Taylor Swift yaje ku isonga mu byamamare byinjije agatubutse mu 2019

Yanditswe na Muvunyi Arsène
Kuya 12 Nyakanga 2019 saa 07:49
Yasuwe :
0 0

Umuhanzikazi uri mu bakomeye muri Leta Zunze Ubumwe za Amerika, Taylor Swift, ni we uyoboye urutonde rw’ibyamamare byinjije amafaranga menshi mu mezi 12 ashize aho amaze gukorera agera kuri miliyoni $185.

Taylor Alison Swift w’imyaka 29 yahiriwe n’urugendo rwe muri muzika aho yakunzwe cyane mu ndirimbo ziganjemo iza Pop na Country Music.

Ikinyamakuru cyandika ku bukungu cya Forbes Magazine cyatangaje ko uyu muhanzikazi yongereye amafaranga asarura mu muziki ku kigero cya 131% ugereranyije n’umwaka wa 2018 aho yinjije agera kuri miliyoni $80.

Uyu mukobwa ukora injyana ya Pop si ubwa mbere ayoboye urutonde rw’abahanzi binjije agatubutse kuko mu 2016 yinjije miliyoni $170 yakuye mu bitaramo bizenguruka Isi yitiriye album ye “1989”.

Ibitaramo yakoze mu mwaka ushize wa 2018 yise ‘The Reputation Stadium Tour’, byinjije miliyoni $226,1 muri Amerika nk’uko byatangajwe na Billboard Boxscore.

Ibi bitaramo byabereye mu mijyi 36 yo mu bihugu birindwi byo ku migabane ine, aho byarangiye byinjije miliyoni $345.

Mu 2018 Netflix yaguze uburenganzira bwo kwerekana Reputation Stadium Tour mu ijoro ribanziriza umwaka mushya, bamwishyura amamiliyoni.

Mu Ugushyingo 2018, Taylor Swift yatandukanye n’inzu yamufashaga gutunganya umuziki ya Big Machine Label Group, yinjira muri Universal Music Group’s Republic aho bivugwa ko yahawe miliyoni $200.

Taylor Swift akurikirwa n’umunyamideli Kylie Jenner (miliyoni $170), Kanye West (miliyoni $150), Lionel Messi (miliyoni $127) na Ed Sheeran (miliyoni $110).

Taylor Swift ayoboye urutonde rw'ibyamamare byinjije amafaranga menshi mu mezi 12 ashize
Umuririmbyi Taylor Alison Swift ari mu bahanzi b'abanyabigwi mu muziki wa Leta Zunze Ubumwe za Amerika
Taylor Swift ni umuhanzi umaze kuzenguruka Isi akora ibitaramo byagutse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza