Umuhire Rebecca, Nyampinga ushaka kwinjiza ikoranabuhanga mu kurwanya inda zitateganyijwe

Yanditswe na Dusabimana Aimable
Kuya 11 Gashyantare 2018 saa 01:59
Yasuwe :
0 0

Umuhire Rebecca, umwe mu bakobwa 20 bahataniye ikamba rya Nyampinga w’u Rwanda 2018 afite gahunda yo gushyira imbaraga mu bukangurambaga burwanya inda zitateganyijwe mu bakiri bato hifashishijwe uburyo bw’ikoranabuhanga mu gihe yaba atowe.

Umuhire Rebecca ni umwe mu bakobwa biyamamarije mu Ntara y’Amajyepfo, avuka mu muryango w’abana batanu akaba uwa kane. Afite imyaka 19, areshya na metero 1.70, agapima ibilo 56.

Mu kiganiro na IGIHE, Umuhire yasobanuye ibigize umushinga wo guhangana n’inda zitateganyijwe mu bato yeretse akanama gatanga amanota muri Miss Rwanda, yifuza kujyana n’umwihariko wo kubikoreshamo ikoranabuhanga agendeye ku kuba urubyiruko rw’ubu ari ryo ruhanze amaso cyane.

Yagize ati “Impamvu nifuje kuza muri Miss Rwanda ni uko ntekereza gushyira imbaraga mu bukangurambaga bwo guhangana n’ikibazo cy’abana b’abakobwa batwara inda zitateganyijwe.”

Yongeyeho ati “Umwihariko wanjye ni uko nshaka kubihuza n’ikoranabuhanga. Nabonye ko urubyiruko muri iki gihe rukunze gukoresha telefone ngendanwa kurusha kumva uko mbere bumvaga radio cyangwa bakareba televiziyo amasaha menshi.”

Umuhire avuga ko icyizere cyo gushoboka k’umushinga we aramutse atowe agishingira ku kuba n’ubundi mu mashuri yisumbuye yarakurikiye Ishami ry’amasomo arimo ibijyanye n’ikoranabuhanga kuko yize MPC [Math, Physics, Computer] ndetse akaba yifuza no kubiminuzamo.

Yagize ati “Ibijyanye no kurwanya inda zitateganyijwe mu bakiri bato nifuza kuzabigeraho nkoresheje porogaramu yajya muri izo telefone, ikabafasha gusobanukirwa byihuse ibijyanye n’imyororokere yabo, uwatwaye inda akamenya uko yitwara. Ubu usanga abazitwaye badatinyuka kubibwira ababyeyi cyangwa umuvandimwe byihuse kuko akenshi baba bumva byabarangiriyeho.”

“Ni umushinga natekereje biturutse ku bakobwa ariko ntabwo yerekeye abakobwa gusa kuko n’abahungu bazamenya ibijyanye n’imyirorokere yabo ndetse n’iy’abakobwa ku buryo bafatanya kumenya uko bakwirinda.”

Umuhire Rebecca, Nyampinga ushaka kwinjiza ikoranabuhanga mu kurwanya inda zitateganyijwe

Uyu mwari avuga ko kuba hari imishinga nk’uwe yashobotse ku rwego mpuzamahanga kuri ubu hakaba hariho ikoranabuhanga rishobora gufasha abakobwa kumenya ibijyanye n’ukwezi k’uburumbuke kwabo n’ibindi bishoboka abatwaye inda zitateganyijwe bakaba bafashwa ndetse n’abandi bakazirindwa.

Ati “Hari abo tuzafatanya, ntabwo ari ukubitekereza gusa. Ubu hari ’porogaramu’ zifasha abakobwa kuba bamenya ibijyanye n’imihango, ukwezi kwayo n’ibindi. Ntekereza ko ibyo ubwo bihari n’ibindi ntekereza bishoboka kuko nanavuganye n’abantu batandukanye basobanukiwe iby’ikoranabuhanga mu mikoranire.”

Yakomeje ati “Abo batumva radio ntibarebe televiziyo bahora kuri telefone bizajya bibageraho kandi babikoreshe bashobore kuba bakwirinda inda zitateganyijwe. Nifuza gukorana n’abantu b’inzobere muri icyo cyiciro ku buryo basobanura ibintu bitandukanye ku myororokere ubutumwa bukanyuzwamo.”

Umuhire avuga ko umushinga we utazibanda ku buryo bw’ikoranabuhanga gusa nubwo ari ryo zingiro ryawo. Yifuza kuzageza ibitekerezo bye mu mashuri, ndetse ngo agakorana n’ababyeyi binyuze mu tugoroba tw’ababyeyi n’izindi nzira zishoboka.

Icyo avuga ku gushyira udukingirizo mu bigo by’amashuri

Umuhire avuga ko icyo gitekerezo kimaze iminsi mu Rwanda we atagishyigikiye mu buryo bwuzuye nubwo hari akamaro bishobora kugira ku bijyanye no kurwanya inda zitateganyijwe.

Yagize ati “Icyo mbona udukingirizo dushobora kuzongera ubusambanyi, nutujyana mu mashuri hari n’abazabikora bavuga bati babitwegereje reka tunabikore tumenye uko bigenda, bitavuze ko hatari n’ibyiza bishobora kuzana. Mbona abananiwe kwifata aho kugira ngo batware izo nda, bandure izo ndwara, badukoresha.”

Yabwiwe ko asa na Kayibanda Mutesi Aurore

Umuhire avuga ko muri ba Nyampinga b’u Rwanda afata nk’icyitegererezo ku isonga haza Mutesi Jolly ariko akanakunda cyane Kayibanda Mutesi Aurore biturutse ku buryo yakunze kubwirwa n’inshuti ze ko basa.

Yagize ati “Muri ba Nyampinga beza u Rwanda rwagize ku bwanjye nkunda babiri, Mutesi Jolly ku bw’ibikorwa yagezeho na Mutesi Aurore ku bw’ubwiza bwe.”

Yakomeje agira ati “Nkunda Mutesi Jolly afite ibikorwa byinshi byagiye bintera ishyaka, harimo uko yasuye urubyiruko rw’Iwawa n’inama yaruhaye byanteye imbaraga. Mutesi Aurore we abantu benshi haba inshuti zanjye n’abo mu muryango bakunda kumbwira ko dusa bigatuma mukunda.”

Umuhire avuga ko inshuti ze zakunze kumubwira ko asa na Kayibanda Mutesi Aurore

Umuhire avuga ko yifitiye icyizere cyo kwegukana ikamba rya Nyampinga w’u Rwanda, ati “Icyizere cyo kuba Nyampinga w’u Rwanda ndagifite, numva nifitiye icyizere kandi ndanasenga.”

Ku gicamunsi cyo kuri uyu wa 9 Gashyantare 2018 nibwo abakobwa bakomeje mu cyiciro cya nyuma barimo na Umuhire Rebecca bajyanywe mu mwiherero (Boot Camp) ubera kuri Golden Tulip [La Palisse] i Nyamata, bazahamara ibyumweru bibiri.

Nyuma y’uwo mwiherero bazungukiramo amasomo atandukanye, bazawuvamo haba ibirori nyamukuru bizasiga hamenyekanye Nyampinga mushya w’u Rwanda, uzatorerwa muri Kigali Convention Centre ku ya 24 Gashyantare 2018.

Abakobwa bose bajyanywe mu mwiherero i Nyamata bagira igihe cyo gukora imyitozo ngororamubiri
Mu myitozo ya mu gitondo baba bahuje urugwiro
Nyuma y'imyitozo bafata ifunguro rya mu gitondo
Umuhire Rebecca na mugenzi we Uwase Ndahiro Liliane bari muri 20 bajyanywe mu mwiherero i Nyamata

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza