Ubuhanga budasanzwe bwa Bruce Melody muri Coke Studio (Video)

Yanditswe na Munyengabe Murungi Sabin
Kuya 11 Nzeri 2017 saa 03:55
Yasuwe :
0 0

Itahiwacu Bruce [Bruce Melody] ni we muhanzi wa mbere ukomoka mu Rwanda watumiwe mu bakomeye bitabiriye ikiganiro cy’umuziki cya Coke Studio Africa umwaka wa 2017.

Bruce Melody yagiye i Nairobi muri Kenya ahabereye Coke Studio muri Gicurasi 2017. Mu cyumweru yamazeyo yaririmbanye n’umuraperi Khaligraph Jones uzwi cyane mu baraperi bagezweho muri iki gihugu cya Kenya.

Ibikorwa byahuje abahanzi bitabiriye Coke Studio uyu mwaka byatangiye guca kuri Televiziyo zikomeye muri Afurika mu ntangiriro za Nzeri 2017.

Muri Coke Studio Africa, Bruce Melody yaririmbye indirimbo yitwa ‘Yego’ ya Khaligraph Jones, agerageza kuririmba asukiranya amagambo nk’abaraperi agasoza aririmba mu buryo bwo guhogoza. Khaligraph Jones uri mu bahanzi bakunzwe cyane muri Kenya aririmba ‘Comple me’ ya Bruce Melody, iyi yishimiwe bikomeye n’abamaze kureba video Coke Studio yamaze gusohora igaragaza uko bombi bitwaye.

Bruce Melody yabwiye IGIHE ko mu gice[episode] kibimburira ibindi bikorwa byahuje abahanzi uyu mwaka, ibyo yaririmbye afatanyije na Khaligraph Jones nibyo byerekanwe kuri Televiziyo mpuzamahanga mu muhango wo gufungura Coke Studio Africa.

Yongeyeho ati “Ahubwo biriya mwabonye ni agace ka mbere, naririmbye indirimbo ya Khaligraph na we aririmba ‘You Complete Me’, hari indi ndirimbo twakoranye yitwa ‘Kirisense’ nayo iraryoshye cyane muzayibona.”

Yavuze ko amajwi y’ibyo baririmbye yatunganyijwe na Producer DJ Maphorisa wo muri Afurika y’Epfo uri mu batunganyije indirimbo One Dance ya Drake, Kyla na Wizkid.

DJ Maphorisa yatunganyirije indirimbo abahanzi bandi bakomeye barimo Kwesta, Uhuru, Black Coffee, Runtown na C4 Pedro n’abandi. Uyu DJ Maphorisa ubusanzwe witwa Themba Sekowe nawe asanzwe ari umuhanzi.

Uyu Khaligraph Jones wakoranye na Bruce Melody afite imyaka 26. Afite Album ebyiri ari zo Point of No Return na Autograph. Azwi cyane mu ndirimbo nka We Be Happening, Khali, The Best, Asante Sana, Men of Steel, Mario n’izindi. Khaligraph Jones agereranywa n’abahanzi nka Victoria Kimani, Ali Kiba, Kaka Sungura, Redsan n’abandi nk’aba.

Mu bandi bahanzi bitabiriye Coke Studio uyu mwaka harimo Rayvanny, Izzo Bizness na Nandy bo muri Tanzania; Bebe Cool, Eddy Kenzo, Ykee Benda na Sheebah bo muri Uganda; Khaligraph Jones na Band Becca bo muri Kenya.

Harimo kandi Sami Dan wo muri Ethiopia, Nasty C, Busiswa na Mashayabhuqe bo muri Afurika y’Epfo; Youssoupha wo muri RDC; Dji Tafinha wo muri Angola; Laura Beg wo muri Mauritius; Jah Prayzah na Slapdee bo muri Central Africa Republic; Bisa Kdei na Worlasi bo muri Ghana; Betty G wo muri Ethiopia; Shellsy Baronet na Mr. Bow bo muri Mozambique; Denise wo muri Madagascar na Ozane wo muri Togo; ndetse na Freeda wo muri Namibia.

Muri Coke Studio, Bruce Melody yeretswe urukundo

Coke Studio ni umushinga ukomeye ugamije guteza imbere umuziki, watangirijwe muri Brazil mu 2007 nyuma uza no kugezwa mu bindi bihugu bitandukanye Pakistan, u Buhinde naho muri Afurika watangijwe mu 2013.

Coke Studio ku Mugabane wa Afurika ihuza abahanzi bakunzwe kandi bafite ubuhanga bwihariye mu bihugu byabo bagahurizwa hamwe kugira ngo baririmbane babe banakorana umushinga w’indirimbo mu rwego rwo kuvanaho inzitizi zituma abahanzi bakizamuka badahura n’abamaze kubaka izina ku Isi.

Bruce Melody yerekanye ko yabasha no kuba umuraperi

Khaligraph aririmba Complete me ya Bruce Melody


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza