Stromae yavuze ku burwayi n’imihangayiko yagize yitegura kuza i Kigali

Yanditswe na Munyengabe Murungi Sabin
Kuya 20 Werurwe 2017 saa 09:18
Yasuwe :
0 0

Imyaka ibiri irashize umuririmbyi w’igihangange ku Isi Stromae akoreye igitaramo mu Rwanda, urugendo rwe rwajemo kidobya kubera uburwayi yagize ubwo yari i Kinshasa bituma asubizwa mu Bubiligi igitaraganya.

Stromae n’umugore we Coralie Barbier bagiranye ikiganiro n’ikinyamakuru Libération bavuga ku bizazane banyuzemo ubwo uyu muririmbyi yiteguraga urugendo rw’amateka yagiriye mu Rwanda kuwa 16 Ukwakira 2015 Ni ku nshuro ya mbere aba bombi bavuze kuri iyi ngingo mu myaka ibiri ishize.

Stromae yahishuye ko mbere yo kuza gukorera igitaramo mu Rwanda yaryamaga ntagoheke, yanahishuye ko yagize guhangayika gukomeye ku buryo yajyaga mu buriri aho gusinzira akarara abunza imitima.

Yagize ati “U Rwanda ni igihugu cyihariye kuri njyewe. Ubwo itariki y’igitaramo cyanjye mu Rwanda yegerezaga sinasinziraga. Naherukaga kujyayo mfite imyaka itandatu. Ikindi, muzi ko Data yishwe muri Jenoside.”

Stromae yongeyeho ko ubwo yari i Kinshasa yitegura kuza mu Rwanda yagize guhangayika gukomeye bihurirana n’uko bamuteye urushinge rwo kumurinda malariya bimuviramo ingaruka zo ‘kugira ibibazo by’imitekerereze yamuguye nabi’.

Yavuze ko yaje mu Rwanda amaze gukora urugendo rw’ibitaramo by’inkurikirane 150, ngo byamusigiye umunaniro ku buryo yageze igihe atangira kwiyumva nk’ushobora kuzagira ibibazo byo mu mutwe. Ngo mu gihe yaje mu Rwanda yashoboraga gukora ikosa kuko ‘ntabwo yari uwo abantu basanzwe bazi’.

Yagize ati “Natekerezaga ko nari nataye ubwenge, bamvuye ibibazo by’imitekerereze nagize. Icyo gihe nashoboraga gukora ikosa kuko ntabwo nari njyewe.”
Coralie Barbier yavuze ko muri icyo gihe yari ahangayitse bikomeye kuko yatekerezaga ko umugabo we azasoza uru rugendo yarahindutse akaba undi muntu. Ati “Natekerezaga ko ntazongera kumubona nk’uko yari amaze mbere.”

Stromae yavuze ko yasaruye amafaranga menshi mu bitaramo yakoze amurika album ya kabiri yise ‘Racine carrée’ gusa yirinze kwerura ku giteranyo yabonye. Ngo nyuma yo kwishyura imisoro yaguze inzu nziza abanamo n’umugore we anaguramo imodoka ihenze ya Fiat agendamo.

Yagize ati “Ibyo nabonye byose , nyuma yo kwishyura imisoro kandi nyuzwe no kuba naratanze umusanzu, byashowe muri Mosaert[inzu y’imideli yashinze afatanyije n’umugore we]. Dukorana n’inganda...”

Stromae yagiriye ibihe bibi n’ibyiza muri Afurika

Stromae yagombaga kuba yararirimbiye i Kigali ku itariki ya 20 Kamena 2015 birangira urugendo rusubitswe kubera uburwayi yagiriye i Kinshasa kuwa 12 Kamena 2015 ahita asubizwa mu Bubiligi. Igitaramo yagomba gukorera mu Rwanda n’icyo yari yatumiwemo muri Congo byombi byarasubitswe icyo gihe.

Stromae yongeye gufata itariki nshya y’urugendo rwe mu Rwanda maze ahagera mu ijoro ryo ku itariki ya 16 Ukwakira 2015, yari aje kuhakorera igitaramo cy’agatangaza cyahuruje imbaga kuva ku biga kuvuga kugeza ku basaza n’abakecuru rukukuri. Hari n’amagana y’abaturutse mu mahanga nko muri Congo Kinshasa, Uganda, Burundi ndetse na Kenya ahari haturutse itsinda ry’abahanzi bagize Sauti Sol, bose bakuru n’umuziki w’uyu muhanzi.

Habura iminsi mike ngo agere i Kigali, ku mbuga nkoranyambaga no mu bitangazamakuru byose ni yo nkuru yacicikanaga. Ariko hari abigaragaje nka ba ‘Thomas’ wo muri Bibiliya bavugaga ko bemera bamubonye.

Byari iyobera! Haba mu bateguraga iby’urugendo rwe, abo mu muryango we, itangazamakuru n’abari bamurangamiye, nta n’umwe wari uzi ‘umunsi n’isaha’ yagombaga kugerera i Kigali ku mpamvu zabereye benshi urujijo.

Yaje i Kigali amaze kuririmbira mu bice bitandukanye byo ku Isi, aho yanyuze hose mu gihe kigera ku myaka ibiri yari amaze kwakirwa n’abafana 1.670.000 barimo Ababiligi 200.000. I Kigali yabonye abafana basaga gato ibihumbi 20 bityo ‘Racine carrée Tour’ yuzuza abantu 1.690.000 bitabiriye ibi bitaramo byose.

Stromae yaririmbiye yanyuze mu bihugu bitandukanye i Burayi, muri Afurika, muri Amerika nko muri Atlanta, Washington, Chicago, Boston, Minneapolis ho muri Leta ya Minnesota, San Francisco n’ahandi.

Mu bitaramo byasize amateka yakoreye muri USA, icyabereye mu nzu y’akataraboneka ya Madison Square Garden i New York cyitabiriwe mu buryo bukomeye, Stromae aba abaye umuhanzi wa gatatu uririmba mu rurimi rw’Igafaransa wabashije gukorera igitaramo wenyine muri iyo nzu ikuzura nyuma ya Celine Dion wo muri Canada na Charles Aznavour wo mu Bufaransa.
I Kigali Stromae yiyunze na se

Mu maso y’Isi nzima ashimira uwamushavuje! Mu ijoro ryabanjirije igitaramo cye i Kigali, Stromae yaraye atekereza uko aza kuririmba ’Papaoutai’, indirimbo ikomoza kuri se, bimubera ihurizo ariko afata umwanzuro wo kubikora.

Nyuma yo kuririmba ‘Papaoutai’ ari nayo yasorejeho igitaramo i Kigali, bwa mbere mu mateka y’ubuzima bwe yashimiye Rutare Pierre.

Stromae ubwo yavugaga ijambo ryasoje igitaramo aheruka kugirira i Kigali

Mu gusoza igitaramo cyasaga n’icy’ubwiyunge hagati ye na se, yahanze amaso mu kirere agira ati “Sinigeze mbikora, ndakeka ari ahantu heza n’isaha nziza yo gushimira Papa. Merci Papa! Merci Papa!” Arangije yihanagura icyuya mu maso.

Mu bitaramo byose yakoreye ku Isi, bwari ubwa mbere ashimiye se. By’umwihariko igitaramo yakoreye i Kigali yavuze ko agituye Rutare Pierre.

Yavuye mu Rwanda asuye abo mu muryango we, yasize abijeje ko azagaruka azanye na Coralie Barbier[icyo gihe bari bagikundana none ubu bararushinze].

Stromae n'umugore we Coralie Barbier baherutse kuvuga ku bihe bagiriye mu Rwanda
Stromae yavuye mu Rwanda asuye abo mu muryango we

I Kigali yakomoje kuri se Rutare Pierre


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza