Sonia Rolland yahishuye ko hashobora kubaho gutungurana mu kwimika Nyampinga w’u Rwanda

Yanditswe na Dusabimana Aimable
Kuya 23 Gashyantare 2018 saa 10:39
Yasuwe :
1 0

Sonia Rolland wabaye Nyampinga w’u Bufaransa mu 2000, ni umwe mu bagize itsinda ry’abazaba bagize akanama nkemurampaka kazatanga amanota mu gikorwa gikomeye cyo gutora Nyampinga w’u Rwanda 2018.

Yaje mu Rwanda aje kwitabira ibirori byo gutoranya Nyampinga w’u Rwanda bitegerejwe muri Kigali Convention Centre kuri uyu wa Gatandatu, tariki 24 Gashyantare 2018. Yavuze ko mu guhitamo umukobwa mwiza ukwiriye kwambikwa ikamba hagenderwa ku ngingo nyinshi ku buryo no gutungurana byabaho.

Ibi yabitangarije mu kiganiro yagiranye n’itangazamakuru ku mugoroba wo kuri uyu wa Gatanu, tariki 23 Gashyantare 2018, mbere y’amasaha make ngo Nyampinga w’u Rwanda amenyekane mu birori na we azaba arimo nk’umuyobozi w’akanama gatanga amanota ku bakobwa.

Yagize ati “Iyo ureba umukobwa mwiza, ureba ingendo ye, uko yifitiye icyizere, ingano n’ibindi byose muri uwo mujyo birumvikana. Gusa uyu munsi twahaye abakobwa ikizamini cyanditse ndetse mu kanya turababaza mu buryo bw’imbonankubone, ariko tureba n’inyuma y’ibyo byose uwo ari we. Ni hahandi usanga ubonye umukobwa ugahita uvuga uti ‘Uyu ni we ugiye guhita aba Nyampinga’ ariko nyuma hakabaho gutungurana. Ntawamenya.”

Yongeyeho ati “Abakobwa nababonye ku mbuga nkoranyambaga zitandukanye, kuri Twitter, Facebook n’ahandi ariko iki nicyo gihe ko mbabona imbonankubone. Ntabwo ari ibirori gusa, ntabwo ari igitaramo tuba tugiye kureba gusa, ni igikorwa gihindura ubuzima bw’abacyitabiriye kuva ku watowe ntihasigare n’ibisonga bye. Bibaha amahirwe menshi mu buzima.”

Sonia Rolland yageze ku Kibuga Mpuzamahanga cy’Indege cya Kigali i Kanombe mu gitondo cyo kuri uyu wa Gatanu. Yakiriwe na Iradukunda Elsa ufite ikamba rya Nyampinga w’u Rwanda 2017.

Sonia Rolland yavuze ko hashobora kubaho gutungurana mu kwimika Nyampinga w'u Rwanda

Ishimwe Dieudonné ukuriye Rwanda Inspiration Backup itegura irushanwa ryo gutora Nyampinga w’u Rwanda, yavuze ko Sonia Rolland ari we ’Marraine’ wa Miss Rwanda 2018. Yongeyeho ko abandi bagize akanama nkemurampaka bamenyekana mu masaha atandatu mbere y’uko igikorwa nyirizina cyo gutora Nyampinga w’u Rwanda gikorwa.

Umuyobozi Ushinzwe Ubucuruzi muri Cogebanque, Mujyambere Louis De Montfort, yavuze ko iyi banki inyurwa no gushyigikira igikorwa cyo gutora Nyampinga w’u Rwanda kuko gihuza n’inshingano yiyemeje zo gushyigikira ibikorwa byiza mu muryango Nyarwanda by’umwihariko inateza imbere umwana w’umukobwa.

Yagize ati “Dufata irushanwa rya Nyampinga w’u Rwanda nka kimwe mu bikorwa dushyigikira tunagendeye ku nshingano twiyemeje. Ni irushanwa twamamarizamo ibikorwa ariko intego yacu mu gushyigikira iki gikorwa ni uguha imbaraga n’ubushobozi umwana w’umukobwa. Dutekereza ko iyo ntego igezweho natwe tuba twageze ku yacu, gusa tunashyigikira ibindi bikorwa bitandukanye bikomeye mu muryango nyarwanda.”

Yongeyeho ati “Icya mbere twungukira muri ibi bikorwa ni ukuba banki iteza imbere imbere umuryango by’umwihariko ishyigikiye umugore mu iterambere. Mu gihe tumaze iri rushanwa rimaze ryagiye rizamuka, twizeye ko tuzakomeza no kurishyigikira.”

Ginette Kadigiri ukora muri RwandAir, umuterankunga w’igihe kirekire w’irushanwa rya Nyampinga w’u Rwanda yavuze ko bashyigikiye kandi bifuza gukomeza gushyigikira abatorwa mu ngendo zitandukanye bagirira mu mahanga mu kumenyekanisha igihugu mu marushanwa y’ubwiza ku migabane itandukanye.

Abakobwa bahataniye ikamba rya Nyampinga w’u Rwanda bavuye i Nyamata mu mwiherero bari bamazemo ibyumweru bibiri, bakoze ibikorwa bitandukanye ndetse batozwa ibikwiye kuranga Nyampinga ubereye u Rwanda.

Mu bihembo Nyampinga w’u Rwanda 2018 azahabwa harimo imodoka nshya ya Suzuki Baleno ya miliyoni 18 Frw n’umushahara w’ibihumbi 800 by’amafaranga y’u Rwanda ku kwezi bizatangwa na Cogebanque, kumwishyurira salon akoreshamo imisatsi umwaka, kumwambika igihe cyose agiye mu marushanwa, kumwishyurira internet y’umwaka n’ibindi.

Umuyobozi Ushinzwe Ubucuruzi muri Cogebanque, Mujyambere Louis De Montfort yavuze ko iyi banki inyurwa no gushyigikira igikorwa cyo gutora Nyampinga w’u Rwanda
Umuyobozi ushinzwe Iyamamazabikorwa muri Cogebanque, Iyamuremye Antoine
Umuyobozi Ushinzwe Ubucuruzi muri Cogebanque, Mujyambere Louis De Montfort, yavuze ko bishimiye guteza imbere umwana w'umukobwa
Ginette Kadigiri ukora muri RwandAir yavuze ko bifuza gukomeza gushyigikira abakobwa bambikwa ikamba rya Nyampinga w'u Rwanda
Ikiganiro n'abanyamakuru cyabereye muri Kigali Convention Centre
Sonia Rolland yaje i Kigali gutanga amanota muri Miss Rwanda 2018
Sonia Rolland wabaye Nyampinga w’u Bufaransa mu 2000 n'Umuyobozi ushinzwe iyamamazabikorwa muri Cogebanque, Iyamuremye Antoine
Yazanye i Kigali n'itsinda rimufasha mu bujyanama

Inkuru bifitanye isano: Sonia Rolland yaje i Kigali gutanga amanota muri Miss Rwanda (Amafoto)

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza