Kwamamaza

Orchestre Impala igiye gucurangira Abanyarwanda batuye mu Bubiligi

Yanditswe kuya 27-10-2016 saa 16:34' na Karirima A.Ngarambe


Itsinda ry’abacuranzi bubatse amateka muri Orchestre Impala de Kigali bagiye gukorera igitaramo mu Bubiligi, kizitabirwa n’abakunzi b’umuziki biganjemo Abanyarwanda batuye muri iki gihugu no mu nkengero.

Orchestre Impala yashinzwe n’abaririmbyi barindwi, ubu imaze imyaka irenga 40. Mu batangije Impala harimo Sebanani , Soso Mado, Kali wa Njenje , Maitre Rubangi, Fidèle Jacard, Semu Jean Berechimas, Gasigwa Abdukatifu bahimbaga Tubi Lando na Sebigeri Paul [Mimi La Rose].

Orchestre Impala izwi cyane mu ndirimbo zakanyujijeho Anita Mukundwa, Abagira amenyo, Iby’Isi ni amabanga, Inkuru mbarirano, Mbega ibyago, Hogoza ryanjye, Amavubi, Bonane n’izindi n’ubu zigikunzwe bikomeye.

Sebigeri Paul [Mimi La Rose] umwe mu bagize Impala yavuze ko ‘umwanya bahawe wo kujya gutaramira mu Bubiligi bazawukoresha neza ndetse bakongera kwibutsa abakunze iri tsinda hambere ibihe byiza bagize’.

Yagize ati “Ni ubwa mbere tugiye gutaramira i Burayi nyuma ya Jenoside, ni ikintu nashimye cyane, natwe tuzakora uko dushoboye tubashimishe ku buryo bazabona ibintu by’Impala ya kera.”

Aba bacuranzi ba Orchestre Impala batumiwe na Justin Karekezi uyobora kandi akaba yarashinze ishyirahamwe "Team Production". Yavuze ko yabatumiye mu rwego rwo gukomeza gufasha umuziki nyarwanda gutera imbere no kurushaho guha imbaraga abahanzi bo mu Rwanda.

Yagize ati “Mpora nifuza ko umuziki nyarwanda wambuka imipaka, bigatuma n’abahanzi bo mu Rwanda bamenyera gutegura ingendo n’ibitaramo byo hanze y’igihugu.”

Yongeraho ati “Nagize igitekerezo cyo gutumira Orchestre Impala mu rwego rwo gukumbuza Abanyarwanda n’inshuti zabo injyana nziza y’umwimerere ya muzika nyarwanda, kuko iyo witegereje ugashishoza Abanyarwanda bakunda cyane igihugu cyabo n’ umuco ku buryo byigaragaza. Umunyarwanda niyo yaba ari kure y’igihugu cye gute , umutima we uhora mu Rwanda, ibihangano by’abahanzi bikabafasha cyane kwegera igihugu no gukomeza kugirana isano ya hafi nacyo no guhura bagasabana batareba ngo uyu aturuka aha cyangwa n’iki.”

Karekezi yavuze ko yatumiye Orchestre Impala nk’uburyo bwo “gukomeza gukundisha cyane ikinyarwanda cy’umwimerere mu ndirimbo zabo, aho abato n’abakuru usanga zarababereye urwibutso muri byinshi.”

“Ikindi nifuza ni uko umwaka wa 2017 uzaba umwaka koko Abanyarwanda bazahura bagasabana muri gahunda zose Team Production izabategurira kurusha uko bisanzwe.”

Justin Karekezi ni umwe mu Banyarwanda bafite ishyirahamwe riza ku mwanya wa mbere mu guhuza Abanyarwanda n’inshuti zabo benshi hagati y’abantu 1000 kugera ku bihumbi 4000.

Justin Karekezi washinze Team Production

Azwi mu guha umwanya abahanzi benshi baturuka mu Rwanda, bagataramira Abanyarwanda n’inshuti zabo mu Burayi; ibi bifatwa ku ruhande rumwe nko guha aba bahanzi umwanya wo kubyaza umusaruro impano zabo, ndetse no kubereka ko bashobora kugira ibyo bunguka kandi bitabaye ngombwa ko bajya gutura mu Burayi nk’aho ari yo paradizo ku Isi.

Iki gitaramo giteganyijwe kubera mu Mujyi wa Bruxelles ku wa Gatandatu tariki ya 4 Werurwe 2017 guhera saa mbiri z’umugoroba ahitwa Birmingham Palace.

Orchestre Impala yavutse mu mwaka 1975, irakomeza kugeza mu myaka ya 1992, yongera kuba Impala zivuguruye muri Nzeri 2012, ubu ku isonga hari abaririmbyi nka Mimi La Rose na Munyanshoza Dieudonne, n’abandi bahanzi bakiri bato, aho barimo bahimba indirimbo nyinshi nshya zikunzwe mu bitaramo bitandukanye cyane cyane mu Mujyi wa Kigali.

Fidèle Jacard na Mimi La Rose bamwe mu batangiranye n'Impala hambere

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved