Umunabi n’umujinya mu banyamakuru, akumiro ku batumiye Tekno

Yanditswe na Dusabimana Aimable
Kuya 12 Nzeri 2017 saa 09:00
Yasuwe :
0 2

Impera z’icyumweru gishize zasize inkuru zitandukanye mu bijyanye n’imyidagaduro, ibiganiro byinshi byumvikanamo uko umuhanzi Tekno yasiragije abamutumiye i Kigali ariko igitaramo cye kikarangwa n’ubwitabire bw’ikigero cyo hejuru.

Augustine Miles Kelechi, umuhanzi wo muri Nigeria wamamaye cyane nka Tekno Miles, yategerejwe i Kigali, tariki 10 Nzeri 2017, ntiyabasha kuhagerera igihe.

Uyu muhanzi wakunzwe mu ndirimbo zitandukanye zirimo ’Pana’, ’Duro’, ’Diana’ nubwo mu gitaramo yabashije gususurutsa abitabiriye urugendo rwe rwaranzwemo ibibazo uruhuri ku buryo byatumye aririmba hashize amasaha abiri gusa avuye mu ndege ndetse na bwo akabikora avuga ko afite umunaniro n’imvune yazindukanye kuko yaryamye bucyeye muri Kenya.

Igitaramo cyaririmbwemo na Tekno cyiswe “My250 Concert 1st Edition” cyagaragayemo kwizihirwa ku bacyitabiriye nubwo mbere y’uko uwo muhanzi ahagera hari ubwoba ko ashobora kubatenguha, amafaranga bishyuye agashya.

Igitaramo cya Tekno ukunze kwiyita Slim Daddy mu Rwanda cyari mu ruhurirane rw’ibyo yise ’The Lion King Tour’, yagikoze nyuma y’ikindi yari avuyemo mu Mujyi wa Nairobi muri Kenya, akahava yijujutiwe na bamwe kubera imiririmbire ikemangwamo ubunebwe nubwo imyishyurize y’amatike aho aririmbye hose iba ifite ibiciro byo hejuru.

Tekno yari bukurikizwe imijugujugu muri Kenya iyo ahatinda

Uyu muhanzi mbere yo kuza gutaramira mu Rwanda, yari yabanje gukora igitaramo cy’inkera mu Mujyi wa Nairobi muri Kenya. Ikinyamakuru cyitwa Mwende Ngao cyakoze ubusesenguzi ku myitwarire ya Tekno muri Kenya, cyagaragaje ko igitaramo yahakoreye ari bimwe mu bitazibagirana mu gusiga umunabi mu bafana biturutse ku mpamvu zitandukanye.

Tekno yageze i Kigali igitaramo cye cyatangiye nubwo yari yahereye kare avuga ko ari mu ndege

Imitegurire yacyo yanenzweho kurangwa n’akavuyo n’umutekano muke aho abafana binjiriraga byatumaga uwinjira byibuze bimutwara isaha yose ategereje ko asakwa.

Usibye akaduruvayo kari mu mitegurire y’urugendo rwe muri icyo gihugu, ku ruhande rw’uburyo uyu muhanzi yaririmbye, na byo byafashwe nko kwerekana ko yageze muri Kenya kuko ibyuma by’umuziki byari byateguwe ubwabyo nta muziki w’umwimerere byabashaga kuba byasohora ahubwo ari urusaku n’andi majwi y’uruvangitirane.

Tekno wamaze iminota 28 ari imbere y’abitabiriye igitaramo, yageze ku rubyiniro ku isaha ya saa cyenda mu rukerera rw’uwundi munsi. Yabanje kuririmba mu buryo bw’umwimerere ndetse afite n’itsinda ry’abamucurangira. Indirimbo ze ’Be’ na ’Go’ zarishimiwe bitagira urugero, mbere y’iminota mike ngo arebwe igitsure na benshi mu bafana.

Nyuma y’akanya gato itsinda ryacurangiraga Tekno ryararekeye, abafana batangira gukurikira umuziki urimo urusaku rwinshi havuka ibibazo bikomeye ubwo Dj yahagarikaga burundu indirimbo yitwa ’Pana’ bigahagurutsa uburakari bukomeye mu bafana bwatumye batangira kumukomera ndetse hakumvikana amajwi ahanitse avuga ’Boo’.

Hari ibibazo umuntu atarondora byinubiwe n’abakurikiye imiririmbire ya Tekno muri Kenya, ndetse byanatumye hari abataha kitarangiye bivumbuye. Imbuga nkoranyambaga mu gihe cy’igitaramo zacicikanyeho amagambo agaragaza ukutishimira uwo muhanzi ndetse bamwe bavuga ko aho kujya kumureba bari gushaka umuziki asanzwe akora bakawurebera kuri Youtube n’izindi mbuga.

Tekno i Kigali yasiragije abamutumiye n’itangazamakuru

Ibyagereranywa n’ubuswa cyangwa kudaha agaciro aho yatumiwe ni byo byaranze Tekno Miles uri mu bafite igikundiro mu rubyiruko rwo mu Rwanda rukunda umuziki wo muri Nigeria. Uyu muhanzi wari waraye inkera muri Kenya byari byabanje gutangazwa ko agera i Kigali mbere y’umunsi umwe ngo igitaramo cye kibe ariko biza kwigizwa inyuma bishyirwa mu gitondo cy’umunsi yari buririmbireho.

Ibitangazamakuru bitandukanye birimo n’ibikomeye mu Rwanda, n’itsinda ry’abantu babarirwa mu icumi barimo na bamwe mu bakuriye ibigo byatumiye Tekno i Kigali n’abaterankunga, bazindukiye i Kanombe aho byari biteganyijwe ko agera ku isaha ya saa moya n’iminota 15. Indege yagombaga kumuzana yarahageze uyu muhanzi ntiyaboneka ariko ibintu bihindura isura ubwo n’abakozi bo ku Kibuga cy’Indege mpuzamahanga cya Kigali bashwishurizaga abamutegereje ko nta wahageze.

Tekno yasiragije abamutumiye i Kigali bamara umunsi wose bamutegereje
Abagiye gutegereza Tekno ku kibuga cy'indege byageze aho birabarambira

Muri ako kanya utereye ijisho mu bamutumiye wabonaga telefone zicicikana bakora inama mu dutsinda bibaza ibyo Tekno abakoze. Uyu muhanzi yari yanze gusubiza mu buryo ubwo ari bwo bwose bageragezaga kumubarizaho icyatumye abatenguha ndetse n’abamutumiye ubwabo byageze saa yine z’amanywa bashobewe bataramenya niba ari buze cyangwa ntaze.

Ibi byarangiye hanzuwe ko ari bugere i Kigali mu ndege yagombaga kuhagera saa cyenda iturutse i Nairobi ariko yanyuze i Entebbe i Kampala. Ayo masaha yageze abatumiye Tekno bagarutse ndetse n’itangazamakuru ryiyongereyemo n’abatari baje mbere.

Isaha imwe, ebyiri, eshatu zarongeye zishira nta kimenyetso na kimwe kigaragaza ko uyu muhanzi akigeze mu Rwanda usibye ubutumwa yagendaga ashyira kuri Instagram avuga ko ari mu ndege aza ariko na none waterera ijisho kuri gahunda y’indege zitegerejwe ugasanga nta n’imwe iva aho ari iri kwerekeza i Kigali.

Tekno yageze i Kigali adashaka ko hari umuvugisha

Byabaye ngombwa ko hashakwa ubundi buryo bwo gutegereza uyu muhanzi wari wamaze kurambirana, ndetse iby’abanyamakuru bari bamutegereje bizamo kubaguyaguya kuko amasaha yari amaze gukura abantu bashobewe, mu gihe amakuru yaturukaga muri Kigali Conference and Exhibition Village [ahahoze hitwa Camp Kigali] yemezaga ko abantu benshi bahageze ariko batizeye neza ko umuhanzi bishyuriye kureba ari bubaririmbire.

Tekno yasohotse ku kibuga cy’indege saa mbiri zuzuye, akihagera yabanje gusubizwa inyuma, ab’inkwakuzi amafoto bayafashe. Umwe mu bantu baturukaga aho ari yabwiye itangazamakuru ko ’yafatanywe amashashi mu mizigo ye kandi atemewe mu Rwanda’, andi makuru akavuga ko yagize icyikango abonye ko ageze aho gusohokera bigatuma abanza kwitunganya neza.

Uyu muhanzi ntiyigeze yifuza kuvugana n’itangazamakuru na gato kuko n’uwamubajije impamvu aje atinze yabaye nk’umwigizayo akanga gusubiza ahubwo agahita yinjira mu modoka yagombaga kumugeza kuri hoteli ngo yitegure ahite ajya mu gitaramo. Aha itangazamakuru n’abamutumiye bari batangiye ibiganiro by’uko yabazwa ibibazo bike, ikiganiro n’abanyamakuru kigasubikwa kuko igitaramo cye cyari cyamaze gutangira ariko ntabwo ari ko byagenze.

Umunabi n’umujinya mu banyamakuru, akumiro ku batumiye Tekno

Tekno akigera muri hoteli yagombaga kwambariramo agakorana ikiganiro n’itangazamakuru, yamaze isaha n’igice ari mu cyumba wenyine, televiziyo zashakaga guhitisha ibyo avuga imbonankubone ntibyazikundira ndetse benshi bagaragaza ko niba atari busohoke hafatwa ibindi byemezo birimo kwerekeza ahabereye igitaramo akahabasanga.

Akigera i Kigali uyu muhanzi yahise ajya mu modoka

Muri uwo mwanya habayeho ikiganiro cy’iminota icumi cyanengewemo uyu muhanzi ndetse abamutumiye basobanura ibye basaba ko yihanganirwa iminota ibarirwa ku ntoki atasohoka hagashakwa ubundi buryo.

Umuyobozi wa Positive Production iri mu bateguye iki gitaramo, Judo Kanobana, yiseguye ku basiragijwe n’uyu muhanzi agira ati “Mbanje kubasaba imbabazi y’ibyabaye nubwo ntabishinzwe, ariko tugomba gusenyera umugozi umwe." Yongeyeho ati “Ntabwo ibyo nkoze, ari inshingano zanjye, kuko njyewe maze ukwezi akazi kanjye narakarangije, ariko nabonye uburyo mwihanganye n’uburyo mwababaye nifuza ko tuganira.”

Kanobana yasobanuye byinshi ku mpamvu umuhanzi batumiye yakomeje gutenguha abantu, avuga ko yakomeje kubabwira ko afite umunaniro, inzara n’izindi ngorane yagiye agira ku buryo byateje ibisa n’ubunyamwuga butuzuye mu rugendo rwe i Kigali.

Mu kwihanganisha abo Tekno yasiragije, Kanobana watumiye abahanzi batandukanye bakomeye bakaririmbira mu Rwanda, barimo na Stromae wakoze igitaramo cy’amateka i Kigali, yagize ati "Abayobozi baturi inyuma, igihugu kituri inyuma wenda ejo buri wese muri mwe azajya akora ibikorwa nk’ibi, bisaba ko twihanganirana." Yongeyeho ati “Ntabwo twubaka Tekno ahubwo turi kubaka imyagagaduro yacu yo mu Rwanda, ni yo mpamvu tugomba kwihangana.”

Yongeyeho ati "Ntabwo twubaka Tekno ahubwo turi kubaka imyagagaduro yacu yo mu Rwanda, ni yo mpamvu tugomba kwihangana."

Luckyman Nizeyimana umwe mu banyamakuru bakora ikiganiro cy’myidagaduro mu Rwanda yagize icyo asaba Judo Kanobana uri mu bateguye igitaramo cya Tekno, ati “abenshi hano ni abantu bafite imiryango, ariko twihanganye cyane, guhera saa moya za mugitondo abantu biruka ntabwo bivuze ko abantu baba babuze ibyo bakora. Gusa mujye mutanga amakuru nyayo kandi ku gihe, ntabwo abantu bari hano bishimye, ariko duhindure imikorerere.”

Tekno yasabye imbabazi ashimangira umunaniro nk’impamvu y’ibibazo byagaragaye mu rugendo rwe i Kigali

Tekno akigera mu kiganiro n’abanyamakuru, yahawe ijambo ariko mbere yo gusubiza uyu muhanzi yiseguye agira ati "Mbere y’uko nsubiza mbanje guca bugufi, nsaba imbabazi ku byabaye kuko ntabwo nanjye ari njyewe.”

Yakomeje agira ati “Mu ijoro ryashize nataramiye i Nairobi, igitaramo kirangira saa kumi n’imwe, urumva ko twaryamye bitinze, noneho mu gihe cyo kujya gufata indege iradusiga, ni yo mpamvu byose byabaye, gusa nsabye imbabazi.”

Mu bibazo mbarwa Tekno yabajijwe muri icyo kiganiro harimo icyo kuvuga uburyo azi u Rwanda cyangwa uruhando rw’umuziki mu gihugu. Uyu muhanzi yagize ati "Mbabwije ukuri nta muhanzi w’inaha n’umwe nzi, yewe nta n’indirimbo. Gusa ubwo nahageze ni wo mukoro wa mbere mfite. Ndashaka kubimenya byose dufatanyije."

Tekno n'abamutumiye mu kiganiro n'itangazamakuru

Tekno wageze i Kigali igitaramo cye cyatangiye, byari biteganyijwe ko agera ku rubyiniro havuyeho Bruce Melodie, ukunzwe muri iyi minsi mu ndirimbo ’Ikinya’ ndetse na Lilian Mbabazi, uherutse kwimukira mu Rwanda. Umuhanzi wa mbere yavuye ku rubyiniro akangononwa kakwiriye mu bafana bibazaga niba uwavuye muri Nigeria ari buhagere cyangwa atahagera.

Nyuma y’akanya igitaramo cyatangiye, abari bakiyoboye bifashishije amafoto yacicikanaga ku mbuga nkoranyambaga n’izindi za internet mu gushimangira ko koko uwo muhanzi yahageze.

Tekno yamaze agahinda abiganjemo urubyiruko bari bitabiriye igitaramo cye

Tekno yageze ku rubyiniro saa tanu zarenze ndetse wasangaga benshi bamaze kwizihirwa ku bw’ibinyobwa bafashe mu kwimara icyaka bamutegereje ku buryo hari n’abivugiye ko batabashije gukurikirana igitaramo neza kubera kwizihirwa. Uyu muhanzi yagerageje kuririmba igihe kirekire ariko akanyuzamo akumvikanisha ko ashaka kujya kuruhuka kuko afite umunaniro ukabije.

Tekno ukunzwe muri Nigeria yaririmbye indirimbo ze hafi ya zose zigezweho, yaririmbye iyitwa ’Yawa’, ’Duro’, Rara’, ’Go’ bigeze ku yitwa ’Diana’ abafana bamufasha kuririmba. Mbere y’uko igitaramo gisozwa uyu muhanzi yinginzwe n’abitabiriye bamusaba ko aririmba indirimbo ye yitwa ’Pana’ irushaho kongera ibyishimo mu biganjemo abakobwa bashize agahinda kubera kubyinana na we no kumukoraho.

Judo Kanobana yiseguye ku bo Tekno yasiragije ashimangira ko ibyakozwe n'uwo muhanzi bidakwiye gutuma abashyigikiye umuziki mu Rwanda bacika intege

Mu byo uyu muhanzi yavugaga buri indirimbo irangiye ntiyasibaga gushimira urukundo yeretswe n’Abanyarwanda ndetse rimwe na rimwe akifashisha kuririmba mu gusobanura uko yizihiwe n’uburyo yakiriwemo nubwo yagiye kuririmba hashize akanya gato avuye mu ndege.

Tekno ku rutonde rw’abahanzi baje mu Rwanda akarangwa n’imyitwarire yijujutiwe, ni we wenyine wabashije kuririmbira imbaga y’abafana benshi kuko abandi barimo 2Face usigaye witwa 2Baba na Kiss Daniel bahuye n’uruva gusenya bagataha baririmba urwo babonye.

2Face mu gitaramo yakoreye i Kigali mu ijoro ryo ku wa 23 Nzeri 2016, yaririmbiye intebe gusa n’abandi bantu barimo abatumiwe ndetse n’itangazamakuru. Bose babariwe hamwe ntibarengaga 50 nubwo ari umuhanzi ukomeye ndetse umaze imyaka myinshi azwi nk’icyamamare muri Afurika.

Tekno yisobanuye avuga ko ibyabaye byose byatewe n'umunaniro yakuye muri Kenya
Tekno yataramiye i Kigali nyuma yo kurara inkera muri Kenya
Abatumura ibizwi nka 'Shisha' bari biganje muri iki gitaramo
Abakobwa b'abanyabirori barimo Sacha, Shaddy Boo (uwa kabiri uvuye ibumoso) bari bakereye igitaramo cya Tekno
Uyu muhanzi yamaze agahinda abitabiriye igitaramo cye nubwo urugendo rwe rwarimo ibibazo byinshi

Amafoto: Shyaka Pascal & Dusabimana Aimable


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza