.

Ati “ Ntaho bihuriye n’umujyanama, ni amahitamo yabo. Biterwa na gahunda afite n’amahirwe ari kubona.”

Kugeza ubu abakiri mu Rwanda usanga bashyigikirana mu mishanga yabo ya buri munsi, ibintu Ishimwe Dieudonné avuga ko bashaka guhuza n’abandi bari hanze kugira ngo bakomeze kubakira hamwe igihugu.

Amategeko agenda irushanwa rya Miss Rwanda, avuga ko uwatowe aba atemerewe kujya kuba mu mahanga mu gihe cy’umwaka wose afite inshingano.

Mutesi Jolly yanze kujya kwiga mu Bwongereza aguma mu Rwanda
Iradukunda Elsa yahisemo kuguma mu Rwanda nyamara afite ubushobozi bwo kujya mu mahanga
Mutesi Jolly, Iradukunda Elsa na Iradukunda Liliane bose bahisemo kuguma mu Rwanda
Ababaye ba Nyampinga b'u Rwanda bakunze kuba bari kumwe
Iradukunda Elsa wabaye Nyampinga w'u Rwanda 2017 afite umushinga wo kuvuza abantu barwaye ishaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza