Trey Songz yatawe muri yombi azira gukubita umupolisi

Yanditswe na Dusabimana Aimable
Kuya 30 Ukuboza 2016 saa 07:23
Yasuwe :
0 0

Umuririmbyi w’icyamamare muri Leta Zunze Ubumwe za Amerika, Tremaine Aldon Neverson uzwi nka Trey Songz, yatawe muri yombi na Polisi yo mu Mujyi wa Detroit wo muri Leta ya Michigan, akurikiranyweho ibyaha byiganjemo iby’urugomo no kugerageza kurwanya inzego zishinzwe umutekano.

Trey Songz w’imyaka 32 yatawe muri yombi na Polisi nyuma y’igitaramo yakoze mu ijoro ryo ku wa Gatatu tariki 28 Ukuboza 2016. Umwe mu bantu bakora mu nzu y’ibitaramo yitwa Joe Louis Arena uyu muhanzi yaririmbiragamo yamusabye guhagarika kuririmba ku isaha ya saa tanu n’igice z’ijoro undi arabyanga.

Uyu mukozi w’inzu y’ibitaramo yari yakiriye Trey Songz hashize akanya yaje gufata umwanzuro wo gucomokora indangururamajwi uyu muririmbyi yakoreshaga bituma ava ku rubyiniro afite uburakari bwinshi atangira kwangiza no kujugunya ibikoresho byose byari bimwegereye.

TMZ ivuga ko umupolisi wagerageje gufata Trey Songz yahise akomeretswa n’ibisigisigi by’ibikoresho yashwanyaguzaga. Amakuru avuga ko uyu muhanzi yakomeje kurwanya inzego zishinzwe umutekano gusa bikaza kurangira atawe muri yombi.

Trey Songz yatawe muri yombi azira guhangana n'abashinzwe umutekano

Yagejejwe mu rukiko mu masaha ya mu gitondo kuri uyu wa Kane tariki 29 Ukuboza 2016, akurikiranyweho ibyaha birimo gukubita no gukomeretsa ndetse no kugerageza kurwanya inzego zishinzwe umutekano.

Mu rukiko yacecetse yanga kwiregura ku byaha aregwa, yaciwe ihazabu y’amadolari ya Amerika 25,000 angana na miliyoni 20 mu mafaranga y’u Rwanda, ndetse akaba yagumishijwe mu maboko ya Polisi kugeza igihe kitaratangazwa.

Uyu muhanzi aherutse muri Afurika y'u Burasirazuba aho yari muri Kenya mu mpera za Nzeri

Trey Songz yamenyekanye cyane mu ndirimbo ’Say Aah’, iyitwa ’Bottoms Up’ yakoranye na Nicki Minaj, ’Heart Attack’ n’izindi yagiye akora zibumbiye kuri album esheshatu afite zirimo iyitwa I Gotta Make It, Trey Day,Ready, Passion, Pain & Pleasure, Chapter V, na Trigga.

Uyu muririmbyi watangiye umuziki muri 2005 amaze guhatanira ibihembo bikomeye mu muziki birimo Grammy inshuro zigera kuri eshatu, yabaye umuhanzi w’umugabo waranze umwaka wa 2010 mu bihembo bitangwa na BET, yanatwaye ibindi bihembo birimo icya MuchMusic Video Awards, Soul Train Music Awards n’ibindi.

Amashusho yerekana Trey Songz yangiza ibikoresho byo ku rubyiniro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza