Ubuzima bwa Jay P warambitse ikiganza ku ndirimbo zahaye ikuzo umuziki w’u Rwanda (Video)

Yanditswe na Muvunyi Arsène
Kuya 21 Gicurasi 2019 saa 11:43
Yasuwe :
0 0

Guhera mu 2003 kugera 2009, ubwo umuziki w’u Rwanda wisuganyaga nyuma y’aho abari abahanga benshi bari bamaze guhitanwa na Jenoside yakorewe Abatutsi mu 1994, hari abahanzi babadukanye umurava bongera kuwukundisha Abanyarwanda.

Abo ni nka Miss Jojo muri “Tukabyine”, “Ubona ko ndinde” na “Mbwira”; Rafiki muri “Igipende”, “Igikosi”, “Icaro”; “KGB” muri Arasharamye, “Ndashaka Urukundo”; “Sur La Terre” ya Minani Rwema n’izindi.

Izi ndirimbo zaracuranzwe mu birori, zifashishwa mu tubyiniro n’utubari ndetse ziharira umwanya w’izasabwaga mu biganiro byo kuri radiyo.

Ibi bihangano byose byahawe umugisha n’umugabo witwa Gatsinda Jean Paul uzwi nka Jay P uri mu bamaze igihe mu mwuga wo gutunganya indirimbo, akagira umwihariko wo kuba yarakoze izitagira ingano zigaruriye imitima y’Abanyarwanda benshi.

Yakoranye kandi n’abahanzi bo hanze y’u Rwanda nka Jose Chameleone na Navio bo muri Uganda; Ray C na Professor Jay bo muri Tanzania n’abandi.

Jay P wamugereranya n’inzu y’ibitabo bivuga ku mateka y’umuziki wo mu Rwanda kuko abenshi tubona muri iki gihe bakomeye baciye mu biganza bye bakishakisha.

Jay P ni muntu ki?

Gatsinda Jean Paul yavukiye mu Karere ka Kicukiro mu Mujyi wa Kigali mu 1982. Ni umusore uteganya gushinga urwe rugo mu minsi ya vuba.

Nk’abandi banyamuziki benshi, urugendo rwe rufite imizi mu rusengero rwa Rwanda For Jesus ruri Kicukiro. Niho yatangiriye kwiga gucuranga piano, gitari (bass) no kuririmba ubwo yigaga mu mwaka wa kane w’amashuri yisumbuye.

Aracyazirikana ko umuramyi Uwimana Aimé ari umwe mu bamwigishije gucuranga gitari ahayinga mu 1998.

Jay P yabaye mu itsinda ryakanyujijeho mu ndirimbo zo guhimbaza Imana rizwi nka Sowers ryamenyekanye cyane mu ndirimbo yitwa ‘Gusenga kwanjye’.

Mu 2003 nibwo yatangiye gutunganya indirimbo ahereye muri studio yitwaga SH Records yari iherereye i Remera mu Mujyi wa Kigali.

Yagize ati “Nibwo namenye abarimo DMS ataraba umuhanzi, SKC, Big Dom, Family Squad, Miss Shannel. Icyo gihe twakoze indirimbo na KGB ari nabwo natangiye gukora muri studio.”

Ibyo gutunganya indirimbo yabyigishijwe n’Umudage witwa Andy nyuma afashwa n’abandi barimo Aaron Niyitunga.

Jay P avuga ko amafaranga ya mbere yashyize mu mufuka we ayakuye mu muziki yavuye mu kiraka cyo gucuranga mu bitaramo by’Itsinda ryo muri Congo rya Makoma byazengurutse mu bihugu byo mu Karere aho yahembwaga $300 kuri buri kimwe.

Mu 2004 yavuye muri studio ajya gukorera Radio Flash FM yari igitarangira. Yakoraga ibirango by’ibiganiro n’amakuru, amatangazo yamamaza n’ibindi bijyanye n’amajwi, nyuma ajya kuri Contact FM nabwo akora nk’ibyo.

Kuri ubu afite studio ye yitwa 08 Records ikorera ku Kicukiro ndetse ni we uyobora Urugaga rw’abatunganya indirimbo.

Umubyeyi w’abahanzi benshi

Mu 2009 nibwo Jay P yaretse gukorera abandi yiyemeza kwikorera ku giti cye aho yashinze Hop Street Studio yakorewemo indirimbo nyinshi.

Yatangiye afasha abahanzi ariko atabishyuza ahubwo ‘twasinyanaga amasezerano nkajya nkora ibitaramo kugira ngo ndebe ko nagaruza amafaranga.’

Jay P niwe winjije mu muziki umuhanzi Rafiki wamamaye mu njyana ya ‘Coga Style’.

Ati “Rafiki twamenyanye akiri umubyinnyi mu itsinda ryitwaga Hot Side abyinana na ba Kamichi, akantwaza ibyuma kuko ninjye wabacurangiraga nkajya mbona umuhate afite, mwinjiza muri studio avamo umuhanzi gutyo.”

Uyu mugabo yemeza ko ari we wafashije Nirere Shannel agitangira, amuha izina rya ‘Miss Shannel’, anamufasha gukora indirimbo ya mbere yitwa ‘Amajoro’.

Ati “Twamenyanye ataramenya neza aho ahagaze mu buhanzi mufasha kumushakira izina n’indirimbo ya mbere.”

Jay P kandi ni we wakoze indirimbo yitwa ‘Nzakubona ryari’ iri mu zatumye izina rya King James ritumbagira mu bakunzi b’umuziki mu Rwanda.

Yatunganyije album ya mbere ya Kitoko yakorewe i Burundi muri Tanganyika Studio yari iriho indirimbo zakunzwe cyane nka ‘Jacqueline’, ‘Akagecuru’, ‘Bikiramariya’ n’izindi, akorera Liza Kamikazi n’abandi.

Yigishije aba-producers bahagaze neza

Ubwenge Jay P afite mu gutunganya indirimbo ntiyabugumanye nk’Umwami Ruganzu ahubwo we yigishije benshi umwuga, arabarera baracuka.

Ati “Urugero rworoshye natanga ni nk’umwana witwa Made Beat. Twahuye mu myaka yashize ari umucuranzi mwiza, ariko uyu munsi ni producer mwiza. Yatangiye akora indirimbo buhoro buhoro nkazirangiza ariko ubu byose arabyikorera.”

Uretse abo yigishije bari kumwe hari n’abandi bakora neza barigishijwe n’abahoze ari abanyeshuri be.

Yakomeje ati “Uwitwa nka Papa Emile yarazaga akanyicara iruhande akabibona akigisha n’abandi nka ba Nicolas. Iby’ibanze bakagenda babihanahana.”

Gatsinda Jean Paul uzwi nka Jay P yakoze indirimbo nyinshi zakunzwe kuva mu myaka 15 ishize

Yinjiza agatubutse

Jay P nta kandi kazi katajyanye n’umuziki yakoze ndetse avuga ko umuziki umubeshejeho neza.

Uyu musore ubarira studio ye agaciro ka miliyoni 15 Frw, yinjiza ari hagati y’ibihumbi 500 Frw na miliyoni 1 Frw ku kwezi.

Yavuze ko “Iyo ndebye neza ndamutse ndi mu kandi kazi mpembwa ku kwezi nahitamo kuguma muri studio kuko akenshi ushobora gukorera amafaranga benshi batabona.”

Umwihariko wa Jay P

Ugiye kubara indirimbo zakunzwe zakozwe na Jay P ntiwawuva, ariko nawe hari izo yakunze kurusha izindi.

Iya mbere ni “Tukabyine” ya Miss Jojo na Rafiki, “Arasharamye” ya KGB na “Sur La Terre” ya Minani Rwema.

Avuga ko ibanga rikomeye yakoresheje kugira ngo akore indirimbo nyinshi zakunzwe ari ugutekereza mbere yo kuyikora no gukoresha ibyuma byiza.

Ati “Icya mbere twarabanzaga tukitonda n’ubu niko mbigenza iyo ngiye gukora indirimbo. Tukicarana n’umuhanzi tukaganira atari ukuvuga kanaka yakoze ikintu turashaka kucyigana. Ikindi nari mfite ibikoresho nka za digital mixer mu gihe ari na bake bazifite n’ubu. Nakoreraga ku bikoresho binyemerera gusohora indirimbo ishobora kujya mu kabyiniro washyiramo n’iyo hanze ukumva nta tandukaniro ririmo.”

Ntarasaza!

Nubwo abatunganya imiziki bamaze kuba uburo buhuye mu Rwanda n’iterambere rikaba rigenda rizamuka, Jay P ntabwo asigara inyuma kuko n’ubundi indirimbo akora zirakundwa.

Indirimbo za Nsengiyumva François nk’iyitwa “Mariya Jeanne” benshi bita Igisupusupu na “Icange”; “Twapfaga Iki” ya Clarisse Karasira; “Tonight” ya Jay C afatanyije na Social Mula; “Nyizera” ya Mr Kagame na Tom Close n’izindi ni we wazirambitseho ikiganza.

Hari n’izindi ndirimbo abantu bumva zakozwe n’abandi ariko na we hari umusanzu yazitanzeho mu bijyanye no kuzinonosora (Mixing na Mastering); izi zirimo “Agatimatima”, “Hari Ukuntu”, “Inshuti Nyazo” ya Jay Polly, “Super Star” ya Social Mula n’izindi.

Jay P ateganya gutangiza ishuri ryigisha gutunganya umuziki no gushyiraho ishami ritunganya amashusho mu rwego rwo gukomeza kwagura ibikorwa bye.

Indirimbo zakunzwe cyane, Produce Jay P yarambitseho ikiganza

-  Sur La Terre ya Minani Rwema

-  Tukabyine ya Miss Jojo na Rafiki

-  Arasharamye ya Kigali Boyz (KGB)

-  Icaro ya Rafiki

Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza