PGGSS8: Ni nde utahiwe nyuma ya Dream Boyz yateruye igikombe mu 2017?

Yanditswe na Munyengabe Murungi Sabin
Kuya 13 Nyakanga 2018 saa 03:03
Yasuwe :
0 0

Irushanwa rya Primus Guma Guma Superstar rihuriza hamwe abahanzi bakunzwe mu Rwanda rirabura amasaha make rikagera ku musozo, iry’uyu mwaka riri kuba ku nshuro ya munani uzaryegukana azahabwa akayabo.

Irushanwa rya Primus Guma Guma Superstar rimaze imyaka irindwi riba mu Rwanda, ritegurwa na EAP ku bufatanye n’uruganda rwa Bralirwa rwenga ibinyobwa bisembuye n’ibidasembuye, rubinyujije mu kinyobwa cya Primus.

Uko imyaka yagiye ishira irushanwa ryagiye rihinduka kubera impamvu zitandukanye nk’uko byagiye bitangazwa.

Primus Guma Guma Super Star igitangira, yahuzaga abahanzi bakunzwe kurusha abandi mu Rwanda ndetse mu guhitamo uwegukana igikombe hakibandwa ku buryo abahatana babaga batowe ku bwinshi n’abafana.

Ibi byaje guhinduka mu mwaka wa 2013 aho hongerwagamo n’isuzumwa ry’ubwiza bw’umuziki umuhanzi aririmba ndetse hatangira kugaragaramo abatanga amanota mu bitaramo.

Ibi byongewemo imbaraga birushijeho muri uyu mwaka, uburyo bwo kuririmbira kuri CD cyangwa gukora semi-live buvanwa mu irushanwa burundu, himikwa kuririmba mu buryo bw’umwimerere w’umuhanzi n’umuziki (live) mu kurushaho gusuzuma ubuhanga bwa buri wese mu bahatana.

By’akarusho uyu mwaka hashyizwemo impinduka zikomeye mu bihembo, abahanzi batanu ba mbere ni bo bazahembwa mu gihe mu myaka yashize bose bahembwaga amafaranga y’inyongera bitewe n’uko buri wese yitwaye.

Umuhanzi uzaba uwa mbere akemezwa n’akanama nkemurampaka, naramuka yitwaye neza akanahiga abandi mu gutorwa cyane biciye kuri telefone bizahita bimuhesha amahirwe yo kwegukana miliyoni 35[miliyoni 20 zizahabwa uwarushije abandi mu kwitwara neza kongeraho miliyoni 15 zizahabwa uwabaye uwa mbere mu gutorwa cyane].

Irushanwa rizasozwa kuri uyu wa Gatandatu tariki ya 14 Nyakanga 2018, kuri Expo Ground i Gikondo.

Urebeye ku bivugwa mu itangazamakuru, ku mbuga nkoranyambaga, mu bafana ubwabo n’ibishingirwaho mu gutanga ibihembo bya Primus Guma Guma Superstar, bigaragara ko igikombe gishobora gutwarwa n’umwe muri Christopher na Bruce Melody.

Aba bahanzi bombi, ni nabo bagiye bagaragaza imbagara zikomeye no gushyigikirwa cyane mu bitaramo byagiye biba mu bice bitandukanye by’igihugu ndetse na bo ubwabo ntibahwema kubigarukaho.

Christopher yakaniye aravuga ko igikombe agomba kugitwara ndetse akaba yizeye no kwegukana ikizagenerwa umuhanzi wahize abandi mu gutorwa cyane biciye ku butumwa bwa SMS; ku rundi ruhande na Bruce Melody akavuga ko nta wundi muhanzi uzagikora kuko icy’uyu mwaka ari icye.

Primus Guma Guma Super Star imaze imyaka irindwi ibera mu Rwanda kuva muri 2011. Bwa mbere yatwawe na Tom Close, King James (2012), Riderman (2013), Jay Polly (2014), Knowless (2015), Urban Boyz(2016) ndetse na Dream Boyz iheruka kuritwara muri 2017.

Ubu, iri rushanwa riri kuba ku nshuro ya munani, rihuje abahanzi icumi Young Grace, Christopher, Bruce Melody, Uncle Austin, Khalfan, Jay C, Queen Cha, Just Family, Active na Mico The Best.

Kugeza ubu, biracyagoranye cyane ko wahita wemeza ko umuhanzi runaka ari we ugomba gutsindira igikombe kugeza ku munota wa nyuma ubwo akanama nkemurampaka kazatangaza uwahize abandi.

Muri aba bahanzi bose ni nde ukwiye kwegukana iki gihembo?

Ni icya Christopher?

Ni icya Bruce Melody?

Ni icya Queen Cha?

Ni icya Jay C?

Ni Just Family izagitwara?

Ni Active izatsinda?

Ni Uncle Austin uzatwara igikombe?

Ni Young Grace uzaba uwa mbere?

Ni Mico The Best uzaba uwa mbere?

Ni Khalfan uzatungurana agatsinda?

Camera&Editing: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza