Producer Bob afunzwe akekwaho gufata umukobwa ku ngufu

Yanditswe na Munyengabe Murungi Sabin
Kuya 31 Kanama 2016 saa 04:49
Yasuwe :
0 0

Ndayambaje Emmanuel uzwi nka Producer Bob birakekwa ko afungiwe kuri Station ya Polisi ku Muhima akurikiranyweho icyaha cyo gufata ku ngufu umukobwa.

Producer Bob ni umwe mu batunganya indirimbo bamaze kwamamara mu Rwanda, akorera mu muturirwa wa Ndamage mu Mujyi wa Kigali rwagati. Akorana cyane n’abahanzi barimo Jules Sentore, Buravan, Umutare Gaby n’amakorali akomeye yo mu gihugu.

IGIHE ifite amakuru avuga ko uyu musore yatawe muri yombi mu gicuku cyo ku Cyumweru tariki ya 28 Kanama 2016. Abashinzwe kurinda umutekano ku maduka n’ibiro bikorera mu nyubako ya Ndamage bahamije ko Producer Bob yagiranye amakimbirane n’umukobwa bazanye mu modoka mu ijoro ryo ku Cyumweru kugeza ubwo hitabajwe polisi ihosha izi mvururu.

Muramba Laurent, umuzamu wabonye ya makimbirane aba kugeza Polisi ije yabwiye IGIHE ati “Bob yaje mu ijoro cyane, yari kumwe n’umukobwa mu modoka bageze imbere y’umuryango aramubwira ngo bavemo bazamukane muri studio undi abanza kubyanga. Mu modoka bamazemo nk’iminota icumi nyuma aremera barazamuka.”

“Bageze muri studio kwa Bob bamazemo iminota nka 20 twumva umukobwa asohotse avuza induru ngo Bob aramukubise, twahise tuzamuka hejuru tujya kureba uko byagenze. Tuhageze umukobwa yatangiye kutwereka aho bamukubise inkoni, yanavugaga ko Bob yamusabye ngo baryamane akabyanga nyuma bararwana.”

Producer Bob ngo yabanje guha uyu mukobwa amafaranga [bari bavanye i Nyarutarama nk’uko ubuhamya bubivuga] amasuba ko baryamana undi arabyanga. Ngo yanamuhaye amafaranga make umukobwa amubwira ko amuha ibihumbi ijana yari avuye kwishyuza umusore na we ngo ahita amubwira ko ‘ataha indaya amafaranga angana atyo’.

Guterana amagambo kwabyaye imirwano ngo kwaturutse ku magambo Producer Bob yabwiye uyu mukobwa. Muramba yongeraho ati “…uwo mukobwa na we yabonye kwirwanaho byanze bakomeje kumukubita ngo amenagura ibintu byo muri studio kugira ngo Bob amureke asohoke.”

Umukobwa akigera hanze yavugije induru ndetse ahamagara Polisi ari nabwo yahageze yinjira muri studio ikora iperereza rigufi nyuma irabafata bombi bajyanwa kuri station ya Muhima.

Producer Bob afunzwe akekwaho gufata umukobwa ku ngufu

IGIHE yabwiwe ko Producer Bob ataraye muri kasho iryo joro ahubwo ngo polisi yaramurekuye ko arataha yongera kwitaba kuwa Mbere tariki ya 30 Kanama 2016 ari nabwo bivugwa ko yahise afungwa.

Umuvugizi wa Polisi mu Mujyi wa Kigali yavuze ko agikurikirana aya makuru. Yabwiye IGIHE ko namenya amakuru y’ibivugwa aza kubitangaza.

Telefone igendanwa ya Producer Bob imaze iminsi ibiri itari ku murongo, ndetse umwe mu bahanzi bakorana bya hafi yavuze ko amuheruka mu cyumweru gishize.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza