Nkusi Arthur, Garasiyani na Ben Nganji bishimiwe mu gitaramo cy’urwenya bahuriyemo

Yanditswe na Munyengabe Murungi Sabin
Kuya 31 Ukuboza 2016 saa 12:39
Yasuwe : XX
0

Abanyarwenya bakomeye mu Rwanda, Nkusi Arthur, Niyitegeka Gratien na Ben Nganji usetsa mu buhanzi yise ’Inkirigito’ basusurukije abitabiriye igitaramo cyabereye i Gikondo kuri Ambassador’s Park mu ijoro ryo kuwa 30 Ukuboza 2016.

Muri iki gitaramo cyatangiye ku isaha ya saa moya z’umugoroba nk’uko byari byagenwe, Garasiyani benshi bazi nka ’Seburikoko’ yabimburiye bagenzi be asusurutsa abitabiriye mu magambo y’urukurikirane rw’imitoma, yagarutse no ku mukino yahimbye witwa ’Imana mu rubanza’.

Hakurikiyeho Nkusi Arthur umenyerewe cyane mu tsinda ry’abanyarwenya yashinze ryitwa ’Comedy Night’, uyu yasusurukijje abitabiriye iki gitaramo yifashishije urwenya ruvuga ku bibaho mu buzima bwa buri munsi, avuga ku bimwegereye yabonaga n’ibindi.

Iki gitaramo cyamaze amasaha atatu, cyasojwe na Ben Nganji abanza kuririmba zimwe mu ndirimbo yagiye akora zirimo iyitwa ’Mbonye Umusaza’ n’izindi. Ben Nganji yatunguye abitabiriye avuga ko atari bukore mu nganzo ngo atondekanye amagambo mu buhanzi bwe yise ’Inkirigito’.

Nyuma y’akanya gato yatangiye ’Inkirigito’, umunota ku wundi imbaga y’abantu yasekeraga icyarimwe bagakwenkwemuka nk’abakirigiswe. Iki gitaramo cyanitabiriwe na bamwe mu bantu bazwi barimo umuririmbyi Audy Kelly, umunyamakuru Antoinette Niyongira n’umugabo we, n’abandi.

Nkusi Arthur yishimiwe cyane

Mu kiganiro na IGIHE nyuma y’igitaramo, Niyitegeka Gratien [Garasiyani] yavuze ko we na bagenzi be bishimiye cyane umusaruro bakuye mu bufatanye bwabo ku nshuro ya mbere yongeraho ko bigenze neza bashobora gukomeza kugirana ubumwe muri uyu mwaka uje mu rwego rwo guteza imbere umwuga wabo.

Ati "Abantu bari benshi bari buzuye twagerageje gutangirira ku gihe ugereranyije n’abandi [...] Byagenze neza twishimye kandi n’abantu batwishimiye."

Yakomeje ati "Birumvukana ko mu mwaka uje niba abantu batwishimiye gutya, ntabwo dukwiye kubatenguha kandi batubwiye ko badukunze. Twari twumvikanye ko iri ari igerageza tuzakora tukareba niba twakomeza buri muntu akagira icyo yigira ku wundi."

Nyuma y’iki gitaramo cy’abanyarwenya cyabereye muri Ambassador’s Park i Gikondo, hateganyijwe ikindi cy’ubuntu cyateguriwe abakunda umuziki gakondo wa Orchestre Impala de Kigali kigomba kuba muri iri joro risoza umwaka.

Abacurangiye Ben Nganji muri iki gitaramo
Ben Nganji afite ubuhanzi bwihariye mu gusetsa yise 'Inkirigito'
Seburikoko [Garasiyani] na Nkusi Arthur bafatanyije gusetsa abantu
Abantu bishimye cyane
Abantu basetse barakwenkwenuka
Garasiyani azwi cyane muri Seburikoko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza