Nyampinga w’u Rwanda 2017 azagenerwa ibihembo byihariye

Yanditswe na Munyengabe Murungi Sabin
Kuya 3 Mutarama 2017 saa 10:59
Yasuwe :
0 0

Irushanwa ryo gushakisha umukobwa uzahabwa ikamba rya Nyampinga w’u Rwanda ryatangijwe ku nshuro ya karindwi, rigiye gutangirira mu Ntara y’Uburengerazuba aho ku itariki ya 14 Mutarama 2017 rizabera mu Mujyi wa Rubavu.

Umukobwa uzatorwa azasimbura Miss Mutesi Jolly watowe muri Gashyantare 2016. Ijonjora ry’ibanze ryo gushakisha abemerewe kuziyamamaza ku rwego rw’igihugu rizaba kuwa14 Mutarama i Rubavu.

Umuyobozi wa Rwanda Inspiration Backup, Ishimwe Dieudonné yabwiye IGIHE ko iri rushanwa rigiye kuba uyu mwaka rizagaragaramo impinduka nziza zikomeye haba mu buryo bwo gutoranya abakobwa mu ntara enye n’Umujyi wa Kigali no mu buryo bwo gutanga ibihembo.

Ishimwe Dieudonné yavuze ko mu minsi ine ishize kwiyandikisha bitangiye hamaze kuboneka abakobwa barenga 60 bashaka guhatanira ikamba rya Nyampinga w’u Rwanda. Umujyi wa Kigali n’Intara y’Uburasirazuba ziri imbere mu kugira umubare munini w’abakobwa.

Yagize ati “Irushanwa rizatangirira i Rubavu ku itariki ya 14 Mutarama, abakobwa batangiye kwiyandikisha ari benshi, ntabwo nzi imibare neza nonaha ariko mperuka kureba barenga 60. Abo mu Mujyi wa Kigali n’Uburasirazuba nibo benshi, ni mu ntangiriro twizeye ko no mu zindi ntara bazaboneka benshi.”

Yavuze ko Nyampinga uzatorwa muri 2017 azahabwa ibihembo byihariye kurusha abandi batowe mu myaka yatambutse. Mu bihembo azagenerwa harimo imodoka nshya, umushara w’amafaranga 800,000 buri kwezi mu gihe cy’umwaka ndetse azahita ahabwa itike yo kuzahagararira u Rwanda mu irushanwa rya Nyampinga w’Isi wa 2017.

Miss Mutesi Jolly ufite ikamba rya Nyampinga w’u Rwanda ni we woherejwe guhagararira igihugu bwa mbere muri Miss World iherutse gusozwa i Washington mu Ukuboza 2016.

Yagize ati “Ku bihembo bisanzwe umukobwa agenerwa ni umushahara azajya ahembwa ungana n’amafaranga ibihumbi 800 mu gihe azamarana iri kamba, azanahabwa imodoka nshya nziza. Ikindi gikomeye ni uko agomba kuzahita ahabwa itike yo kujya muri Miss World.”

Umuyobozi wa Rwanda Inspiration Backup yahamije ko bahawe icyangombwa na Miss World kibemerera ko buri mwaka bazajya bohereza umukobwa uhagararira u Rwanda muri iri rushanwa rihuza abo ku migabane yose.

Ibigenderwaho kugira ngo umukobwa yemererwe kujya mu ijonjora:

1. Kuba ari Umunyarwandakazi
2. Kuba afite hagati y’imyaka 18-24
3. Kuba yararangije amashuri yisumbuye
4. Kuba avuga neza Ikinyarwanda n’urundi rurimi, hagati y’Icyongereza, Igifaransa n’Igiswahili
5. Kuba afite indeshyo ya sentimetero 170 kuzamura
6. Kuba apima ibiro hagati ya 45-70
7. Kuba atari yabyara
8. Kuba yiteguye kumara byibuze umwaka atuye mu Rwanda, igihe yatsinze
9. Kuba atiteguye gukora ubukwe mu gihe cy’umwaka yambaye ikamba
10. Kuba yiteguye guhagararira u Rwanda mu gihe bikenewe
11. Kuba yiteguye gukurikiza amategeko n’amabwiriza asanzwe agenga Nyampinga w’u Rwanda.

Ingengabihe y’uko irushanwa rizagenda

Ijonjora ry’abakobwa rizabera mu Ntara enye n’Umujyi wa Kigali hatoranywe 25 bazabonekamo 15 bazakora umwiherero mbere yo gutangaza Nyampinga w’u Rwanda. Irushanwa rizatangirira mu Mujyi wa Rubavu kuwa 14 Mutarama 2017 rizasozwe kuwa 25 Gashyantare 2017 mu birori bizabera kuri Expo Ground.

Miss Rwanda imaze imyaka itatu iterwa inkunga na Cogebanque ari nayo igenera Nyampinga umushara no kumugurira imodoka agendamo.

Iki kirango cyahawe amanota ko kirusha ubwiza icy'umwaka ushize
Nyampinga uzatorwa azasimbura Mutesi Jolly

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza