Theo Bosebabireba yigaritse umugore uvuga ko basambaniye muri Lodge

Yanditswe na Munyengabe Murungi Sabin
Kuya 17 Gashyantare 2017 saa 02:59
Yasuwe :
0 0

Umuririmbyi Uwiringiyimana Théogène [Theo Bosebabireba] yihakanye yivuye inyuma umugore umushinja ko babyaranye nyuma y’uko ngo basambaniye muri Lodge iherereye i Nyabugogo mu Mujyi wa Kigali.

Theo Bosebabireba amaze imyaka icumi aririmba, umuziki we wasakaye henshi mu Rwanda. Ni umuhanzi uri mu b’imbere bakunzwe bikomeye kubera ubutumwa bwomora imitima y’abumva ibihangano bye. Yakunzwe bikomeye mu ndirimbo zakanyujijeho zirimo ‘Ikiza urubwa’, ‘Ibigeragezo si karande’, ‘Bosebabireba’, ‘Ingoma’ n’izindi.

Uyu muhanzi avugwa ubudasiba mu itangazamakuru, akenshi ashinjwa guca inyuma umugore we, kunywa inzoga akambura utubari n’andi manyanga atagira ingano. Ubu inkuru igezweho ni iy’umugore witwa Violette wo mu Ntara y’Amajyepfo uvuga ko yagiranye ibihe byiza na Theo Bosebabireba ubwo bahuriraga i Nyabugogo bajya gusambanira muri Lodge birangira umugore asamye.

Uyu Violette yabwiye City Radio ko ahangayikishijwe bikomeye n’umwana yabyaranye na Theo Bosebabireba nyuma akanga kumufasha kumureba. Yagize ati “Naturutse mu majyepfo ndaza duhurira hafi y’ahahoze isoko rya Nyabugogo dore ko Kigali ntari nyizi neza icyo gihe,yahiseko anjyana muri Lodge maze turaryamana antera inda.”

Yavuze ko yashakishije Theo Bosebabireba ngo bakemure ikibazo cy’uyu mwana aramubura burundu, igihe cyarageze ngo ajya kumurega mu mudugudu atuyemo ku Gisozi yemerera inzego z’ibanze ko yemeye kuzamufasha kumurera ariko ngo kuva ubwo byahise birangira.

Mu kiganiro na IGIHE, Theo Bosebabireba yavuze ko atazi uyu mugore ndetse ngo yabifashe ‘nk’ikinyoma cyambaye ubusa cyahimbwe n’abantu batumwe na satani. Ati “Ibyo nabyumvise yabivuze kuri radio ariko ni ukunsebya, ntabwo ari ukuri rwose ndarengana, ibyo ni ibinyoma, ndabimenyereye ni satani uba wagabye igitero iwanjye.”

Yongeyeho ko yagerageje gushakisha uwo mugore umushinja ko babyaranye ariko ngo yamuhamagaye kuri telefone igendanwa bivugwa ko ariyo yakoresheje avugana na City Radio yumvise ari Bosebabireba uhamagaye yanga kuvuga.

Ati “Nashakishije uwo muntu uri kumparabika, nashakishije iyo nimero yakoresheje avugana n’umunyamakuru ndayihamagara nkumva yamfashe ariko ntavuge. Nyuma nongeye yitabwa n’umugabo ambwira nabi ku buryo nahise mvumbura ko ari imitwe bapanze ngo bansebye.”

Theo Bosebabireba usanzwe ufite abana batandatu yavuze ko iyi nkuru ari imwe mu mitego satani akoresha ashakisha uko yamubuza amahwemo gusa ngo yihaye intego ko agomba gukomeza akazi akirinda guhangana n’abamusebya.

Ati “Ibyo ni ukunsebya, ni satani ukoresha abo bantu ngo bansebye hanyuma nanjye nte umutwe njye kuburana na bo. Imana yambujije kujya mpangana na bene abo bantu, ni inzira satani akoresha kugira ngo nsubire gucukura imisarane.”

Theo Bosebabireba avuga ko inkuru zimuvugwaho zitamuca intege mu rugendo rw'ivugabutumwa

Yongeyeho ati “Iteka ryose nubakira ku kwihangana. Niba naracukuriye umuntu umusarane nkawuzuza akanyambura nkihangana, kuki bamvuga ibyo nkababara? Uko bimeze kose bizashira, sinarwana n’umuntu ngo yamvuze. Hari abigeze kunshinja ngo nambuye inzoga nanyoye mu kabari ko mu Mujyi, najyanyeyo n’abapasiteri banjye bajya gukora iperereza basanga ndengana rwose.”

Uyu muhanzi ari gutegura album ya cumi n’imwe, yari amaze iminsi mu bitaramo muri Kenya mu Mujyi wa Nairobi, yavuyeyo aririmbiye ahantu habiri hatandukanye. Ubu yagarutse mu Rwanda aho na none yatumiwe mu bitaramo bizabera i Nyagatare ahitwa Cyabayaga mu mpera z’iki cyumweru.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244