Sesiliya wo mu ikinamico Urunana yashyinguwe (Amafoto)

Yanditswe na Munyengabe Murungi Sabin
Kuya 18 Kanama 2018 saa 03:11
Yasuwe :
0 0

Sesiliya, umugore wubatse amateka akomeye ku bw’ubuhanga bwihariye mu gukina ikinamico mu Rwanda yasezeweho bwa nyuma kuri uyu wa Gatandatu tariki ya 18 Kanama 2018.

‘Sisiliya’ ubusanzwe witwa Muteteri Penina Joy, yitabye Imana ku itariki ya 15 Kanama 2018, yapfuye nyuma y’igihe cyari gishize ahanganye n’indwara y’umutima ari nayo yamwambuye ubuzima.

Kuri uyu wa Gatandatu yasezweho iwe mu rugo rwe munsi ya Control Techinique mu Murenge wa Remera muri Gasabo. Mu bamusezeyeho banamuherekeje bwa nyuma harimo inshuti z’umuryango we, abakinnyi bakinanye na we mu ikinamico Urunana, abo bakinanye mu itorero Indamutsa za RBA n’abandi.

Nyuma yo kumusezeraho bwa nyuma iwe mu rugo rwe, umurambo we wajyanwe mu rusengero rwa EAR i Kanombe bamuvugira amasengesho ya nyuma.

Sesiliya wavutse ku wa 27 Ugushyingo 1958, yashyinguwe mu irimbi rya Rusororo ku mugoroba wo kuri uyu wa Gatandatu. Uyu mubyeyi asize abana batatu, umugabo we yatabarutse hambere.

Sesiliya yakinnye igihe kinini mu ikinamico Urunana, abenshi bamuzi nka nyina wa Patrick i Nyarurembo. Mu ikinamico zaciye ibintu hambere mu gihugu, yibukirwa cyane ku yitwa ‘Icyanzu cy’Imana’ yakinnyemo ari umugore wa Mbanzabugabo akaba mukase wa Uwera.

Uyu mubyeyi yubatse izina nka ‘Sisiliya’ gusa ubusanzwe yitwa Muteteri Penina Joy, ni umwe mu bari bamaze imyaka myinshi mu ruganda rw’ikinamico akaba ari no mu bakinnyi b’Indamutsa bakanyujijeho mu Rwanda.

Incamake y’ubuzima bwa Sesiliya

Muteteri Penina[wakunzwe cyane nka Sesiliya] yavutse ku wa 27 Ugushyingo 1958, yitabye Imana ku itariki ya 15 Kanama 2018. Yari amaze igihe afite uburwayi bwa Diabetes bwaje kumurusha imbaraga ubwo hiyongeragamo umutima.

Amashuri abanza yayize i Kayanga ari naho avuka, ayisumbuye yayize i Remera-Rukoma mu ishami ry’Uburezi akomereza mu yahoze ari Ishuri Rikuru Nderabarezi rya Kigali[KIE] mu ishami rya Bibliothéconomie[ibyerekeye gushyingura inyandiko].

Yigishije mu mashuri yo kuri EPA, yakoze muri Economa Generale kuri Saint Famille, yakoreye Orinfor[ubu yahindutse RBA] igihe kinini ari nabwo yamenyekanye mu byerekeye gukina ikinamico. Yibukirwa cyane mu yaciye ibintu ‘Icyanzu cy’Imana’ aho yakinaga ari Mukase wa Uwera].

Muteteri Penina Joy[Sesiliya] amaze kuva muri RBA, yagiye gukorera mu Rukiko Mpuzamahanga Mpanabyaha rwa TPIR i Remera. Yakoze muri komisiyo y’amatora; iyi mirimo yose yakoze yayibangikanyaga no gukina ikinamico Urunana aho yibukwa cyane nka Sesiliya w’i Nyarurembo.

Mu 1980, yashakanye na Mpabwanimana Jean de Dieu , babyarana abana batatu, abahungu babiri n’umukobwa umwe, aba bose barubatse. Asize umwuzukuru umwe.

Umuryango wa Sesiliya wamutanzeho ubuhamya bukomeye cyane nk’umubyeyi warangwaga n’urukundo, kugira urugwiro ndetse akaba yarakundaga kwiragiza isengesho muri byose.

Aba ni bamwe mu bana batatu Sesiliya asize
Kankwanzi wakinanaga na Sesiliya mu Runana yaje kumuherekeza bwa nyuma
Bushombe na we yaherekeje Sesiliya

Amafoto: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza