Urban Boyz, Makanyaga n’abandi banyamuziki basusurukije iserukiramuco ‘I Am Kigali’

Yanditswe na Munyengabe Murungi Sabin
Kuya 19 Ukuboza 2016 saa 12:59
Yasuwe :
0 0

Iserukiramuco rihuriza hamwe abahanzi baturuka imihanda yose mu Rwanda "I Am Kigali Festival" ryongeye kuba hizihizwa umunsi mpuzamahanga wahariwe abimukira ku Isi.

Abahanzi batandukanye bo mu Rwanda no hanze yarwo basusurukije abitabiriye iserukiramuco ’I am Kigali’ ryabaye mu ijoro ryo ku wa Gatandatu tariki 17 Ukuboza 2016 ku Kimihurura ku biro bikuru bya Rwanda Revenue Autority ahasanzwe habera ibitaramo.

Iki gitaramo cyari giteganyijwe gutangira ku isaha ya saa cyenda z’umugoroba, gahunda iza guhinduka ku bw’ikirere kitari kimeze neza n’imvura yajojobaga, ibi byagize ingaruka ku bwitabire kuko igitaramo cyitabiriwe n’abantu babarirwa muri 400 nyamara hari hitezwe abarenze abo.

Umuyobozi w’ibikorwa bya IMO Rwanda [International Organisation for Migration] yari yateguye iki gitaramo, Catherine Northing, mu kiganiro n’abanyamakuru yavuze ko nubwo abantu batacyitabiriye ari benshi yanyuzwe n’umusaruro w’ibyavuyemo.

Yagize ati "Twanyuzwe n’umusaruro, twishimiye uko iki gitaramo cyagenze muri rusange, yego abantu ntibitabiriye nk’uko twari tubyiteze gusa bacye baje batashye banyuzwe [...] abahanzi bakoze ibishoboka ndabashimira cyane."

Iki gitaramo cyatangijwe na Makanyaga aherekejwe n’itsinda ry’abamucurangira aririmba ’Nshatse Inshuti’, ’Iryo Mbonye’, n’izindi ndirimbo ze zakanyujijeho, hakurikiyeho abahanzi barimo Andy Bumuntu wishimiwe cyane, Eric 1Key, itsinda ry’abacuranzi ’Makumbi Sound’, Deo Munyakazi, Amizero Compagnie n’abandi batandukanye.

Igitaramo cyasojwe n’itsinda Urban Boyz basusurutsa abitabiriye iri serukiramuco mu ndirimbo zirimo ’Till I Die’, ’Yawe’, ndetse n’iyitwa ’Adamu na Eva’ bitiriye album nshyashya baherutse gusohora.

I Am Kigali yatangijwe ku bufatanye bwa International Organization for Migration na Impact Hub Kigali ndetse n’indi mishinga y’abantu ku giti cyabo mu rwego rwo gushyigikira ubukangurambaga bwiswe “I Am Kigali” bugamije kwerekana uruhare rw’ubuhanzi, ubugeni n’umuco mu kugeragaza Kigali irimo uruvangitirane rw’imico.

“I am Kigali” ifite intego yo guhuriza hamwe abantu baturutse mu bice bitandukanye by’u Rwanda[abahakomoka n’abaje kuhatura ku mpamvu zitandukanye] mu rwego rwo gusangiza amahanga iterambere ry’ubugeni n’ubuhanzi mu Mujyi wa Kigali.

Uyu mushinga ugamije gufasha umuziki nyarwanda kugera ku rwego mpuzamahanga ndetse no gutuma abawukora bawubonamo amafaranga.

Iserukiramuco I Am Kigali Festival rizagaragaza uburyo abantu baje gutura mu Rwanda kubera ubuhunzi n’izindi mpamvu zitandukanye bahawe uburenganzira busesuye bwo kongera gutangira ubuzima no gukora imirimo ibiteza imbere.

Makanyaga yishimiwe muri iki gitaramo
Nizzo na Humble Jizzo bo muri Urban Boyz
Ubwitabire bwari buke ugereranyije n'abari bitezwe

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza